(កែប)៖ នៅថ្ងៃទី២៩ខែកក្កដា ឆ្នាំ២០១៨នេះ ចាប់ពីម៉ោង៧.០០នាទីព្រឹកគឺជាការចាប់ផ្តើមដំណើរការបោះឆ្នោត ដែលនឹងត្រូវបន្តរហូតដល់ម៉ោង៣និង០០នាទី រសៀលទើបបញ្ចប់ការបោះឆ្នោត។ជាមួយនឹងថ្ងៃដ៏ប្រវតិ្តសាស្ត្រនេះពលរដ្ឋក្នុងខេត្តកែបទាំងមូលបានត្រៀមខ្លួនជាស្រេច ដោយពួកគាត់បាននាំក្រុមគ្រួសារ សាច់ញាតិ និងមិត្តភក្តិទៅចូលរួមបោះឆ្នោតជ្រើសតាំងតំណាងរាស្ត្រនីតិកាលទី៦យ៉ាងភ្លូកទឹកភ្លូកដី។
គេសង្កេតឃើញថា ក្នុងថ្ងៃបោះឆ្នោតនេះ បើទោះជាមេឃភ្លៀងរលឹមស្រិចៗបែបណា ក៏ប្រជាពលរដ្ឋទាំងប្រុស ទាំងស្រីបបួលគ្នីគ្នាទៅបោះឆ្នោតយ៉ាងច្រើនកុះករ ដែលបានបញ្ជាក់ពីគោលជំហរស្រលាញ់ប្រទេសជាតិ និងការចង់បានលទ្ធិប្រជាធិបតេយ្យមួយពិតប្រាកដ ពិសេសពួកគាត់បានបំពេញកាតព្វកិច្ចជាពលរដ្ឋខ្មែរ ដើម្បីជ្រើសរើសអ្នកដឹកនាំដែលខ្លួនស្រលាញ់ពេញចិត្ត តាមមាគា៌លទ្ធិប្រជាធិបតេយ្យ សេរី ពហុបក្ស។
បើតាមតួលេខរបស់ គ ជ ប បានបញ្ជាក់ថា ពលរដ្ឋក្នុងបញ្ជីឈ្មោះបោះឆ្នោតនៅទូទាំងខេត្តកែបមានសរុបចំនួន២៤.៣៧៧នាក់ និងមាន៦៧ការិយាល័យបោះឆ្នោត។ម្យ៉ាងទៀតនៅក្នុងថ្ងៃដ៏វិសេសវិសាលនេះដែរ ក្នុងចំណោមប្រជាពលរដ្ឋយ៉ាងច្រើនកុះករ គេឃើញវត្តមានថ្នាក់ដឹកនាំគ្រប់លំដាប់ថ្នាក់ក្នុងខេត្តកែប បានចូលរួមបោះឆ្នោតរួចរាល់ផងដែរ។
សូមបញ្ជាក់ថា៖ ការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨នៅខេត្តកែប ពិតជាមានលក្ខណៈល្អប្រសើរ គឺគ្មានសកម្មភាពណាមួយបង្កឲ្យមានការរំខានដល់ការបោះឆ្នោតឡើយ ដោយនៅគ្រប់ការិយាល័យបោះឆ្នោតទាំង៦៧ការិយាល័យនៅទូទាំងខេត្តកែប ដំណើរការបានល្អប្រសើរ មានរបៀបរៀបរយ រក្សាបាននូវសុខសុវត្ថិភាព ប្រជាពលរដ្ឋមានការរីករាយ អញ្ជើញចូលរួមបោះឆ្នោតជ្រើសរើសអ្នកដឹកនាំដែលខ្លួនស្រលាញ់ពេញចិត្ត តាមមាគ៌ាលទ្ធិប្រជាធិបតេយ្យ សេរីពហុបក្ស៕
សេង ណារិទ្ធ
