ខេត្តរតនគិរី ៖ អគ្គិភ័យឆាប់ឆេះយ៉ាងសន្ធោសន្ធៅ លំនៅដ្ឋានមន្ត្រីប៉េអឹមខេត្តរតនគិរី ដែលមានទីតាំងខាងក្រោយផ្សារបានលុង ស្ថិតក្នុងភូមិជ័យជំនៈ សង្កាត់ឡាបានសៀក ក្រុងបានលុង បង្កការភ្ញាក់ផ្អើលពេញផ្សារក្រុងបានលុង។
ហេតុការណ៍នេះបានកើតឡើងកាលពីវេលាម៉ោង៩និង៤៥នាទី ថ្ងៃទី២៧ ខែមិថុនា ឆ្នាំ២០១៥ បើតាមសេចក្តីរាយការណ៍ពីអាជីវករលក់ដូរនៅផ្សារបានលុងជំហ៊ានដំបូងបណ្តាលមកពីទុសេចន្តរអគ្គីសនី ផ្តើមចេញពីផ្ទះមន្ត្រីប៉េអឹមឈ្មោះទុយ គឹមហួន ដែលផ្ទះសង់អំពីឈើលើថ្មក្រោមប្រក់ស័ង្កសី ទំហំទទឹង៨ម៉ែត្រ បណ្តោយ១៣ម៉ែត្រ។
ត្រូវគេឃើញថាក្នុងពេលកើតហេតុប្រហែលជា២០នាទីគេឃើញរថយន្តមួយគ្រឿងជំហ៊ានដំបូងប៉ុន្តែប្រើការមិនកើត ប្រហែលជា២០នាទីទើបរថយន្តមួយគ្រឿងទៀតមកដល់ ហើយមានការយឺតយ៉ាវដោយកកស្ទះចរាចរណ៍ណែនតាន់តាប់មនុស្សម្នាចោមរោមហេតុការណ៍នោះ ដោយមានការអន្តរាគមន៍ពីសមត្ថកិច្ច ទើបរថយន្តពន្លត់អគ្គីភ័យបានមកដល់កន្លែងកើតហេតុបាញ់ទឹកពន្លត់ទាន់ពេលវេលា បណ្តាលឲ្យផ្ទះពីរល្វែងសងខាងទទួលរងនូវការឆាប់ឆេះរោលផ្សែងប៉ុណ្ណោះ មិនបណ្តាលឲ្យឆាប់ឆេះធ្ងន់ធ្ងរនោះទេ។
ប្រភពពីកន្លែងកើតហេតុពេលភ្លើងកំពុងឆាប់ឆេះដំបូងមានសន្ទុះឡើងយ៉ាងខ្លាំងធ្វើឲ្យម្ចាស់ផ្ទះឈ្មោះទុយ គឹមហួន ភេទប្រុស ជាមន្ត្រីប៉េអឹមមានការតក់ស្លុតរហូតសន្លប់ទាំងពីរនាក់ប្តីប្រពន្ធ ទើបអ្នកជិតខាងទូរស័ព្ទហៅរថយន្តសង្គ្រោះបញ្ជូនទៅមន្ទីរពេទ្យបង្អែកខេត្តក្នុងពេលកើតហេតុ។
បន្ទាប់ពីមានហេតុការណ៍ភ្លើងកំពុងឆេះគេសង្កេតឃើញមានការជញ្ជូនចេញជំលៀសសុទ្ធសឹងតែជាគ្រឿងសង្ហារឹមខ្នាតយក្ខប្រភេទឈើប្រណិត និងមិនទាន់កែច្នៃមួយចំនួនដឹកតាមរថយន្តជាបន្តបន្ទាប់ ។ ហើយប្រជាពលរដ្ឋដែលមានផ្ទះល្វែងជាប់ៗគ្នានៅកន្លែងដែលកំពុងឆេះក៏មមាលញឹកក្នុងការជញ្ជូនសម្ភារៈទ្រព្យសម្បត្តិរៀងៗខ្លួនចេញពីក្នុងផ្ទះដាក់តាមដងផ្លូវ។ យ៉ាងណាក៏ដោយក្នុងហេតុការណ៍អគ្គិភ័យឆាប់ឆេះលំនៅដ្ឋានមួយនេះពុំទាន់បានដឹងចំនួនខូចខាតសម្ភារៈ ទ្រព្យសម្បត្តិពិតប្រាកដនៅឡើយទេ ។
សូមបញ្ជាក់ថា ទីតាំងដែលអគ្គីភ័យកំពុងឆាប់ឆេះនេះគឺធ្លាប់ទទួលរងការឆាប់ឆេះក្បែរបរិវេណផ្ទះជាប់ៗគ្នានេះចំនួន ៣ លើកមកហើយក៏បណ្តាលឲ្យស្ត្រីចំណាស់ម្នាក់ស្លាប់នៅក្នុងភ្លើងឆេះនោះទៀតផង កាលពីប៉ុន្មានឆ្នាំកន្លងទៅ បូករួមទាំងករណីនេះទៀត ។ ហើយក្នុងខែមិថុនានេះ ក៏មានអគ្គីភ័យលាបត្របាក់លំនៅដ្ឋានចំនួន២លើកមកដែរ លើកទីមួយកើតឡើងនៅផ្ទះលក់សំឡរចាណាង (តាមភាសារបស់ជនជាតិដើមភាគតិចឡាវធ្លាប់ហៅ)ឈ្មោះ ថន ធុន ភេទប្រុស អាយុ៥៧ឆ្នាំ ជាមន្ត្រីយោធាតំបន់ប្រតិបការសឹករងខេត្ត ដែលបានកើតឡើងនៅថ្ងៃទី២២ ខែមិថុនា ឆ្នាំ២០១៥ ហើយលើកទី២កើតឡើងនៅថ្ងៃទី២៧ ខែមិថុនា ឆ្នាំ២០១៥ ផ្ទះរបស់មន្ត្រីកងរាជអាវុធហត្ថខេត្តឈ្មោះទុយ គឹមហួន ដែលនៅជាប់ខាងត្បូងផ្សារបានលុង ស្ថិតនៅភូមិជ័យជំនៈ សង្កាត់ឡាបានសៀក ក្រុងបានលុង នេះតែម្តង។
គួរបញ្ជាក់ផងដែរថា នៅក្នុងហេតុការណ៍អគ្គិភ័យឆាបឆេះនេះ មានរថយន្តពន្លត់អគ្គិភ័យចំនួន២គ្រឿង និងសមត្ថកិច្ចគ្រប់លំដាប់ចុះមកជួយធ្វើអន្តរាគមន៍នឹងធ្វើកំណត់ហេតុដើម្បីដោះស្រាយតាមស្ថានភាពជាក់ស្តែងនេះ៕
សន ចាន់ឌី
