អនុវត្តតាមអនុសាសន៍ដ៏ខ្ពង់ខ្ពស់សម្ដេចតេជោ ហ៊ុន សែន! ឯកឧត្ដម ឃួង ស្រេង និងឯកឧត្ដម ហេង សួរ បានដឹកនាំកិច្ចប្រជុំស្ដីពីការរៀបចំមធ្យោបាយដឹកជញ្ជូន កម្មករនិយោជិត និងបងប្អូនប្រជាពលរដ្ឋទៅមកតាមបណ្តាខេត្ត ក្នុងអំឡុងពេលបោះឆ្នោតជ្រើសតាំងតំណាងរាស្ត្រ
(ភ្នំពេញ)៖ អនុវត្តតាមអនុសាសន៍ដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នារសៀលថ្ងៃអង្គារ ០១កើត ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែកក្កដា ឆ្នាំ២០២៣ ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ និងឯកឧត្ដម ហេង សួរ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំកិច្ចប្រជុំស្ដីពីការរៀបចំមធ្យោបាយដឹកជញ្ជូន ដើម្បីសម្រួលដល់ការធ្វើដំណើររបស់កម្មករនិយោជិត និងបងប្អូនប្រជាពលរដ្ឋទៅមកតាមបណ្តាខេត្ត ក្នុងអំឡុងពេលបោះឆ្នោតជ្រើសតាំងតំណាងរាស្ត្រ នីតិកាលទី៧ ខាងមុខនេះ។
