នាយឧត្តមសេនីយ៍ ម៉ឹង សំផន នាំយកអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប្រគល់ជូនសាខាកាកបាទក្រហមកម្ពុជា ស្រុកចន្ទ្រា ខេត្តស្វាយរៀង

(ស្វាយរៀង)៖ នាយឧត្តមសេនីយ៍ ម៉ឹង សំផន រដ្ឋមន្ត្រីប្រតិភូអមនាយករដ្ឋមន្រ្តី រដ្ឋលេខាធិការក្រសួងការពារជាតិ អនុប្រធានក្រុមការងាររាជរដ្ឋាភិបាល ចុះមូលដ្ឋានខេត្តស្វាយរៀង និងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកចន្រ្ទា ខេត្តស្វាយរៀង និងលោកស្រី ព្រមទាំងមានការចូលរួមពីចៅស្រី របស់សម្តេចតេជោ នៅព្រឹកថ្ងៃទី២៨ ខែមេសា ឆ្នាំ២០២៣នេះ បាននាំយកអំណោយកាកបាទក្រហមប្រចាំឆ្នាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ប្រគល់ជូនសាខាកាកក្រហមកម្ពុជាស្រុកចន្ទ្រា ស្វាយរៀង។

អំណោយទាំងនោះរួមមាន៖ អង្ករ ១០តោន, ត្រីខ ១០០យួរ, មី ១០០កេស, ទឹកស៊ីអ៉វ ១០០យួរ, ទឹកត្រី ១០យួរ, កៅស៊ូតង់១០, ធុងទឹក១០, ប្រេង ១០០០លីត្រ និងថវិកា ១០លានរៀល ដែលសរុបថវិកាទាំងអស់មានចំនួន ៥,៦០៤,០០០រៀល។

នាយឧត្តមសេនីយ៍ ម៉ឹង សំផន បានបញ្ជាក់ថា ជារៀងរាល់ឆ្នាំក្រុមការងាររាជរដ្ឋាភិបាល ចុះមូលដ្ឋានស្រុកចន្រ្ទា ខេត្តស្វាយរៀង តែងតែបាននាំយកអំណោយកាកបាទក្រហមរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រគល់ជូនដល់សាខាកាកបាតក្រហមស្រុកចន្ទ្រា ខេត្តស្វាយរៀង ទុកសម្រាប់ផ្តល់ជូនប្រជាពលរដ្ឋដែលជួបការលំបាក ឬជួបគ្រោះធម្មជាតិផ្សេងៗ ដែលបានកើតឡើងជាយកថាហេតុ។

ឆ្លៀតក្នុងឱកាសនោះដែរ នាយឧត្តមសេនីយ៍ ម៉ឹង សំផន និងលោកស្រីក៏បានបន្តចុះសំណេះសំណាលជាមួយលោកគ្រូ អ្នកគ្រូ សិស្សានុសិស្ស នៅអនុវិទ្យាល័យ ផន សែន ទេពធី ស្ថិតនៅក្នុងឃុំសំរោង ស្រុកចន្រ្ទា ខេត្តស្វាយរៀង និងបាននាំយកអំណោយសម្តេចតេជោ និងសម្តេចព្រឹទ្ធបណ្ឌិត ចែកជូនដល់សិស្សានុសិស្ស អាណាព្យាបាលសិស្ស ព្រមទាំងលោកគ្រូ អ្នកគ្រូ រួមមាន៖ ចែកជូនដល់លោកគ្រូ អ្នកគ្រូម្នាក់ៗទទួលបាន ៥០,០០០រៀល សិស្សានុសិស្សម្នាក់ៗ ២០,០០០រៀល និងប្រគល់ជូននូវកាបូប និងសម្ភារសិក្សាផងដែរ៕