អភិបាលរងខេត្តកំពង់ស្ពឺ៖ ការរើសកងកម្លាំងបច្ចុប្បន្ន គឺដើម្បីថែរក្សាសន្តិសុខ និងសណ្តាប់ធ្នាប់ ជាពិសេសបេសកម្មការពារសន្តិភាពដែលមានស្រាប់

(កំពង់ស្ពឺ)៖ អភិបាលរងខេត្តកំពង់ស្ពឺលោកស្រី ឡុង បូណារេត បានលើកឡើងថា យុវជនបន្តវេន ត្រូវមានភារកិច្ចថែទាំ និងទទួលខុសត្រូវចំពោះជោគវាសនាអនាគតប្រទេសជាតិ តាមរយៈការយកចិត្តទុកដាក់អភិវឌ្ឍសមត្ថភាព បន្តខិតខំបន្ថែមលើការហ្វឹកហាត់ រៀនសូត្រឱ្យអស់លទ្ធភាព ដើម្បីចូលរួមចំណែកជាមួយរាជរដ្ឋាភិបាលកម្ពុជា ហើយតាមរយៈការខិតខំរៀនសូត្រនេះនឹងក្លាយជាគំរូល្អ និងដំណើរជោគជ័យរបស់ថ្នាក់ដឹកនាំទាំងការគិត និងការអនុវត្តការងារនាពេលអនាគត។

ការលើកឡើងនេះគ្រាដែលលោកស្រី ជួបសំណេះសំណាលជូនដំណើរយោធិនអាវុធហត្ថជាប់ថ្មីប្រមាណ៤០នាក់ នៃទីបញ្ជាការកងរាជអាវុធហត្ថខេត្តកំពង់ស្ពឺ ទៅកាន់សាលាហ្វឹកហ្វឺនភ្នំជុំរីករាយថ្ងៃទី១៩ ខែមេសា ឆ្នាំ២០២៣។

លោកស្រីអភិបាលរង បានគូសបញ្ជាក់ថា ពលរដ្ឋមានសិទ្ធិក្នុងការចូលរួមបម្រើការងារជាមន្ត្រីរាជការ កងកម្លាំងប្រដាប់អាវុធ ហើយមន្ត្រីរាជការម្នាក់ឬកងកម្លាំងម្នាក់ត្រូវបានដើរតួនាទីជាមន្ត្រីក្របខ័ណ្ឌដ៏ល្អ ក្នុងកិច្ចការបម្រើជាតិ និងប្រជាពលរដ្ឋ។

ដោយឡែកក្មួយៗ ដែលត្រូវបានជាប់ក្នុងក្របខ័ណ្ឌថ្មីនៃកងរាជអាវុធហត្ថខេត្ត គឺមានភារកិច្ចជាប់ខ្លួនចាំបាច់ ហើយក្រោយពីវិលត្រឡប់ហ្វឹកហាត់វិញត្រូវមានតួនាទីសំខាន់ក្នុងការបម្រើប្រទេសជាតិនិងប្រជាពលរដ្ឋ ពិសេសនៅក្នុងដែនដីរដ្ឋបាលរបស់ខេត្តកំពង់ស្ពឺ។

លោកស្រី ឡុង បូណារេត បានគូសរំលេចថា «កាលពីសម័យប្រទេសយើងមានសង្គ្រាម យើងរួមកម្លាំងសរុបដើម្បីដណ្តើមយកភាពជោគជ័យ តែពេលនេះប្រទេសយើងមានសុខសន្តិភាពពេញលេញហើយ ដូច្នេះយើងត្រូវចេះរស់នៅ ជាមួយសន្តិភាពការពារស្ថិរភាព រក្សាសេចក្តីសុខ ជាពិសេសត្រូវចូលរួម ការពារឱ្យបានគង់វង្សនូវសុខសន្តិភាពនេះ។ មួយវិញទៀតសុខសន្តិភាពដែលយើងមានដូចបច្ចុប្បន្ននេះគឺបានពីការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ដែលយើងជាវីរៈបុរសសន្តិភាព ស្ថិរភាព ជាគំរូវរៈភាព ជាអ្នកដឹកនាំដែលបានលះបង់គ្រប់កម្លាំងកាយកម្លាំងចិត្ត សតិបញ្ញាទាំងអស់ដើម្បីរកសន្តិភាពជូនជាតិមាតុភូមិ»។

លោកស្រីបានសង្កត់ធ្ងន់ថា «នៅក្រោយបញ្ចប់ការហ្វឹកហាត់ហើយ ក្លាយខ្លួនជាកងកម្លាំងប្រដាប់អាវុធ គឺកូនក្មួយត្រូវមានតួនាទីការពារសុខសន្តិភាព ឯកភាពជាតិ និងបូរណភាពដែនដី ជាមួយនោះត្រូវប្រើតួនាទី ភារកិច្ចក្នុងបេសកកម្មគឺរក្សាសន្តិសុខសណ្ដាប់ធ្នាប់ក្នុងដែនដី ដែលខ្លួនរស់នៅ ចាត់ទុកសុខទុក្ខប្រជាពលរដ្ឋជាធំ បានន័យថា ត្រូវបង្ក្រាបឲ្យបានបញ្ហាចោរកម្ម លួចឆក់ កាប់សម្លាប់ និងអំពើហឹង្សាគ្រប់បែបយ៉ាងទាំងអស់»។

សូមបញ្ជាក់ថា ដោយបានការណែនាំរបស់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស, បញ្ជាការដ្ឋានកងរាជអាវុធហត្ថខេត្តកំពង់ស្ពឺ បានរៀបចំពិធីសំណេះសំណាល និងជូនដំណើរយោធិន នៃកងរាជអាវុធហត្ថដែលទើបជ្រើសរើសថ្មី (ជាប់ជាស្ថាពរ) ដើម្បីបញ្ជូនទៅហ្វឹកហ្វឺននៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំរីករាយ) ដែលពិធីជូនដំណើរនោះត្រូវបានធ្វើឡើងក្រោមអធិបតីភាពលោកស្រី ឡុង បូណាត អភិបាលរង នៃគណៈអភិបាលខេត្ត និងមាតាបិតា អាណាព្យាបាលរបស់យោធិន នៃកងរាជអាវុធហត្ថទើបជ្រើសរើសថ្មី នៅទីបញ្ជាការដ្ឋានអាវុធហត្ថខេត្តកំពង់ស្ពឺ៕