សម្ដេច ស ខេង សរសើរសហភាពសហជីពរក្សាសិទ្ធិកម្មករកម្ពុជា ចំពោះការខិតខំ ដោះស្រាយ និងសម្រាលបន្ទុកកម្មករ
សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា បានកោតសរសើរ និងថ្លែងអំណរគុណដល់សហភាពសហជីពរក្សាសិទ្ធិកម្មករកម្ពុជា (CWPUC) ចំពោះការខិតខំប្រឹងប្រែង ដោះស្រាយ និងសម្រាលបន្ទុកបញ្ហាផ្សេងៗ របស់កម្មករ កម្មការិនី ស្របតាមគោលនយោបាយរបស់គណបក្សប្រជាជនកម្ពុជា និងរាជរដ្ឋាភិបាល។
ការកោតសរសើរ និងថ្លែងអំណរគុណនេះ ខណៈ សម្ដេចក្រឡាហោម ស ខេង អញ្ជើញចុះជួបសំណេះសំណាលជាមួយសមាជិក សមាជិកា នៃសហភាពសហជីពរក្សាសិទ្ធិកម្មករកម្ពុជា (CWPUC) នៅឯវិមាន ៧ មករា ទីស្នាក់ការកណ្ដាលគណបក្សប្រជាជនកម្ពុជា (គ.៨៥) នាថ្ងៃទី ១៨ ខែកក្កដា ឆ្នាំ ២០២៣នេះ។
សម្ដេច ស ខេង បានមានប្រសាសន៍កោតសរសើរ និងថ្លែងអំណរគុណដល់ CWPUC ចំពោះការខិតខំប្រឹងប្រែងរួមចំណែកដោះស្រាយ និងសម្រាលបន្ទុកបញ្ហាផ្សេងៗរបស់កម្មករ កម្មការិនី ស្របតាមគោលនយោបាយរបស់គណបក្សប្រជាជនកម្ពុជា និងរាជរដ្ឋាភិបាល។
ជាមួយគ្នានេះ សម្ដេចក្រឡាហោម ស ខេង ក៏បានថ្លែងអំណរគុណដល់ថ្នាក់ដឹកនាំ និង សមាជិក សមាជិកា នៃសហភាពសហជីពរក្សាសិទ្ធិកម្មករកម្ពុជា ដែលរួមចំណែកពង្រឹង និងបង្កើនកម្លាំងគាំទ្រគណបក្សប្រជាជនកម្ពុជា ជាពិសេសក្នុងចំណោមកម្មករ កម្មការិនី និងក្រុមអ្នកប្រកបរបរសេដ្ឋកិច្ចក្រៅប្រព័ន្ធ ដើម្បីបន្តបុព្វហេតុ នៃការរក្សាសុខសន្តិភាព និងការអភិវឌ្ឍសេដ្ឋកិច្ច និងសង្គម។ ក្នុងនោះ សម្ដេចក្រឡាហោម លើកទឹកចិត្ត CWPUC ឲ្យបន្តកិច្ចខិតខំប្រឹងប្រែងធ្វើឲ្យសម្រេចបានតាមទិសដៅការងាររបស់ខ្លួន និងធ្វើសកម្មភាពស្របទៅតាមច្បាប់ ស្ដីពី សហជីព។
នៅក្នុងឱកាសនោះដែរ សម្ដេច ស ខេង ក៏បានជំរុញប្រជាពលរដ្ឋអញ្ជើញទៅបោះឆ្នោត និងចូលរួមសកម្មភាពឲ្យស្របតាមច្បាប់ បទបញ្ជា និងនីតិវិធី នៃការបោះឆ្នោតផងដែរ។
សូមជម្រាបថា លទ្ធផលការងារចូលរួមក្នុងចលនាគាំទ្រគណបក្សប្រជាជនកម្ពុជា ការសម្របសម្រួលវិវាទ ការគាំទ្រដល់កម្មករ កម្មការិនី ក្នុងនោះចាប់ពីខែមករា ដល់ខែកក្កដា នេះ CWPUC បានចាត់តាំងផ្នែកនីមួយៗ ចុះសួរសុខទុក្ខ ផ្ដល់អំណោយជូនសមាជិក សមាជិកា ជួបការលំបាក សរុបចំនួន ១២០ នាក់ ដោយចំណាយថវិកាសរុបប្រមាណ ៦០ លានរៀល៕
