ខេត្តប៉ៃលិន ៖ ឯកឧត្តម អ៊ី ឈាន ប្រធានក្រុមការងារថ្នាក់ជាតិចុះមូលដ្ឋានខេត្តប៉ៃលិន បានលើកឡើងពីតម្លៃនៃនយោបាយ ឈ្នះ-ឈ្នះ របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានបញ្ចប់សង្គ្រាមផ្ទៃក្នុងទាំងស្រុងនៅប្រទេសកម្ពុជាកាលពីឆ្នាំ ១៩៩៨ ហើយគោលនយោបាយឈ្នះ-ឈ្នះ នេះហើយដែលបានបញ្ចប់សង្គ្រាម នឹងបានធ្វើការបង្រួបង្រួមជាតិឡើងវិញដោយជោគជ័យ ដែលផ្តោតលើចំណុចសំខាន់ៗចំនួន៣ដូចជា៖ ១- ធានាការពារអាយុជីវិតប្រជាពលរដ្ឋក្នុងពេលធ្វើសមាហរណកម្ម ២- រក្សាអាជីពនិងមុខរបរជូនប្រជាពលរដ្ឋឱ្យនៅដដែល និង៣- រក្សានូវកម្មសិទ្ធិ រួមទាំងទ្រព្យសម្បត្តិទាំងឡាយរបស់បងប្អូនប្រជាពលរដ្ឋដោយគ្មានការរឹបអូសហើយមានសិទ្ធិសេរីភាពឈរជើងរស់នៅនិងប្រកបការងារជាធម្មតានៅទីតាំងនោះ។ លក្ខខណ្ឌទាំង ៣នេះហើយដែលធ្វើឱ្យបងប្អូនប្រជាពលរដ្ឋចាកចេញពីក្រុមភាគីកម្ពុជាប្រជាធិបតេយ្យ មកចុះចូលធ្វើសមាហរណកម្មជាមួយជារាជរដ្ឋាភិបាលគ្រប់ទីកន្លែងទូទាំងប្រទេស ដែលធ្វើអោយប្រទេសជាតិយើងមានសុខសន្តិភាពមកទល់សព្វថ្ងៃ។
ឯកឧត្តមបានលើកឡើងដូនចេះ នៅរសៀលថ្ងៃទី៣១ ខែឧសភា ឆ្នាំ២០១៨ ក្នុងឱកាសអញ្ជើញសំណេះសំណាលជាមួយមន្ត្រីអប់រំ លោកគ្រូ អ្នកគ្រូទូទាំងខេត្តប៉ៃលិន ប្រមាណជាង ៨០០នាក់ នៅសាលប្រជុំរោងកុនចាស់។ នៅក្នុងឱកាសនោះដែរក៏មានការអញ្ជើញចូលរួមពីសំណាក់លោក កើត សុធា ទីប្រឹក្សារាជរដ្ឋាភិបាល លោក ឡី ចាន់ឆាយ ប្រធានក្រុមប្រឹក្សាខេត្ត និងឯកឧត្តម ផាន់ ចាន់ធុល អភិបាល នៃគណៈអភិបាលខេត្តប៉ៃលិន ព្រមទាំងថ្នាក់ដឹកខេត្ត និងលោក លោកស្រី ប្រធាន អនុប្រធានមន្ទីរអង្គភាពជំនាញជុំវិញខេត្តជាច្រើននាក់ផងដែរ។
ប្រធានក្រុមការងារថ្នាក់ជាតិចុះមូលដ្ឋានខេត្តប៉ៃលិន បានមានប្រសាសន៍នៅក្នុងជំនួបសំណេះសំណាលនាឱកាសនោះថា សម្ដេចតេជោនាយករដ្ឋមន្ត្រី ហ៊ុន សែន បានបង្ហាញពីការយកចិត្តទុកដាក់ដ៏ខ្ពង់ខ្ពស់ ចំពោះលោកគ្រូ អ្នកគ្រូ ព្រមទាំងមន្ត្រី និងបុគ្គលិកអប់រំទាំងអស់ដែលបានយកចិត្តទុកដាក់ខិតខំបំពេញការងារប្រកបដោយជោគជ័យក្នុងការជំរុញកំណែទម្រង់ប្រព័ន្ធអប់រំដើម្បីឱ្យកាន់តែមានគុណភាពប្រសើរឡើង។
ឯកឧត្តម អ៊ី ឈាន បានមានប្រសាសន៍ថ្លែងអំណរគុណដល់បងប្អូនប្រជាពលរដ្ឋទាំងអស់ និងសមាជិក សមាជិការក្នុងវិស័យអប់រំដែលបានចូលរួមថែរក្សាសន្តិភាពរហូតមក ដើម្បីកម្ពុជាមានឱកាសអភិវឌ្ឍន៍ប្រទេសឱ្យមានការរីកចម្រើនជាបន្តបន្ទាប់ ហើយបងប្អូនប្រជាពលរដ្ឋតែងតែបានបោះឆ្នោតគាំទ្រគណបក្សប្រជាជនរហូតមក។
ឯកឧត្តម អ៊ី ឈាន ក៌បានមានប្រសាសន៍បញ្ជាក់ថា សម្ដេចអគ្គមហាសេបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានដឹកនាំប្រទេសជាតិ ឆ្លងកាត់ដំណាក់កាលលំបាកៗជាច្រើន ជាពិសេសដំណាក់កាលគ្រប់គ្រងរដ្ឋាភិបាលខ្វះសាច់ប្រាក់ តែឥឡូវនេះគឺមន្ត្រីរាជការរបស់យើងទទួលបានប្រាក់បៀវត្សន៍តាមធនាគារហើយ ហើយភាគច្រើនគឺបើកនៅសប្ដាហ៍ទី៣ នៃខែនីមួយៗបានទៀងទាត់ ដោយនៅឆ្នាំ២០១៨ នេះ ប្រាក់ខែគ្រូបង្រៀនគឺមិនតិចជាង ១លានរៀលនោះទេ ហើយនៅមានតម្លើងប្រាក់ខែជាបន្តបន្ទាប់ទៀតជារៀងរាល់ឆ្នាំ។
នៅក្នុងឱកាសនោះ ឯកឧត្តម អ៊ី ឈាន ក៏មានប្រសាសន៍បានអំពាវនាវដល់លោកគ្រូ អ្នកគ្រូ និងមន្ត្រីអប់រំ ដែលជាសមាជិក សមាជិការបស់គណបក្សប្រជាជនកម្ពុជាទាំងអស់ គឺត្រូវចូលរួមទាំងអស់គ្នាក្នុងចំនុច ៤សំខាន់ រួមមាន៖ ១- ខិតខំរក្សានូវសន្តិភាព ស្ថិរភាពនយោបាយ និងម៉ាក្រូសេដ្ឋកិច្ចឱ្យខានតែបាន ២- បន្តចូលរួមក្នុងដំណើរការកំណែទម្រង់លើវិស័យអប់រំទាំងអស់គ្នាដើម្បីធ្វើឱ្យវិស័យនេះកាន់តែរីកចម្រើនថែមទៀត ៣- បន្តលើកកម្ពស់សមត្ថភាពគ្រូបង្រៀនទន្ទឹមនឹងការលើកកម្ពស់ជីវភាពគ្រូបង្រៀនតាមរយៈកំណែទ្រង់ហិរញ្ញវត្ថុ គឺការតំឡើងប្រាក់បៀវត្សន៍ជូនដល់មន្ត្រីរាជការ ៤- ចំពោះលោកគ្រូ អ្នកគ្រូ និងមន្ត្រីអប់រំទាំងអស់ដែលជាសមាជិក សមាជិការគណបក្ស គឺត្រូវរួមគ្នាគាំទ្រ និងបោះឆ្នោតជូនគណបក្សប្រជាជនកម្ពុជា អោយបានគ្រប់ៗគ្នាដើម្បីធានាដល់ការងាររបស់ខ្លួន និងដើម្បីធានាសន្តិភាព និងការអភវិឌ្ឍន៍។
សូមបញ្ជាក់ថា នៅក្នុងពិធីសំណេះសំណាលនាឱកាសនោះ ឯកឧត្តម អ៊ី ឈាន បាននាំយកសៀវភៅអប់រំទូន្មានរបស់ភិរម្យអ៊ូ (ក្រម ង៉ុយ) និងបណ្ឌិត អ៊ូ ចុង ដែលជាអំណោយរបស់លោកនាយករដ្ឋមន្ត្រី ហ៊ុន សែន មកចែកជូនលោកគ្រូ អ្នកគ្រូ ចំនួន ៨៧៩នាក់ ដោយគ្រូម្នាក់ទទួលបាន សៀវភៅចំនួន ២ក្បាល រួមនឹងថវិកា ចំនួន ៥ម៉ឺនរៀលផងដែរ៕
ហុក វិបុល
