ប្រធានសមាគមអតីតយុទ្ធជនកម្ពុជាខេត្តព្រះវិហារ និងអតីតយុទ្ធជនជិត៣០គ្រួសារ រស់នៅក្រុងព្រះវិហារ ប្រកាសគាំទ្រយ៉ាងពេញទំហឹងការអនុវត្តគម្រោងជីកព្រែកហ្វូណន-តេជោ
(ព្រះវិហារ)៖ ឧត្ដមសេនីយ៍ទោ ច័ន្ទ សុភ័ក្ដ្រា មេបញ្ជាការតំបន់ប្រតិបត្តិការសឹករងព្រះវិហារ និងជាប្រធានសមាគមអតីតយុទ្ធជនកម្ពុជាខេត្ដ និងបងប្អូនអតីតយុទ្ធជនកម្ពុជា រស់នៅក្រុងព្រះវិហារជិត៣០គ្រួសារ បានប្រកាសគាំទ្រយ៉ាងពេញទំហឹង ចំពោះការអនុវត្តគម្រោងជីកព្រែកហ្វូណន-តេជោ ដែលជាព្រែកជីកប្រវត្តិសាស្ត្រលើកទី១នៅកម្ពុជា ដែលជាគំនិតផ្តួចផ្តើមរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃព្រះរាជាណាចក្រកម្ពុជា ហើយបច្ខុប្បន្នសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានបន្តស្នាដៃនិងជំរុញបន្ថែមក្នុងការអនុវត្តគម្រោង ព្រែកជីកហ្វូណន-តេជោ ឱ្យសម្រេចបាននាពេលអនាគត។
ការចេញប្រកាសគាំទ្រយ៉ាងពេញទំហឹងបែបនេះរបស់ប្រធានសមាគមអតីតយុទ្ធជនកម្ពុជា ខេត្តព្រះវិហារ និងបងប្អូនអតីតយុទ្ធជនរស់នៅក្រុងព្រះវិហារ ក្នុងឱកាសដែលលោកឧត្តមសេនីយ៍ទោ ច័ន្ទ សុភ័ក្ត្រា បានដឹកនាំក្រុមការងារ សួរសុខទុក្ខ សំណាះសំណាល និងនាំអំណោយដ៍ថ្លៃថ្លារបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុនី ចែកជូនអតីតយុទ្ធជន ចំនួន២៦គ្រួសារ រស់នៅក្រុងព្រះវិហារ នាព្រឹកថ្ងៃទី២៨ ខែមេសា ឆ្នាំ២០២៤។
នៅក្នុងឱកាសនេះដែរ លោកឧត្តមសេនីយ៍ទោ ច័ន្ទ សុភ័ក្ត្រា បានពាំនាំនូវប្រសាសន៍ផ្តាំផ្ញើសាកសួរសុខទុក្ខដោយក្តីនឹករលឹកពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុនី ផ្ញើជូនអតីតយុទ្ធជន និងប្រជាពលរដ្ឋដែលមានវត្តមាននៅទីនេះ ពិសេសនៅក្នុងឱកាសឆ្នាំថ្មី ឆ្នាំរោង ឆស័ក ព.ស២៥៦៧ សូមជួបតែសេចក្តីសុខ សុភមង្គល និងរកទទួលទានមានបានគ្រប់ក្រុមគ្រួសារ។
លោកឧត្តមសេនីយ៍ទោមេបញ្ជាការ ក៏បានថ្លែងប្រាប់បងប្អូនអតីតយុទ្ធជន និងប្រជាពលរដ្ឋដែលមានវត្តមាននៅទីនេះពីការអភិវឌ្ឍរីកចម្រើនរបស់ប្រទេសជាតិ ក្រោមការដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភាជាតិ និងជាប្រធានឧត្តមទីប្រឹក្សាផ្ទាល់ព្រះមហាក្សត្រ អតីតនាយករដ្ឋមន្ត្រីនៃកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបច្ចុប្បន្ន។
លោកឧត្តមសេនីយ៍ទោ ច័ន្ទ សុភ័ក្ត្រា ក៏បានថ្លែងប្រាប់បងប្អូនអតីតយុទ្ធជន ពីគម្រោងព្រែកជីកហ្វូណន-តេជោ នេះ ដែលជាគម្រោងបម្រើផលប្រយោជន៍ជាតិយ៉ាងធំធេង ជាពិសេសផ្នែកសេដ្ឋកិច្ច សង្គមនៅកម្ពុជា។លោកបញ្ជាក់ថាព្រែកជីកហ្វូណន-តេជោ នេះ តភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ដោយឆ្លងកាត់ខេត្តកណ្តាល តាកែវ កំពត និងខេត្តកែប មានប្រវែង១៨០គីឡូម៉ែត្រ ព្រែកជីកហ្វូណន-តេជោ ផ្តល់អត្ថប្រយោជន៍ដ៍មហាសាលដល់ប្រទេសកម្ពុជា ជាពិសេសវិស័យដឹកជញ្ជូន។ដូច្នេះក្នុងនាមសមាគមអតីតយុទ្ធជនកម្ពុជាខេត្តព្រះវិហារ និងបងប្អូនអតីតយុទ្ធជនទូទាំងស្រុក ក្រុង ក្នុងខេត្តព្រះវិហារ លោកប្រកាសគាំទ្រយ៉ាងពេញទំហឹង គម្រោងព្រែកជីកហ្វូណន-តេជោ នេះឱ្យដំណើរដោយរលូន និងទទួលបានជោគជ័យ។
លោកឧត្តមសេនីយ៍ទោមេបញ្ជាការ ក៏បានថ្លែងអំពានាវដល់ប្រជាពលរដ្ឋយើង ត្រូវចូលរួមអនុវត្តតាមគោលនយោបាយនានារបស់រាជរដ្ឋាភិបាល ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា ដើម្បីឱ្យប្រទេសជាតិយើងកាន់តែមានការអភិវឌ្ឍរីកចម្រើនថែមទៀត ពិសេសសូមចូលរួមអនុវត្តគោលនយោបាយភូមិ ឃុំ សង្កាត់ មានសុវត្ថិភាពឱ្យមានប្រសិទ្ធិភាពខ្ពស់។
សូមបញ្ជាក់ផងដែរថា៖នៅថ្ងៃនេះដែរ លោកឧត្តមសេនីយ៍ទោ ច័ន្ទ សុភ័ក្ត្រា និងភរិយា ព្រមទាំង នាយទាហាន នាយទាហានរង និងពលទាហាន ក្រុមគ្រួសារ បានរៀបចំពិធីសូត្រមន្តដោយបាននិមន្ត្តព្រះសង្ឃសូត្រមន្ត ជ័យន្តោ ប្រោះព្រំ សុំសិរីសួស្តី សុំសេចក្តីសុខ សេចក្តីចម្រើន ដល់កងទ័ព និងក្រុមគ្រួសារ ទាំងអស់ ក្នុងឱកាសឆ្នាំថ្មីនេះ។ដោយឡែកបងប្អូនអតីតយុទ្ធជនចំនួន២៦គ្រួសារ ដែលទទួលបានអំណោយដ៍ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ្រ ចន្ទមុន្នី នាពេលនេះ ក្នុង១គ្រួសារទទួលបាន៖អង្ករ០១បេ ,មុី០១កេស ,ទឹកត្រី០១យួរ ,ត្រីខ ០១យួរ និងថវិកាចំនួន៤០,០០០រៀលផងដែ៕
