ខេត្តបាត់ដំបង ៖ រថយន្តដឹកឈើគ្រញូង១គ្រឿងឡូតឆ័ត្រត្រូវអាវុធហត្ថស្រុកម៉ាឡៃសហការ អាវុធហត្ថស្រុកសំពៅលូនឃាត់បានទាំងម្ចាស់ កាលពីម៉ោង៦និង៣០នាទី ព្រឹកថ្ងៃទី៥ ខែសីហា ឆ្នាំ២០១៥ ចំណុចភូមិត្រពាំងព្រឹតឃុំសន្តិភាព ស្រុកសំពៅលូន ខេត្តបាត់ដំបង ។
សមត្ថកិច្ចអាវុធហត្ថស្រុកម៉ាឡៃបានអោយដឹងថា ក្រោយទទួលព័ត៌មានមានរថយន្តដឹកឈើគ្រញូងចេញពីដីថៃ ឆ្លងកាត់តាមចំណុចភូមិ៩៣ស្រុកម៉ាឡៃ កម្លាំងបានតាមប្រម៉ាញ់មុខសញ្ញា ដោយឃើញរថយន្តសង្ស័យបើកទៅទិសត្បូង ចូលទឹកដីខេត្តបាត់ដំបង ក៏សុំគោលការណ៍ថ្នាក់លើសហការជាមួយអាវុធហត្ថស្រុកសំពៅលូនខេត្ត បាត់ដំបងអោយជួយស្ទាក់ចាប់រហូតបានសម្រេចជាផ្លែផ្កាតែម្តង ។ រថយន្តដែលឃាត់បានម៉ាកហៃលិនដឺពណ៌ទឹកប្រាក់ពាក់ស្លាកលេខភ្នំពេញ 2Z7393 មានឈើគ្រញូង១៩សន្លឹក មានម្ចាស់ឈ្មោះ កែវ ចាន់ អាយុ៣២ឆ្នាំមានទីលំនៅស្រុកពញាឮ ខេត្តកណ្តាល ស្នាក់បណ្តោះអាសន្ននៅភូមិ៩៣ស្រុកម៉ាឡៃខេត្តបន្ទាយមានជ័យ។
ក្រោយឃាត់បាន យើងបានសុំយោបល់ព្រះរាជអាជ្ញាខេត្តបន្ទាយមានជ័យ កសាងសំណុំរឿងជនសង្ស័យ និងវត្ថុតាងបញ្ជូនទៅកាន់តុលាការខេត្តបន្ទាយមានជ័យ ចាត់ការតាមនិតិវិធី ៕
