ក្រសួងកសិកម្ម រុក្ខាប្រមាញ់ និងនេសាទបានអំពាវនាវដល់ប្រជានេសាទ ត្រូវបញ្ឈប់នូវរាល់សកម្មភាពនេសាទខុសច្បាប់ ជៀសវាងការទទួលទោសតាមច្បាប់ស្តីពីជលផល។
ការអំពាវនាវបែបនេះធ្វើឡើងតាមរយៈសារនៅលើបណ្ដាញទំនាក់ទំនងសង្គមរបស់ក្រសួងកសិកម្មរុក្ខាប្រមាញ់និងនេសាទ បន្ទាប់ពីកម្លាំងអធិការដ្ឋានរដ្ឋបាលជលផលចតុមុខ បានចុះត្រួតពិនិត្យ និងបង្ក្រាបបានបទល្មើសនេសាទ ១ករណី កាលពីថ្ងៃទី ៥ ឧសភា ឆ្នាំ២០២៤ នៅចំណុចភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ដោយបានដកហូតនូវវត្ថុតាងរួមមាន ទូកម៉ាស៊ីនចំនួន ១គ្រឿង និងអួនចំនួន ១វង់។
រដ្ឋបាលជលផលអំពាវនាវដល់បងប្អូនប្រជាពលរដ្ឋប្រសិនបានឃើញករណីនេសាទដោយប្រើឧបករណ៍ខុសច្បាប់ខាងលើសូមបងប្អូនមេត្តាជួយផ្ដល់ព័ត៌មានដល់មន្ត្រីជលផលដើម្បីចាត់វិធានការបង្ក្រាបឲ្យបានទាន់ពេលវេលា។
