នៅព្រឹកថ្ងៃចន្ទ ទី២១ ខែសីហា ឆ្នាំ២០២៣ លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង បានដឹកនាំកិច្ចប្រជុំបូកសរុបសភាពការណ៍បហរចាំខែកក្កដា លើកទិសដៅខែសីហា ឆ្នាំ ២០២៣ និងពង្រឹងការងារបទល្មើសព្រហ្មទណ្ឌ ការងារសន្តិសុខរបស់ស្នងការដ្ឋាន។
ក្នុងកិច្ចប្រជុំនេះ មានការចូលរួមពីលោក លោកស្រីស្នងការរង លោកអនុប្រធានផែន លោកនាយ នាយងការិយាល័យជំនាញ លោកមេបញ្ជាការវរសេនាតូចនគរបាលការពារព្រំដែនគោក និងលោកអធិការនគរបាលក្រុង ស្រុក សរុបចំនួន៩០នាក់។
នាឱកាសនោះ លោកឧត្តមសេនីយ៍ទោ សាត គឹមសាន បានកត់សម្គាល់ឃើញថា ក្នុងខែកន្លងទៅ បានលេចឡើងនូវបញ្ហាបទល្មើសមួយចំនួនក្នុងមូលដ្ឋាន ពិសេសករណីបង្កហិង្សាដោយក្រុមក្មេងបង្កអាណាធិបតេយ្យ ដែលតម្រូវឱ្យមន្ត្រីនគរបាលគប្បីបន្តពង្រឹងលើការងារបង្ការបង្ក្រាបឱ្យកាន់តែមានប្រសិទ្ធិភាពបន្ថែមទៀត។
ជាមួយគ្នានោះ លោកឧត្តមសេនីយ៍ទោស្នងការបានគូសបញ្ជាក់ថា ក្រៅពីនោះការងារបង្ក្រាបបទល្មើសនេសាទខុសច្បាប់ក៏ជាបញ្ហាដ៏ស្រួចស្រាវមួយក្នុងរដូវវស្សានេះ ដែលជនល្មេីសតែងតែប្រើប្រាស់គ្រប់រូបភាពក្នុងការប្រព្រឹត្តិអំពើល្មើសច្បាប់ ដែលសមត្ថកិច្ចក្នុងផែនជំនាញ និងអធិការនគរបាលស្រុកពាក់ព័ន្ធត្រូវមានវិធានការបង្ក្រាបដោយគ្មានការលេីកលែងនោះទេ៕
