ខេត្តប៉ៃលិន ៖ បើតាមសម្តីពីក្រុមអ្នកលេងល្បែងបញ្ជល់មួយចំនួនបានអះអាងកាលពីព្រឹកថ្ងៃទី២១ ខែមិថុនា ឆ្នាំ២០១៥នេះថា គេបានជួលដីរបស់លោកឧត្តមសេនីយ៍ត្រី ជា ចាន់ឌិនស្នងការនគរបាលខេត្តប៉ៃលិន ដើម្បីបើកកន្លែងលេងល្បែងមួយនេះ ហើយក៏មានច្បាប់ទម្លាប់ ចេញពីកាស៊ីណូម្កុដព្រជរួចរាល់អស់ហើយ ដោយស្ថិតនៅក្នុងផែស្ងួត ដែលទើបនឹងសាងសង់ថ្មីរបស់លោក ឡោ ស៊ុនជាង ក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោកឧត្តម សេនីយ៍ត្រី ជា ចាន់ឌិន ស្នងការនគរបាលខេត្ត ធ្លាប់មានប្រសាសន៍ឱ្យដឹងតាមទូរស័ព្ទថា លោកពិតជាបានជួលដីនៅត្រង់ចំណុចខាងលើ ដែលជាដីកម្មសិទ្ធផ្ទាល់របស់លោកឲ្យមានការបើកសង្វៀបបញ្ជល់មាន់(កីឡាបក្សី) ប្រាកដមែន តែរឿងជល់មាន់ និងការជួលដីនេះ ពុំមានការអ្វីពាក់ព័ន្ធនឹងគ្នានោះឡើយ ។
សូមបញ្ជាក់ថា ចំពោះបញ្ហាខាងលើដែរ កន្លងទៅអ្នកបើកសង្វៀនបញ្ជល់មាន់ដ៏ថ្មីសន្លាងនេះ ធ្លាប់បានឆ្លើយឡើងថា សង្វៀនបញ្ជល់មាន់នេះ ស្ថិតនៅក្រោមអាជ្ញាប័ណ្ណរបស់កាស៊ីណូម្កុដពេជ្រ របស់លោក ឡោ ស៊ុនជាង ជាម្ចាស់កាស៊ីណូ ។ ប៉ុន្តែទោះបីជាយ៉ាងណាក៏ដោយលោក ឧញ៉ា ជា គា ដែលជាម្ចាស់កាស៊ីណូម្កុដពេជ្រពិតប្រាកដនោះ បានប្រាប់ឱ្យដឹងដែរថា កាស៊ីណូម្កុដពេជ្រ និងសង្វៀនជល់មាន់នោះមានទីតាំងស្ថិតនៅខុសគ្នាឆ្ងាយប្រហែល២ទៅ៣គីឡូម៉ែត្រពីគ្នាឯណោះ ពោគឺកាស៊ីណូលោកស្ថិតនៅភូមិផ្សារព្រំ ឃុំស្ទឹងកាច់ ចំណែកកន្លែ ងជល់មាន់ស្ថិតនៅភូមិអូររអិល មិនមានការអ្វីពាក់ព័ន្ធជាមួយកាស៊ីណូរបស់លោកឡើយ ហើយកាស៊ីណូរបស់លោកអនុញ្ញាតិឱ្យតែជនបរទេសចូលលេងប៉ុណ្ណោះ ចំណែកជនជាតិខ្មែរមិនឱ្យចូលលេងនោះឡើយ ។
ប្រជាពលរដ្ឋជាច្រើននាក់រស់នៅក្នុងខេត្តប៉ៃលិន បានធ្វើការរិះគន់ស្នងការនគរបាលខេត្តប៉ៃលិនថា មិនគួរអនុញ្ញាតិឱ្យមានការបើកល្បែងលេងនៅក្នុងដីរបស់ខ្លួនឡើយ សូម្បីតែដីរបស់អ្នកផ្សេងក៏ដោយ គួរតែចាត់វិធានការបង្ក្រាបរាល់ល្បែងស៊ីសងគ្រប់ប្រភេទ ព្រោះល្បែងទាំងនោះតែងនាំមកនូវសេចក្តីហិនវិនាសទ្រព្យសម្បត្តិ ប៉ះពាល់ដល់សន្តិសុខសង្គម នាំឱ្យកើតមានអំពើហិង្សាក្នុងគ្រួសារ ការលួចប្លន់កាប់សម្លាប់ និងអសន្តិសុខគ្រប់បែបយ៉ាងផងដែរ ។
សូមបញ្ជាក់ថា ចាប់តាំងពីសារព័ត៌មានចុះផ្សាយពាក់ព័ន្ធទៅនឹងបញ្ហាល្បែងបញ្ជល់មា ន់កាលពីប៉ុន្មានថ្ងៃកន្លងទៅ ការលេងត្រូវបានគេផ្អាកមួយរយៈពេលសិន ដោយកំពុងចចាររត់ ច្បាប់ទៅថ្នាក់លើ ហើយប្រហែលខាងមុខឆាប់ៗនេះ គេនឹងចាប់ផ្តើមលេងបន្តទៀត ។ ចាំមើលថាតើល្បែងមាន់ជល់ដ៏ធំមួយនេះ ត្រូវខាងច្បាប់ សមត្ថកិច្ច បិទឬបើកឱ្យបន្តលេងបែបនេះថែមទៀត ខណៈរដ្ឋាភិបាលកំពុងតែពង្រឹងច្បាប់ភូមិឃុំមានសុវត្ថិភាពទាំង៩ចំណុច ដើម្បីរក្សាសុវត្ថិភាពជូនប្រជាពលរដ្ឋគ្រប់រូប ៕
នីយ៉ា
