រយៈពេល ៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ខេត្តកំពង់ធំ ទទួលបានភ្ញៀវទេសចរជិត ១៣ម៉ឺននាក់
(កំពង់ធំ)៖ រយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំថោះ បញ្ចស័ក ពស.២៥៦៧ គស.២០២៣ គិតចាប់ពីថ្ងៃទី១៤-១៥-១៦ ខែមេសា ឆ្នាំ២០២៣ ខេត្តកំពង់ធំទទួលបានភ្ញៀវទេសចរ ប្រមាណ ១២៤,៤៥៩នាក់ ក្នុងនោះទេសចរជាតិចំនួន ១២៤,៤០០នាក់ និងទេសចរអន្តរជាតិចំនួន ៥៩នាក់ ។
បើតាមរបាយការណ៍របស់មន្ទីរទេសចរណ៍កំពង់ធំ មានប្រជាពលរដ្ឋ និងភ្ញៀវទេសចរបានមកទស្សនានៅតាមរមណីយដ្ឋាន គោលដៅទេសចរណ៍ និងប្រជាពលរដ្ឋចូលរួមនៅតាមបណ្តាវត្តអារ៉ាមនានាក្នុងខេត្តកំពង់ធំ មានសរុបចំនួន ១២៤ ៤៥៩នាក់ ភ្ញៀវជាតិចំនួន ១២៤,៤០០នាក់ ភ្ញៀវបរទេសចំនួន ៥៩នាក់។ នៅតាមបណ្តារមណីយដ្ឋានដែលបានដំណើរការទទួលភ្ញៀវទេសចរបានសហការជាមួយកម្លាំងសមត្ថកិច្ចមូលដ្ឋានរៀបចំសណ្តាប់ធ្នាប់ រក្សាសន្តិសុខ នៅក្នុងរមណីយដ្ឋានបានល្អ។
ជាមួយគ្នានិងការយកចិត្តទុកដាក់របស់ប្រមុខរាជរដ្ឋាភិបាលក៏ដូចជា លោក ងួន រតនៈ អភិបាលខេត្តកំពង់ធំ និងក្រុមការងារ បានបង្កើតព្រឹត្តិការណ៍សង្ក្រាន្តកំពង់ធំ មានបងប្អូនប្រជាពលរដ្ឋមកលេងកំសាន្តដែលមានទីតាំងនៅសួនស្ទឹងសែន ក្នុងនោះក្រុមការងារសង្ក្រាន្តបានបង្កើតកម្មវិធីលេងល្បែងប្រជាប្រិយដែលមាន ចោលឈូង ទាញព្រាត់ លាក់កន្សែង ស្វាដណ្ដើមស្លឹកឈើ ឡើងសសរខ្លាញ់ តំបន់ត្រជាក់ ប្រដាល់បិទមុខនិងល្បែងផ្សេងៗទៀតជាច្រើន។
នៅក្នុងការបញ្ចប់ព្រឹត្តិការណ៍សង្ក្រាន្តកំពង់ធំ នារាត្រីថ្ងៃទី១៦ ខែមេសា ឆ្នាំ២០២៣ លោក ងួន រតនៈ ក៏បានថ្លែងអំណរគុណយ៉ាងជ្រាលជ្រៅបំផុតចំពោះក្រុមការងារកងកម្លាំងសមត្ថកិច្ចទាំងអស់ដែលបានយកចិត្តទុកដាក់បង្កើតកម្មវិធីព្រឹត្តិការណ៍សង្ក្រាន្តកំពង់ធំ ទទួលបានជោគជ័យជាពិសេសការការពារសន្តិសុខសណ្ដាប់ធ្នាប់ជូនបងប្អូនប្រជាពលរដ្ឋមកកំសាន្តទស្សនា៕
