(ខេត្តស្វាយរៀង)៖ នៅព្រឹកថ្ងៃសុក្រ ២ រោច ខែចេត្រ ឆ្នាំខាល
ចត្វាស័ក ពុទ្ធសករាជ ២៥៦៦
ត្រូវនឹងថ្ងៃទី៧ ខែមេសា ឆ្នាំ២០២៣នេះ
រដ្ឋបាលស្រុករំដួលរួមនិងកងកម្លាំងទាំងបី មន្ត្រីរាជការស្រុកបានរៀបចំពិធី
កិច្ចប្រជុំពង្រឹងកិច្ចសហប្រតិបត្តិការទ្វេរភាគី ដើម្បីបង្កើនចំណងសាមគ្គីភាព មិត្តភាពជាមួយស្រុកជាប់ព្រំ ដែន រវាងស្រុករំដួល និងស្រុកចូវថាញ់ ខេត្តតៃនិញ និងចូលរួមអបអរសាទរបុណ្យចូលឆ្នាំថ្មី ប្រពៃណីជាតិខ្មែរ ឆ្នាំថោះ បញ្ចស័ក ព.ស ២៥៦៦ គ.ស២០២៣ នាឱកាសនេះផងដែរ។
ពិធីអបអរសាទរចូលឆ្នាំថ្មីនេះដែរក៏មានការចូលរួមជូនពរពីភាគីវៀតណាមលោក ទ្វៀនថាញ់ទៀន ប្រធានលេខាបក្សស្រុកចូវចូវថាញ់ខេត្តតៃនិញលោកថឹមវ៉ាន់ញឹម ជាប្រធានក្រុមប្រឹក្សាស្រុកចូវថាញ់ លោកឡេង៉ុកអិនប្រធានគណៈកម្មាធិការប្រជាជនស្រុកចូវថាញ់
និងលោកលោកស្រីគណៈប្រតិភូស្រុករំដួលនិងស្រុកចូវថាញ់ជាច្រើនរូបទៀតផងដែរ។
លោក ហែម សុីណា អភិបាលស្រុករំដួលបានថ្លែងថា ជំនួសមុខឲ្យក្រុមប្រឹក្សាស្រុក និងអាជ្ញាធរស្រុករំដួល និងក្នុងនាមលោកផ្ទាល់ សូមសំដែងនូវការ ស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាវជ្រៅចំពោះវត្តមាន គណៈប្រតិភូស្រុកចូវថាញ់ខេត្តតៃនិញដែលបានចំណាយពេលវេលាដ៏មានតម្លៃផ្ដល់កិត្តិយសអញ្ជើញចូលរួម និងបាន ញ៉ាំងឲ្យបរិយាកាសនៅក្នុងពិធីទាំងមូល កាន់តែមានភាពអធឹកអធម និងបានបង្ហាញឱ្យឃើញពីភាពរឹងមាំ ការរីកចម្រើនទៅមុខជាលំដាប់ និងឥតឈប់ឈរនូវចំណងសាមគ្គីភាព មិត្តភាព ពោពេញដោយស្នាមញញឹម ក្តីសង្ឃឹមនិងកិច្ចសហប្រតិបត្តិការល្អ រវាងស្រុករំដួល ជាមួយស្រុកចូវថាញ់។
លោកបានបន្តថា ចំពោះការងារសន្តិសុខមានលក្ខណៈល្អប្រសើរ ដោយគណៈបញ្ជាការឯកភាពរដ្ឋបាលស្រុកបានយកចិត្តទុកដាក់ ក្នុងការថែរក្សាសន្តិសុខសណ្តាប់ធ្នាប់សាធារណៈសង្គម និងបានយកចិត្តទុកដាក់អនុវត្តនូវគោលនយោបាយភូមិ ឃុំ សង្កាត់មានសុវត្តិភាពទាំង 7 ចំណុច នៅក្នុងមូលដ្ឋានស្រុក ដើម្បីទប់ស្កាត់បង្ការបង្ក្រាបនូវ បទល្មើសនានាដូចជា បង្ក្រាបបទល្មើសគ្រឿងញៀនខុសច្បាប់ ល្បែងស៊ីសងខុសច្បាប់ ចោលួច ឆក់ ប្លន់ និង ក្មេងទំនើង និងការរិតបន្តឹងនូវការអនុវត្តច្បាប់ចរាចរផ្លូវគោក។
លោកបានបញ្ជាក់ថា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានធ្វើឲ្យព្រះរាជាណាចក្រកម្ពុជា មានសុខ សន្តិភាព និងមានការរីកចម្រើនឡើងគួរជាទីមោទនះ ដែលធ្វើឲ្យជីវភាពរបស់បងប្អូនប្រជាពលរដ្ឋមានភាព ធូរធារល្អប្រសើរជាងមុន។
លោកអភិបាលស្រុកមានសង្ឃឹមយ៉ាងមុខមាំថា ចំណងសាមគ្គី មិត្តភាព និងកិច្ចសហប្រតិបត្តិការលើគ្រប់ វិស័យរវាងប្រទេសកម្ពុជា និងប្រទេសវៀតណាម ដោយឡែកស្រុករំដួលនិងស្រុកចូវថាញ់ក៏ទទួលបានលទ្ធផលវិជ្ជមានប្រកបដោយផ្លែផ្កាផងដែរ ដែលជាការចូលរួមចំណែកយ៉ាងធំធេងនៅក្នុងការ ពង្រឹងចំណងសាមគ្គីភាព ឲ្យកាន់តែរឹងមាំទ្វេឡើងឆ្ពោះទៅការសម្រេចរួមគ្នានូវការកសាងតំបន់ព្រំដែនសន្តិភាព មិត្តភាព កិច្ចសហការប្រតិបត្តិការ និងការអភិវឌ្ឍ៕
