កំពត ៖ សិក្ខាសាលាចែករំលែកចំណេះដឹង និងបទពិសោធន៍ ក្រោមប្រធានបទស្តីពី”អភិបាលកិច្ចមូលដ្ឋាននៅប្រទេសជប៉ុន” ត្រូវបានរៀបចំឡើងនៅព្រឹកថ្ងៃទី១៣ខែមីនា ឆ្នាំ២០១៨ ក្នុងសណ្ឋាគារមិត្តភាព ខេត្តកំពត ដែលរៀបចំឡើងដោយJICAប្រចាំកម្ពុជា ក្រោមវត្តមានលោក សូ មុន្នីរក្សា ប្រធាននាយកដ្ឋានបណ្តុះបណ្តាល ក្រសួងមហាផ្ទៃ លោក ស៊ុក សារ៉ាដ អភិបាលរង នៃគណៈអភិបាលខេត្តកំពត និងលោក ភោគ ភារ៉ា មន្ត្រីកម្មវិធីទទួលបន្ទុកកម្មវិធីអភិបាលកិច្ច នៃការិយាល័យJica ប្រចាំកម្ពុជា។
ថ្លែងក្នុងឱកាសបើកសិក្ខាសាលានេះ លោក ស៊ុក សារ៉ាដ បានឲ្យដឹងថា ផ្តើមចេញពីគោលនយោបាយយុទ្ធសាស្ត្រចតុកោណដំណាក់កាលទី៣ របស់រដ្ឋាភិបាលកម្ពុជា នីតិកាលទី៥ នៃរដ្ឋសភា រដ្ឋបាលខេត្តកំពត ក៏ដូចជាក្រសួងមហាផ្ទៃ បានយកចិត្តទុកដាក់ពង្រឹងនិងអនុវត្តក្នុងស្មារតីប្រុងប្រយ័ត្ននិងទទួលខុសត្រូវខ្ពស់នូវ “អភិបាលកិច្ចល្អ”ដែលជាស្នូលដ៏សំខាន់នៃយុទ្ធសាស្ត្រចតុកោណដំណាក់កាលទី៣ របស់រដ្ឋាភិបាលកម្ពុជា នៅតែជាស្នូលនិងជាចំណុចសំខាន់នៃយុតិ្តធម៌សង្គម និងការអភិវឌ្ឍសង្គមសេដ្ឋកិច្ចប្រកបដោយចីរភាព និងសមធម៌ ដែលមានគោលការណ៍ចំនួន៩ចំណុច រួមមាន៖ ១.ការចូលរួម ២.នីរិរដ្ឋ ៣.តម្លាភាព ៤.ការព្រមព្រៀង-ឯកភាពគ្នា ៥.សមធម៌ ៦.ប្រសិទ្ធភាព និងភាពស័ក្តិសិទ្ធិ ៧.គណនេយ្យភាព ៨ការឆ្លើយតប ៩.ចក្ខុវិស័យជាយុទ្ធសាស្ត្រ។លោកអភិបាលរងខេត្ត បានបញ្ជាក់ទៀតថា ជាមួយនេះ រដ្ឋបាលខេត្តយល់ឃើញថា ដើម្បីបន្តពង្រឹងអភិបាលកិច្ចល្អ ពិសេសនៅមូលដ្ឋានផ្ទាល់ឲ្យកាន់តែប្រសើរថែមទៀតនោះ យើងត្រូវពង្រឹងអនុវត្តនូវគោលការណ៍នៃអភិបាលកិច្ចល្អទាំង៩ចំណុចខាងលើឲ្យមានប្រសិទ្ធភាព និងខិតខំអនុវត្តនូវគោលនយោបាយរបស់ថ្នាក់ជាតិដែលបានដាក់ជូន ពិសេសរាជរដ្ឋាភិបាលកម្ពុជាដែលកំពុងបន្តអនុវត្តការកែទម្រង់ដោយឥតរាថយក្នុងវិស័យសំខាន់ៗរួមមាន៖ ការប្រយុទ្ធប្រឆាំងនឹងអពើពុករលួយ ការកែទម្រង់រដ្ឋបាលសាធារណៈ និងពង្រឹងគុណភាព នៃសេវាសាធារណៈឲ្យកាន់តែប្រសើរឡើង ដើម្បីបង្កើនជំនឿទុកចិត្ត និងឆ្លើយតបទៅនឹងសេចក្តីត្រូវការនិងបំណងប្រាថ្នារបស់ប្រជាជន ព្រមទាំងសហគមន៍ធុរកិច្ច។
លោក សូ មុន្នីរក្សា បានបញ្ជាក់ ដោយកត់សម្គាល់ថា កំណែទម្រង់រដ្ឋបាលសាធារណៈ មានការដ្ឋានកែទម្រង់បីដែលរាជរដ្ឋាភិបាលកម្ពុជា ចាត់ទុកកំណែទម្រង់អាទិភាព និងជាកំណែទម្រង់ស្នូលដែលធានា និងគាំទ្រដល់ភាពជោគជ័យនៃការអនុវត្តកំណែទម្រង់ដទៃទៀតនោះគឺ (១)កំណែទម្រង់រដ្ឋបាលសាធារណៈ (២)កំណែទម្រង់ការគ្រប់គ្រងហិរញ្ញវត្តុសាធារណៈ និង(៣)កំណែទម្រង់ការអភិវឌ្ឍតាមបែបប្រជាធិបេតយ្យនៅថ្នាក់ក្រោមជាតិ ឬហៅថាកំណែទម្រង់វិមជ្ឈការ និងវិសហមជ្ឈការ ។
កណែទម្រង់ទាំងបីនេះ ជាកំណែទម្រង់ដែលមានលក្ខណៈប្រទាក់ក្រឡាគ្នានិងត្រូវបំពេញឲ្យគ្នាទៅវិញទៅមកនៅក្នុងការអនុវត្ត។ហេតុនេះ ការខកខានឬការបរាជ័យក្នុងការអនុវត្តកំណែទម្រង់ណាមួយនឹងធ្វើឲ្យប៉ះពាល់ដល់ដំណើរការ ក៏ដូចជាគោលដៅនៃការអនុវត្តកំណែទម្រង់ផ្សេងទៀត ។
លោកបានគូសបញ្ជាក់ទៀតថា កំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ បានចាប់ផ្តើមនៅថ្នាក់ឃុំ សង្កាត់ ក្នុងឆ្នាំ២០០២ និងបានពង្រីកទៅដល់គ្រប់ថ្នាក់ នៃរដ្ឋបាលថ្នាក់ក្រោមជាតិ ពោលគឺនៅថ្នាក់រាជធានី ខេត្ត ក្រុង ស្រុក ខណ្ឌ នៅឆ្នាំ២០០៩ ហើយកំណែទម្រង់នេះ ជាកំណែទម្រង់មានចរិតជានយោបាយផង និងរដ្ឋបាលផង។ក្នុងរយៈពេលប្រមាណ១៥ឆ្នាំ នៃការអនុវត្តកំណែទម្រង់នេះ រាជរដ្ឋាភិបាលកម្ពុជាទទួលបានសមិទ្ធផលជាច្រើន។
លើផ្នែកនយោបាយកំណែទម្រង់បានរៀបចំឲ្យមានរដ្ឋបាលរាជធានី ខេត្ត ក្រុង ស្រុក ខណ្ឌ និងឃុំ សង្កាត់ជានីតិបុគ្គលដែលមានក្រុមប្រឹក្សាជាតំណាងកើតឡើងពីការបោះឆ្នោតដោយផ្ទាល់ និងមិនផ្ទាល់ ហើយរហូតមកទល់ពេលនេះ រាជរដ្ឋាភិបាលកម្ពុជាបានរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ ចំនួន៤លើក និងបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ចំនួន២លើកផងដែរ៕
សេង ណារិទ្ធ
