ខេត្តកែប៖ ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានណែនាំដល់ ប៉ុស្ដិ៍នគរបាលរដ្ឋបាលទាំងអស់ នៅទូទាំងខេត្តកែប ត្រូវយកចិត្តទុកដាក់គ្រប់គ្រង និងក្ដាប់ឲ្យបានច្បាស់លាស់នូវមុខសញ្ញាលក់ និងចែកចាយគ្រឿងញៀន ជាពិសេសអ្នកដែលពាក់ព័ន្ធ និងអ្នកចំណូលស្រុកមកស្នាក់នៅបណ្ដោះអាសន្ន ឬប្រកបមុខរបរផ្សេងៗ នៅក្នុងមូលដ្ឋានរបស់ខ្លួន និងត្រូវបង្ក្រាបឲ្យបានទាន់ពេលវេលា។
ឯកឧត្តមបណ្ឌិតប្រកាសណែនាំដូចនេះ ក្នុងទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ឆ្នាំ២០២៣ ក្រោមប្រធានបទ ” អ្វីៗដេីម្បីប្រជាជនជាចម្បង បញ្ឈប់ការរេីសអេីង និងការមាក់ងាយអ្នកញៀនគ្រឿងញៀន ពង្រឹងការអប់រំបង្ការ ” នារសៀលថ្ងៃទី២១ ខែសីហា ឆ្នាំ២០២៣ នៅសាលប្រជុំស្តង់ដារសាលាខេត្តកែប ដែលមានសមាសភាពចូលរួមពីអ្នកពាក់ព័ន្ធប្រមាណជាង៤០០នាក់។
ឯកឧត្តមបណ្ឌិត សោម ពិសិដ្ឋ មានប្រសាសន៍ថា ការប្រារព្វទិវាអន្តជាតិប្រយុទ្ធប្រឆាំងគ្រឿងញៀន ក្នុងគោលបំណងដើម្បីបន្តពង្រឹង និងលើកកម្ពស់ការងារប្រយុទ្ធប្រឆាំងគ្រឿងញៀនឲ្យកាន់តែមានប្រសិទ្ធភាពខ្ពស់ស្របទៅនឹងបរិបទរបស់ពិភពលោក។
ក្រៅពីណែនាំទៅកាន់អង្គភាពជំនាញក្នុងការគ្រប់គ្រង និងក្តាប់នូវមុខសញ្ញាចែកចាយគ្រឿងញៀន នៅក្នុងខេត្ត សំដៅកាត់ផ្តាច់ការជួញដូរ ឯកឧត្តមបណ្ឌិត បន្តជំរុញពង្រឹងសមត្ថភាព គុណភាព និងប្រសិទ្ធភាព នៃយន្តការបន្សាបគ្រឿងញៀននៅតាមមណ្ឌលសុខភាព និងមន្ទីរពេទ្យដែលមានស្រាប់ នៅក្នុងខេត្តឲ្យមានដំណើរការល្អ និងកាន់តែមានប្រសិទ្ធភាព ធ្វើយ៉ាងណាឲ្យជនរងគ្រោះដោយសារសារធាតុញៀន ទទួលបានសេវាបន្សាបគ្រឿងញៀន និងស្ដារនីតិសម្បទាឡើងវិញ ។
ឯកឧត្តមបណ្ឌិតក៏ក្រើនរំលឹក ឲ្យប្អូនៗសិស្សនុសិស្ស និងអ្នកដែលមានការពាក់ព័ន្ធជាមួយការជួញដូរគ្រឿងញៀន ការប្រើប្រាស់ (បើមាន)ត្រូវបញ្ឈប់ជាបន្ទាន់ បើមិនដូច្នោះទេត្រូវអនុវត្តតាមនីតិវិធីច្បាប់៕ សេង ណារិទ្ធ
