កម្ពុជាអភិវឌ្ឍន៍១៨០ដឺក្រេ មិនដូចការនិយាយរបស់ក្រុមមួយចំនួននៅក្រៅប្រទេសតែងបង្កាច់បង្ខូចកម្ពុជាឡើយ
បន្ទាយមានជ័យ ៖ លោកតាម៉ក់ ហ៊ុន អនីតិជនខ្មែរអាមេរិកដែលមានប្រជាប្រិយភាពក្នុងបណ្តាញសង្គមហ្វេសបុកបានលើកឡើងថា ប្រទេសកម្ពុជាអភិវឌ្ឍន៍១៨០ដឺក្រេ មិនដូចការនិយាយរបស់ក្រុមមួយចំនួននៅក្រៅប្រទេសដែលតែងនិយាយអាក្រក់ពីកម្ពុជាឡើយ។
លោកតាម៉ក់ ហ៊ុន បានលើកឡើងដូចនេះក្នុងឱកាសដំណើរទស្សនកិច្ចនៅកម្ពុជាលើកទីពីរនិងនៅពេលចុះជួបប្រជាពលរដ្ឋនៅក្រុងសិរីសោភ័ណនិងក្រុងប៉ោយប៉ែតនៃទីតាំងដែលលោកធ្លាប់រស់នៅពីមុនសម័យខ្មែរក្រហមនិងសម័យខ្មែរក្រហម កាលពីថ្ងៃទី១៨ ខែកក្កដា ឆ្នាំ២០២៣ដោយមានការចូលរួមពីលោកអ៊ុំ រាត្រី ប្រធានគណបក្សប្រជាជនខេត្តបន្ទាយមានជ័យនិងជាអភិបាលខេត្តបន្ទាយមានជ័យ ព្រមទាំងមានការចូលរួមពីលោកអភិបាលក្រុងប៉ោយប៉ែតនិងក្រុងសិរីសោភ័ណ។
លោកតាម៉ក់ ហ៊ុន ក្នុងឱកាសសំណេះសំណាលជាមួយពលរដ្ឋខេត្តបន្ទាយមានជ័យបានលើកឡើងទៀតថា រូបលោកនិងភរិយារួមនឹងក្រុមការងារពីអាមេរិកជាង២០នាក់ មកកម្ពុជាជាលើកទីពីរ គឺដើម្បីមកបោះឆ្នោតក្នុងនាមពលរដ្ឋខ្មែរដើម្បីប្រទេសកម្ពុជារីកចម្រើន និង សន្តិភាពបន្តទៀតក្រោមការដឹកនាំរបស់សម្តេចតេជោហ៊ុន សែន។
ដូចនេះក្នុងនាមជាខ្មែរដូចគ្នា. ដែលលោកធ្លាប់ឆ្លងកាត់ជាច្រើនជំនាន់និងធ្លាប់រស់នៅកម្ពុជាមុននឹងពេលសម័យខ្មែរក្រហម គឺពីមុនកម្ពុជាមានតែសង្គ្រាមមិនមានអ្វីៗដូចបច្ចុប្បន្ននេះនោះទេ គឺកម្ពុជាមានសន្តិភាពមានការអភិវឌ្ឍន៍ មានផ្លូវថ្នល់ សាលារៀន មន្ទីរពេទ្យ រោងចក្រ ភ្លើងទឹកដល់តំបន់ដាច់ស្រយាលនិយាយរួមគ្រាន់តែគាត់មកលើកទីមួយចុងឆ្នាំ២០២២និងលើកទីពីរនេះមានភាពរីកចម្រើនខុសគ្នាច្រើន។
ដើម្បីឱ្យប្រទេសមានការរីកចម្រើនទៅមុខទៀត សូមបងប្អូនប្រជាពលរដ្ឋកុំជឿតាមការញុះញង់របស់ក្រុមមួយចំនួនតូចនៅក្រៅប្រទេស ដែលតែងបង្កាច់បង្ខូចកម្ពុជាប្រាប់បងប្អូននៅក្រៅប្រទេសទាំងមិនពិត គឺបងប្អូនត្រូវដឹងដោយខ្លួនឯង ដែលរស់នៅផ្ទាល់ថា ប្រទេសយើងអភិវឌ្ឍន៍អ្វីខ្លះ បងប្អូនរស់នៅដោយសុខសប្បាយមានការងារធ្វើ តើដោយសារអ្វី ចឹងត្រូវតែទៅបោះឆ្នោតជូនគណបក្សណា ដែលនៅជិតបងប្អូននិងនៅបម្រើបងប្អូននោះទើបសន្លឹកឆ្នោតមានតម្លៃ។
លោកតាម៉ក់ ហ៊ុន ការមកទស្សនកិច្ចនៅកម្ពុជាជាពិសេសនៅខេត្តបន្ទាយមានជ័យកាន់តែឱ្យលោកដឹងច្បាស់ពីការអភិវឌ្ឍន៍នៅកម្ពុជា និង តម្លៃនៃសន្តិភាពដែលកម្ពុជាកំពុងមាននាពេលបច្ចុប្បន្ន៕
