ប៉ោយប៉ែត ៖ កាលពីថ្ងៃទី២៥ ខែកក្កដា ឆ្នាំ២០១៥ ថ្មីៗនេះ ឯកឧត្តម នាយឧត្ដមសេនីយ៍ សុខ ផល អគ្គនាយកដ្ឋានអន្តោប្រវេសន៍ បានចុះសួរសុខទុក្ខដល់កងកម្លាំងក្នុងអង្គភាពនគរបាលច្រកទ្វារអន្តរជាតិ ប៉ោយប៉ែត ដែលកំពុងបំពេញការងារនៅច្រកទ្វារអន្តរជាតិប៉ោយប៉ែត ។
មានប្រសាសន៍ប្រាប់អ្នកសារព័ត៌មាន លោក ស៊ីម សំអាត បានឲ្យដឹងថា ដំណើរចុះសួរសុខទុក្ខរបស់ឯកឧត្តម នាយឧត្ដមសេនីយ៍ សុខ ផល ក្នុងឱកាសនេះ គឺក្នុងគោលបំណងពង្រឹងស្មារតីដល់កងកម្លាំងដើម្បីឲ្យមានជំហររឹងមាំថែមទៀតក្នុងការបំពេញការងារជូនប្រជាពលរដ្ឋ។ លោកបន្តថា អង្គភាពរបស់លោកគឺមានកម្លាំងសរុបចំនួន១០១នាក់ ដែលបានចែកចាយទីតាំងសម្រាប់បំពេញភារកិច្ចឈរជើងតាមគោលដៅគ្រប់ចំនួន ។
ឯកឧត្តម នាយឧត្ដមសេនីយ៍ អគ្គនាយកនគរបាលអន្តោប្រវេសន៍បានណែនាំថា មេប៉ុស្ដិ៍នីមួយៗ ត្រូវតែមានការប្រុងប្រយ័ត្នខ្ពស់បំផុត ដោយ ច្រកទ្វារអន្តរជាតិប៉ោយប៉ែតគឺជាច្រកដ៏សំខាន់ដែលទាមទារ ឲ្យប្រុងប្រយ័ត្នលើបញ្ហាសន្តិសុខសុវត្ថិភាព ត្រូវសហការជាមួយប្រជាពលរដ្ឋ ភ្ញៀវជាតិ និងអន្តរជាតិជាពិសេសត្រូវតែបំពេញបែបបទឆ្លងដែនជូនពួកគាត់ដោយ ខានមិនបាន។
លោក ក៏បានសំណូមពរឲ្យមានការពិចារណាឡើងវិញទាក់ទិនទៅនឹងការដាក់ ប៉ុស្តិ៍ត្រួតពិនិត្យនៅចំកណ្ដាលផ្លូវសាធារណៈនោះ ព្រោះវាជារឿងខុសច្បាប់ទាំងស្រុង ហើយលោកសុំឲ្យមេប៉ុស្ដិ៍ ដែលប្រចាំការនៅទីនេះ ឬនៅកន្លែងផ្សេងមេត្តាគិតគូរឡើង។
សូមបញ្ជាក់ដែរថា ក្នុងឱកាសចុះត្រួតពិនិត្យសភាពការណ៍និងសួរសុខទុក្ខនោះ ឯកឧត្តម នាយ ឧត្ដមសេនីយ៍ សុខ ផល ក៏បាននាំយកអំណោយមកចែកដល់អង្គភាពនគរបាលច្រកទ្វារអន្តរជាតិ ប៉ោយប៉ែត រួមមានទឹកប្រាក់ចំនួន ៥ លានរៀល អង្ករ ចំនួន ២តោន មី២កេសធំ ទឹកត្រី២០យួរ ទឹកស៊ីអ៊ីវ២០យួរ ប៊ីចេង២០គីឡូ ទឹកសុទ្ធ១០កេស ខ្ទឹមស២បេធំ ទៀតផង។
ពាក់ព័ន្ធនឹងការចូលសកម្មភាពនយោបាយផ្សេងៗ ឯកឧត្តម សុខ ផល បញ្ជាក់បន្ថែមថា ប៉ូលិសរបស់យើងអាចមានសិទ្ធិចូលរួមក្នុងឆាកនយោបាយបាន នៅក្រៅម៉ោងធ្វើការ តែហាមស្លៀកពាក់ឯកសណ្ឋាន៕
