កំពង់ឆ្នាំង ៖ បច្ចុប្បន្នគេសង្កេតឃើញថា បទល្មើសលបណរ៉ាវ និង លបលូ ក្រឡាញឹកជាច្រើនរយខ្សែ បានកើតឡើង ក្នុងភូមិសាស្ត្រ ភូមិផ្លូវទូក ឃុំផ្លូវទូក ស្រុកកំពង់លែង ខេត្តកំពង់ឆ្នាំង ដោយសម្ថកិច្ចជំនាញជលផលនិង មន្ត្រីពាក់ព័ន្ធ រួមទាំងអជ្ញាធរ មូលស្ថានបានបណ្តែតបណ្តោយអោយបទល្មើសទាំងនេះកើតឡើងយ៉ាងអនាធិបតេយ្យ ក្នុងដែន សមត្ថកិច្ចរបស់ខ្លួនបើទោះជាគេដឹងថា រដូវបិទនេសាទត្រីកំពុងតែ ពងកូនយ៉ាងណាក៏ដោយ ក៏ពួកគេនៅតែប្រព្រឹត្ត បទល្មើសទាំងនេះដដែលមិនមានការបង្ក្រាបពី សមត្ថកិច្ចមន្ត្រីជំនាញជលផលនិងមន្ត្រីពាក់ព័ន្ធសោះឡើយ។
ពាក់ព័ន្ធករណីខាងលើនេះ នាយសង្កាត់រដ្ឋបាលជលផលកំពង់លែង លោក ពុំ សុផល បានប្រាប់អ្នកសារព័ត៌មានយើងឱ្យដឹងកាលពីថ្ងៃទី២២ ខែកក្កដា ឆ្នាំ២០១៥ កន្លងទៅនេះ លោកទទួលស្គាល់ថា ពិតជាមានករណីបទល្មើសដូចខាងលើនេះមែន ហើយលោកអះអាងថានឹងសហការជាមួយនាយរងខណ្ឌរដ្ឋបាល ជលផលខេត្តកំពង់ឆ្នាំង ចាត់វិធានការចុះទៅបង្ក្រាប និងទប់ស្កាត់រាល់បទល្មើសនេសាទខុសច្បាប់ទាំងអស់នេះ ។
ប្រភពពីប្រជាពលរដ្ឋនៅតំបន់នោះបានប្រាប់អ្នកសារពត៌មានយើងថា បទល្មើស ទាំងនេះបានកើតឡើងតាំងពី រដូវបិទនេសាទដំបូង រហូតដល់បច្ចុប្បន្ន នេះនៅតាមមាត់ទន្លេ(វាលផុក)ត្រង់ចំណុច ព្រែកដូនខៀវ ចំណុចព្រែកសោកម៉ោក ព្រែកលួង ចុងព្រែកផ្លូវទូក ព្រែកគូរនិងចំណុចព្រែកដូនតី ស្ថិតក្នុងឃុំផ្លូវទូក ស្រុកកំពង់លែង ខេត្តកំពង់ឆ្នាំង ក្រុមបទល្មើសដាក់បិតជិតមាត់ព្រែកនិងវាលទំនាប មានប្រវែងចាប់ពី២០០ម៉ែតទៅ៥០០ម៉ែត បណ្តាលអោយស្ទះចរាចរណ៍ត្រីចេញចូលទៅរកកន្លែងពងកូនក្នុងព្រៃរនាម។
ប្រជាពលរដ្ឋលើកឡើងថា នៅក្នុងវេទិកាសាធារណៈនៅតាមបណ្តាសហគមន៍នេសាទបានផ្សព្វផ្សាយ ច្បាប់ស្តីពីជលផល តែងតែលើកឡើងពីការបញ្ឈប់ មិនអោយមានបទល្មើសនេសាទជាប្រភេទ ឧបករណ៍(សិប្បកម្ម)ដែលជាហេតុបណ្តាលអោយមច្ឆាជាតិរលាយហិនហោចទៅ ថ្ងៃអនាគត បើទោះជាយ៉ាងនេះក្តី ក៏ក្រុមជនល្មើស នៅតែបន្តសកម្មភាពប្រព្រឹត្តបទល្មើសជាដដែលៗ នាំអោយប្រជាពលរដ្ឋរិះគន់មន្ត្រីជំនាញរដ្ឋបាលជលផលនិងមន្ត្រី ពាក់ព័ន្ធមានអំពើពុករលួយជាប្រព័ន្ធ បានជាបណ្តែត បណ្តោយអោយមានបទល្មើសប្រភេទ ឧបករណ៍ (សិប្បកម្ម)កើតឡើង វាផ្ទុយទៅនឹងច្បាប់ស្តីពីជលផល។
មជ្ឈដ្ឋានទូទៅបានរិះគន់ទៅលើជំនាញជលផលថា ឃើញមានតែការសន្យាថ្ងៃនេះ ថ្ងៃនោះចុះទៅបង្ក្រាប ប៉ុន្តែ បទល្មើសនៅតែកើតមានយ៉ាងផុសផុល តែប្រសិនបើចុះទៅបង្ក្រាបឃើញតែបង្ក្រាបបានតែបទល្មើសតូចតាច ឬបទល្មើសណាដែលមិនទាន់ជូនកាដូដល់លោក សោម ភារុណ នាយខណ្ឌរដ្ឋបាលជលផលខេត្ត តែប៉ុណ្ណោះ ៕
ដោយ ៖ ទិត្យ អឿន
