ផ្លូវយុទ្ធសាស្ត្រក្រវាត់ព្រំដែនកម្ពុជា-ថៃ ក្នុងស្រុកជាំក្សាន្ត ខេត្តព្រះវិហារ ប្រវែងជិត១៤គីឡូម៉ែត្រ ត្រូវបាន ជួសជុលឡើងវិញ
(ព្រះវិហារ)៖ កំណាត់ផ្លូវលេខ២៦២៧ ជាផ្លូវក្រវាត់ព្រំដែនកម្ពុជា-ថៃ ប្រវែងជិត១៤គីឡូម៉ែត្រ ស្ថិតក្នុងភូមិសាស្រ្តឃុំស្រអែម ស្រុកជាំក្សាន្ត ខេត្តព្រះវិហារ ត្រូវបានក្រុមការងារថែទាំផ្លូវថ្នល់ នៃមន្ទីរសាធារណការ និងដឹកជញ្ជូនខេត្តព្រះវិហារ ធ្វើការជួសជុល ថែទាំឡើងវិញ ដើម្បីសម្រួលដល់ការធ្វើដំណើរ និងដឹកជញ្ជូនកសិផលរបស់ប្រជាពលរដ្ឋមានភាពងាយស្រួល។
លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានឱ្យដឹង នៅព្រឹកថ្ងៃទី១៤ខែឧសភាឆ្នាំ២០២៣នេះថា កំណាត់ផ្លូវលេខ២៦២៧ ដែលជាផ្លូវក្រវាត់ព្រំដែននេះ មានសារៈសំខាន់ខ្លាំងណាស់ ក្រៅពីប្រជាពលរដ្ឋធ្វើដំណើរ និងដឹកជញ្ជូនកសិលផលទៅកាន់ទីផ្សារកំណាត់ផ្លូវនេះក៏ប្រើប្រាស់សម្រាប់ជាផ្លូវយុទ្ធសាស្ត្ររបស់កងទ័ពផងដែរ។ហើយកំណាត់ផ្លូវដែលខូចខាតនេះមានប្រវែង១៣.៨០គីឡូម៉ែត្រ ត្រូវបានជួសជុលថែទាំឡើងវិញ ដោយធ្វើការកៀរសម្រួល ស្រោចទឹក កិនបង្ហាប់។
លោក សំ លាងទ្រី បានថ្លែងថា ដោយអនុវត្តតាមការណែនាំពីលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន និងលោក គីម រិទ្ធី អភិបាលខេត្តព្រះវិហារ មន្ទីរសាធារណការ និងដឹកជញ្ជូនខេត្ត បានយកចិត្តទុកដាក់ជួសជុល ថែទាំផ្លូវថ្នល់ ដែលគ្រប់គ្រងដោយមន្ទីរ មិនឱ្យមានគ្រលុក សំបុកមាន់ ដើម្បីសម្រួលដល់ការធ្វើដំណើររបស់ប្រជាពលរដ្ឋ។
លោក សំ លាងទ្រី បានថ្លែងនូវការអរគុណដល់ប្រជាពលរដ្ឋ ដែលបានរាយការណ៍ពីបញ្ហាផ្លូវខូចតាមរយៈផេកហ្វេកប៊ុកផ្លូវការរបស់មន្ទីរ ដែលជាហេតុធ្វើឱ្យមន្ទីរបានដឹងនឹងចុះទៅពិនិត្យជួសជុលបានទាន់ពេលវេលា។
លោកក៏អំពាវនាវដល់ប្រជាពលរដ្ឋត្រូវចូលរួមថែរក្សាផ្លូវថ្នល់ទាំងអស់គ្នា ប្រយោជន៍ឱ្យការប្រើប្រាស់បានយូអង្វែង ដោយបញ្ឈប់ការដឹកជញ្ជូនលើសទម្ងន់កំណត់ កុំយកចិញ្ចើមផ្លូវធ្វើអាជីវកម្ម កុំចាក់ដីខ្ពស់ស់ជាងផ្លូវ ពិសេសរាល់ពេលបើកបរសូមចូលរួមគោរពច្បាប់ ស្តីពីចរាចរណ៍ផ្លូវគោកទាំងអស់គ្នា៕ដោយ លឹម សាវុធ
