ឯកឧត្តមកត្តិសេដ្ឋាបណ្ឌិត ចម ប្រសិទ្ធ ចុះពិនិត្យស្ថានភាពជំនន់ទឹកភ្លៀងនៅខេត្តកែប និងយកគ្រឿងចក្រកាយកផ្លូវទឹកបន្ថែមទៀត
ខេត្តកែប៖ ឯកឧត្តមកត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី និងជាបេក្ខជនពេញសិទ្ធតំណាងរាស្រ្តមណ្ឌលកែប អមដំណើរដោយឯកឧត្តមបណ្ឌិត សោម ពិសិដ្ឋ អភិបាលខេត្តកែប បានដឹកនាំក្រុមការងារចុះត្រួតពិនិត្យ ស្ថានភាពទឹក វាយតម្លៃផលប៉ះពាល់ដោយសារជំនន់ទឹកភ្លៀង និងកាយរំដោះមុខទឹកតាមទីតាំងមួយចំនួនក្នុងភូមិសាស្រ្តខេត្តកែប នៅព្រឹកថ្ងៃទី០១ ខែសីហា ឆ្នាំ២០២៣។ ក្នុងនោះនៅភូមិសាស្រ្តស្រុកដំណាក់ចង្អើរ គ្រឿងចក្របានចុះកាយបើកផ្លូវរំដោះជំនន់ទឹកភ្លៀងស្ថិតនៅព្រុំប្រទល់ភូមិអង្កោល និងភូមិអំពេងក្នុងឃុំអង្កោល រួចរាល់ហើយដែរ។
យោងរបាយការណ៍របស់រដ្ឋបាលខេត្តកែប បានអោយដឹងថា ចាប់ពីថ្ងៃទី២៦ ខែកក្កដា រហូតដល់ថ្ងៃទី៣០ ខែកក្កដា ឆ្នាំ២០២៣ មានភ្លៀងធ្លាក់ខ្លាំងជាមួយផ្គររន្ទះ ខ្យល់កន្រ្តាក់បណ្តាលឲ្យមានទឹកជំនន់ធ្លាក់ចូលអាងទំនប់មេ គ្រប់អាងទំនប់រង ព្រមទាំងដីស្រែចំការប្រជាពលរដ្ឋជាច្រើនហិកតា និងជន់លិចតំបន់មួយចំនួននៃកំណាត់ផ្លូវជាតិលេខ៣៣ ផ្លូវ៣៣អា ផ្លូវ១៣៣២ ផ្លូវ១៣៣៥ ព្រមទាំងផ្លូវសំខាន់ៗមួយចំនួនទៀត ក្នុងភូមិសាស្រ្តក្រុងស្រុកទាំង២នៃខេត្តកែប។
របាយការណ៍បន្តថា ក្រុងកែបប៉ះពាល់លំនៅឋានទូទាំងក្រុងចំនួន២,២១៩ខ្នងផ្ទះ ខូចខាតផ្លូវលំ៧ខ្សែ ស្មើនឹង៥,០០០ម៉ែត្រ អំបិលខូចខាត ១,៥០០តោន និងប៉ះពាល់ដំណាំ១២០ហិកតា។ ស្រុកចំណាក់ចង្អើរ ប៉ះពាល់លំនៅឋានចំនួន ៤៧៩គ្រួសារ ស្មើនឹង៤៦៥ខ្នងផ្ទះ ប៉ះពាល់ដំណាំ ៥៨៨ហិកតា ក្នុងនោះទឹកហូរច្រោះប៉ះពាល់ផ្លូវលំចំនួន១៦ខ្សែផងដែរ៕ សេង ណារិទ្ធ
