ខេត្តក្រចេះ ៖ កាលពីវេលាម៉ោង ៩ និង៣០នាទី ថ្ងៃទី ១៩ ខែមិថុនា ឆ្នាំ២០១៥ នៅក្នុងភូមិរោងចក្រ ឃុំស្នួល ខេត្តក្រចេះ ត្រូវបានសមត្ថកិច្ចជំនាញ ដែលមានកងរាជអាវុធហត្ថខេត្ត និងរដ្ឋបាលព្រៃឈើស្រុកស្នួល និងរដ្ឋបាលព្រៃឈើឆ្លូង បានសហការគ្នាចុះបង្ក្រាប និងចាប់រឹបអូស បានរថយន្តម៉ាកសាំងយ៉ុង មួយគ្រឿង ដែលដឹក ជន្លង់ម្រេចចំនួនជិត ២០០ដើម។
ដោយឡែក មុននឹងមានការចាប់រថយន្តខាងលើនេះ គេឃើញរថយន្តសាំងយ៉ុងមួយគ្រឿង កំពុងតែដឹក ជន្លង់ម្រេច ចេញពីតំបន់ស្រែស្រូវ ស្រុកសំបូរ ខេត្តក្រចេះ បម្រុងបើកចូលទៅកាន់ស្រុកមេមត់ ។ លុះពេលរថយន្ត ដឹកជន្លង់ម្រេចនោះ បើកមកដល់កន្លែងកើតហេតុខាងលើ ទើបសមត្ថកិច្ចជំនាញស្ទាក់ចាប់បាន ។
លោកនាយសង្កាត់រដ្ឋបាលព្រៃឈើស្នួល បានឱ្យដឹងថា ឈ្មួញបានដឹកជន្លង់ម្រេចចេញពីស្រែស្បូវ ស្រុកសំបូរ ខេត្តក្រចេះ ឆ្លងកាត់ស្រុកស្នួល ឆ្ពោះទៅស្រុកមេមត់ ខេត្តត្បូងឃ្មុំ ប៉ុន្តែរថយន្តនោះបើកមិនទាន់ដល់គោលដៅផង ក៏ត្រូវកម្លាំងរបស់លោកសហការជាមួយកម្លាំងអាវុធហត្ថខេត្តបង្ក្រាបតែម្តង ។ ទោះបីជាយ៉ាងណាសមត្ថកិច្ចចាប់ មិនបានអ្នកបើកបរនោះទេ ពីព្រោះគេបានរត់គេចខ្លួនបាត់ចោលរថយន្ត និងជន្លង់ម្រេចជិត ២០០ដើម ទេបិសមត្ថកិច្ច ដកហូតយកមកចាត់ការតាមច្បាប់ ។ ក្រោយពេលកើតហេតុ រថយន្ត និងជន្លង់ម្រេច ត្រូវបានយក មករក្សាទុកនៅសង្កាត់រដ្ឋបាលព្រៃឈើស្នួល ដើម្បីរង់ចាំម្ចាស់រថយន្តចូលខ្លួនដើម្បីដោះស្រាយតាមផ្លូវច្បាប់ ។/
