ខេត្តប៉ៃលិន ៖ ប្រភពពីមន្ត្រីទេសចរណ៏ខេត្តម្នាក់ បានបង្ហើបប្រាប់អ្នកយកព័ត៌មានឲ្យដឹងថា៖ ក្នុងរយៈពេលនៃការគ្រប់គ្រង់របស់លោក ហុង ឌុល ប្រធានមន្ទីរទេសចរណ៏ខេត្ត ពុំដែលឃើញមានការរីកចំរើនអ្វីគួរឲ្យកាត់សម្គាល់នោះទេ ពិសេសលោកប្រធានរូបនេះ ក៏ពុំសូវគិតគូរពីការងារក្នុងមន្ទីរដែរ ព្រមទាំងឃុបឃិតឲ្យមានបក្ខពួកនិយម ប្រព្រឹត្តអំពើពុករលួយយ៉ាងស៊ីជម្រៅក្នុងមន្ទីរ ដែលធ្វើឲ្យរដ្ឋខាតបង់នូវថវិកាក្នុងមួយឆ្នាំៗរាប់សិបលានរៀល។
ប្រភពព័ត៌មានបន្តថា៖ លើសពីនេះទៅទៀត លោកប្រធានរូបនេះអាចនិងស៊ីឈ្មោះរបស់គេដើម្បីប្រព្រិត្ត នូវអំពើពុករលួយ ដោយខ្លួនលោកតែមួយ ប៉ុន្តែមុខងារពីរ និងមានឈ្មោះពីរ ដោយឈ្មោះទី១ គឺ ហុង ឌុល មានមុខងារជាប្រធានមន្ទីរទេសចរណ៏ខេត្តប៉ៃលិន និងទី២ ឈ្មោះ សូ កង មានមុខងារជានាយកប្រតិបត្តិសាខាកាកបាទក្រហមកម្ពុជាខេត្តប៉ៃលិន ។
ប្រភពព័ត៌មានដដែលបន្តថា៖ បើសង្កេតមើលនៅក្នុងមន្ទីរហាក់បីដូចជាពុំសូវមានមន្ត្រីមកធ្វើការងារនោះទេ សូម្បីតែការសំអាតទីធ្លាក្នុងមន្ទីរក៏ពុំមានដែរ តួយ៉ាងបញ្ហាស្មៅវិញសឹងតែដុះដល់បន្ទប់ធ្វើការទៀតផង មកពីប្រធានមន្ទីររូបនេះមិនអើពើ និងបក្ខពួកនិយម ព្រមទាំងបានកិបកេងប្រាក់សម្រាប់បែងចែកដល់មន្ត្រីនៅក្នុងមន្ទីរ ដែលបានមកពីវិស័យឧស្សាហកម្មទេសចរណ៍រាប់លានរៀលក្នុងមួយឆ្នាំៗ តើក្នុងច្បាប់មានដែរឬទេ នៅពេលមនុស្សម្នាក់មានឈ្មោះពីរ ហើយជាប្រធានមន្ទីរផងនោះ ?
ប្រភពព័ត៌មានបានបង្ហើបប្រាប់ទៀតថា៖ លើសពីនេះទៅទៀត ក៏មានការកិបកេងលើប្រាក់ចំណាយផ្សេងៗរបស់មន្ទីរផងដែរ ដូចជា ប្រាក់សម្រាប់ទិញសម្ភារៈរដ្ឋបាលប្រាក់បុណ្យជាតិ ប្រាក់ទទួលភ្ញៀវ ប្រាក់បេសកកម្ម ការចំណាយលើផ្នែកថែទាំ ព្រមទាំងការជួសជុល និងប្រាក់មួយចំនួនទៀតដែលការកិបកេងទាំងនេះក្នុងមួយឆ្នាំៗបាត់ប្រាក់រដ្ឋអស់រាប់សិបលានរៀល ។
ប្រភពបន្តថា៖ ចំពោះអ្នកដែលដឹងការពិតថា នូវអ្វីដែលប្រធានមន្ទីររូបនេះនិយាយគឺគ្មានអ្វីក្រៅលើកតំកើងខ្លួនថា ជាមន្ត្រីល្អ ប៉ុន្តែសំរាប់អ្នកដែលដឹងការពិត គឺប្រធានមន្ទីររូបនេះជាមន្ត្រីដែលពូកែស៊ី ហើយមិនសូវចេះធ្វើការទៀតផង ។ បើនិយាយពីសមិទ្ធផលក្នុងមន្ទីរវិញវាហាក់បីដូចជាពុំទទួលបានលទ្ធផលជាដំកំភួនអ្វីទេ ហើយលោកប្រធានមន្ទីររូបនេះ កន្លងមក តែងតែអួតអាងថា គាត់ជាមន្ត្រីស្អាតស្អំមិនចេះពុករលួយ ។
ពាក់ព័ន្ធបញ្ហានេះដែរ អ្នកយកព័ត៌មានពុំអាចទំនាក់ទំនងសុំការបំភ្លឺពីលោក ហុង ឌុល ប្រធានមន្ទីរទេសចរណ៏ខេត្តប៉ៃលិន តាមទូរសព្ទ័បានទេ ព្រោះទូរស័ព្ទមិនអាចទំនាក់ទំនងបាន ៕
