លោកសន្តិបណ្ឌិត សុខ ផល ជួបសំណេះសំណាលក្រុមការងារយុវជនបក្ស និងក្រុមចលនាស្ត្រីជាង៤០០នាក់ និងផ្សព្វផ្សាយពីកម្មវិធីនយោបាយ និងបង្រៀនគូសសន្លឹកឆ្នោតដល់សមាជិកបក្សនៅស្រុកបាណន់
(បាត់ដំបង)៖ លោកសន្តិបណ្ឌិត សុខ ផល ប្រធានក្រុមការងាររាជរដ្ឋាភិបាលចុះជួយស្រុកបាណន់ ខេត្តបាត់ដំបង បានជួបសំណេះសំណាលជាមួយក្រុមការងារយុវជនគណបក្ស និងក្រុមចលនាស្ត្រីនៅស្រុកបាណន់ ចំនួន៤៥៦នាក់ និងបន្តចុះផ្សព្វផ្សាយពីកម្មវិធីនយោបាយ និងបង្រៀនគូសសន្លឹកឆ្នោតដល់សមាជិកបក្សនៅស្រុកបាណន់។
ពិធីនេះបានធ្វើឡើងនាថ្ងៃទី៩ ខែកក្កដា ឆ្នាំ២០២៣ ដោយមានការអញ្ជើញចូលរួមពីសំណាក់កក្រុមការងារចុះមូលដ្ឋានស្រុកបាណន់ ដោយបានត្រួតពិនិត្យអំពីសកម្មភាព, លទ្ធផលការងារ, បញ្ហាប្រឈម និងសំណូមពររបស់មូលដ្ឋាន ក្នុងការចុះធ្វេីយុទ្ធនាការឃោសនារកសំឡេងឆ្នោតរយៈពេល១សប្ដាហ៍កន្លងមក។
នាឱកាសនោះដែរ លោកសន្តិបណ្ឌិត សុខ ផល ក៏បានបន្តចុះជួបសមាជិក សមាជិកាគណបក្ស និងប្រជាពលរដ្ឋតាមខ្នងផ្ទះដើម្បីឃោសនានិងបង្រៀនគូសសន្លឹកឆ្នោតឱ្យបានត្រឹមត្រូវជូនគណបក្សប្រជាជនកម្ពុជា ដែលមានលេខរៀងទី១៨ នៅចុងសន្លឹកឆ្នោត។
លោកសន្តិបណ្ឌិត សុខ ផល ក៏លើកទឹកចិត្ត និងជំរុញឱ្យក្រុមការងារយុវជន និងចលនាស្ត្រីគ្រប់ថ្នាក់បន្តចូលរួមក្នុងយុទ្ធនាការឃោសនាបោះឆ្នោតឱ្យកាន់តែសកម្មថែមទៀត។ ព្រមទាំងបន្តយកចិត្តទុកដាក់គ្រប់គ្រងថែទាំសមាជិកឱ្យបានច្បាស់លាស់ និងជាប់ជាប្រចាំ ពិសេសបន្តទំនាក់ទំនងជាមួយសមាជិកចំណាកស្រុកដេីម្បីឱ្យពួកគាត់មកចូលរួមបោះឆ្នោត។
លោកសន្តិបណ្ឌិត សុខ ផល ក៏បានអំពាវនាវឱ្យប្រជាពលរដ្ឋ សូមអញ្ជើញទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់ៗគ្នា ជាពិសេស គឺត្រូវបោះឆ្នោតជូនគណបក្សប្រជាជនកម្ពុជា ដែលមានរូបសញ្ញា «ទេវតាបាចផ្កា» ដែលមានលេខរៀងទី១៨ ក្នុងសន្លឹកឆ្នោត និងបានអំពាវនាវដល់ប្រជាពលរដ្ឋដែលមានសិទ្ធិបោះឆ្នោត ត្រូវគូសលើសន្លឹកឆ្នោតឱ្យបានត្រឹមត្រូវ ដើម្បីរក្សាតម្លៃនៃសន្លឹកឆ្នោតស្របតាមទិសស្លោកសន្លឹកឆ្នោត មួយសន្លឹក ជាការគាំទ្រគណបក្សប្រជាជនមួយសំឡេង និងបានចូលរួមចំណែកក្នុងការអភិវឌ្ឍប្រទេសជាតិបន្តទៀត៕
