លោកបណ្ឌិត ហ៊ុន ម៉ាណែត ផ្តល់អំពូលសឡា១៧៦ដើម ជូនបងប្អូនប្រជាពលរដ្ឋ ក្នុងសង្កាត់វិហារលួង ក្រុងសួង ខេត្តត្បូងឃ្មុំ
(ត្បូងឃ្មុំ)៖ នាថ្ងៃទី២៩ ខែមិថុនា ឆ្នាំ២០២៣ មានពិធីប្រគល់-ទទួលអំពូលភ្លើងសឡា ចំនួន១៧៦ដើម គិតជាទឹកប្រាក់ ២៣ ៩៣៦ដុល្លារ ជូនប្រជាពលរដ្ឋភូមិប្រស្រែក្រោម ភូមិវាលចារ ភូមិក្រឆាន ភូមិប្រស្រែលើ ភូមិកៀនរូង និងភូមិថ្នល់ថ្មី ក្នុងសង្កាត់វិហារលួង ក្រុងសួង ក្រោមអធិបតីភាពលោក ថេង ច័ន្ទសង្វារ អនុប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ។
ប្រជាពលរដ្ឋ សូមគោរពថ្លែងអំណរគុណយ៉ាងជ្រាលជ្រៅ ចំពោះលោកបណ្ឌិត ហ៊ុន ម៉ាណែត បេក្ខជនគណបក្សប្រជាជនកម្ពុជា លេខរៀងទី១ តំណាងរាស្ត្រមណ្ឌលរាជធានីភ្នំពេញ ដែលបានឧបត្ថម្ភអំពូលភ្លើងសូឡា ដ៏មានគុណភាព សម្រាប់ដាក់បំភ្លឺ តាមដងផ្លូវសាធារណៈ ដើម្បីសុវត្ថិភាព និងបង្កលក្ខណៈងាយស្រួលដល់ប្រជាពលរដ្ឋដែលរស់នៅតាមដងផ្លូវ ក៏ដូចជាអ្នកធ្វើដំណើរ។ ការប្រើអំពូលសឡា ជាការប្រើប្រាស់ថាមពលស្អាត មានលក្ខណៈសន្សំសំចៃ ចំណេញថវិកាដល់សហគមន៍។
លោក ថេង ច័ន្ទសង្វារ បានរំលឹកប្រជាពលរដ្ឋ ឱ្យទៅចូលរួមបោះឆ្នោតនិងបោះឆ្នោត ជូនគណបក្សប្រជាជនកម្ពុជាឱ្យបានកុះករដើម្បីបន្តរក្សាសន្តិភាព ស្ថិរភាពនយោបាយ និងការអភិវឌ្ឍ។
អង្គពិធីទាំងមូល បានប្រកាសគាំទ្រសម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រី សម្រាប់ការបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា និងគាំទ្រលោកបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រី សម្រាប់ពេលអនាគត៕
