(កំពត)៖ ប្រធានក្រុមការងារថ្នាក់កណ្តាលចុះមូលដ្ឋានក្រុងកំពតនិងជាបេក្ខជនតំណាងរាស្ត្រគណបក្សប្រជាជនកម្ពុជា សម្រាប់មណ្ឌលកំពត លោក សោម ចិន បានលើកឡើងថា«ដើម្បី បន្តថែរក្សាការពារសុខសន្តិភាពនិងការអភិវឌ្ឍប្រទេសជាតិឲ្យបានស្ថិតស្ថេរយូរអង្វែង និងកាន់តែរីកចម្រើនបន្តថែមទៀតពិតប្រាកដនោះ» សូមបងប្អូនប្រជាពលរដ្ឋ ទាំងអស់គ្នាត្រូវតែទៅចូលរួមបោះឆ្នោជូនគណបក្សប្រជាជនកម្ពុជា ដែលមានលេខរៀងទី២០រូបសញ្ញាទេវតាបាចផ្កាជាសម្គាល់នៅថ្ងៃទី២៩ខែកក្កដាឆ្នាំ២០១៨ខាងមុខនេះឲ្យបានគ្រប់ៗគ្នា។
លោក សោម ចិន បានលើកឡើងយ៉ាងដូច្នេះ នាឱកាសចុះយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៦ដែលបានធ្វើឡើង នៅក្នុងសង្កាត់ក្រាំងអំពិល ក្រុងកំពតខេត្តកំពត កាលពីព្រឹកថ្ងៃទី១៥ខែកក្កដា ឆ្នាំ២០១៨ នងក្រោមវត្តមានចូលរួមផងដែរពីសំណាក់អាជ្ញាធរមូលដ្ឋាននិងសមាជិក សមាជិកាគណបក្សប្រជាជនកម្ពុជា ប្រមាណជិត៤០០នាក់។
នៅក្នុងឱកាសនោះ លោកសោម ចិន ក៏បានលើកនូវសារ នយោបាយរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ដែលមានខ្លឹមសារផ្តោតសំខាន់លើសមិទ្ធផលធំៗ និងស្នាដៃដឹកនាំរយៈពេលជិត ៤០ឆ្នាំរបស់គណបក្សប្រជាជនកម្ពុជា ក្នុងការស្តារ និងអភិវឌ្ឍន៍ប្រទេសជាតិ ចេញពីគំនរផេះផង់នៃភ្លើងសង្គ្រាម រហូតទទួលបាននូវសុខសន្តិភាព និងវឌ្ឍនភាពសង្គម ព្រមទាំងកិត្តិនាមល្បីរន្ទឺនៅលើឆាកអន្តរជាតិ។
លោកក៏បានបន្តលើកឡើងទៀតថា៖គណបក្សប្រជាជនកម្ពុជា គឺជាគណបក្សចាស់ទុំខាងផ្នែកនយោបាយ និងមានប្រវត្តិក្នុងការតស៊ូរំដោះប្រទេសជាតិ ដឹកនាំកសាងជាតិជាយូរណាស់មកហើយ។ ចំណុចពិសេសទៅទៀតនោះថា៖ មានតែគណបក្សប្រជាជនកម្ពុជាតែមួយគត់ផ្ដាច់មុខគ្មានគណបក្សណាចូលរួមឡើយ ក្នុងការរំដោះប្រជាជននិងប្រទេសជាតិចេញពីរបបប្រល័យពូជសាសន៍ប៉ុលពតនៅឆ្នាំ១៩៧៩។គណបក្សប្រជាជនកម្ពុជាក៏ជាគណបក្សផ្ដាច់មុខក្នុងការនាំមកនូវគោលនយោបាយឈ្នះៗក្រោមការដឹកនាំក្នុងមាគា៌ដ៏ត្រឹមត្រូវរបស់សម្ដេចតេជោហ៊ុន សែន ដើម្បីជូនប្រទេសជាតិ និងប្រជាជន ហើយតែងតែរួមសុខរួមទុក្ខជាមួយប្រជាជនគ្រប់កាលៈទេសៈ មិនដែលរត់ចោលប្រជាជនម្ដងណាឡើុយហើយក៏គ្មានគណបក្សណាមកប្រៀបផ្ទឹមបានដែរក្នុងការថែរក្សានូវសុខសន្តិភាពបានយូរអង្វែងនិងការអភិវឌ្ឍ ប្រទេសជាតិមានការលូតលាស់រីកចម្រើនលើគ្រប់វិស័យធ្វើឲ្យជីវភាពប្រជាពលរដ្ឋយើងបច្ចុប្បន្ននេះកាន់តែធូរធារល្អប្រសើរឡើងពីមួយថ្ងៃទៅមួយថ្ងៃ។
លើសពីនេះ លោក សោម ចិនក៏បានថ្លែងអំណរគុណដល់សមាជិក-សមាជិកាទាំងអស់ ដែលកន្លងមក តែងជឿជាក់លើការដឹកនាំរបស់រាជរដ្ឋាភិបាល និងបានផ្តល់យុត្តិធម៌ជូនគណបក្សប្រជាជនកម្ពុជា។
លោក សោម ចិន ក៏បានអំពាវនាវដល់ប្រជាពលរដ្ឋ និងសមាជិក-សមាជិកាទាំងអស់ នាំគ្នាទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ គឺបោះឆ្នោតជូនគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា និងមានលេខរៀងទី២០ នៅលើសន្លឹកឆ្នោត ដើម្បីទទួលបានសម្តេចតេជោ ហ៊ុន សែន ធ្វើជានាយករដ្ឋមន្ត្រី សម្រាប់នីតិកាលទី៦ និងនីតិកាលបន្តបន្ទាប់ទៀត៕
សេង ណារិទ្ធ
