អភិបាលខេត្តពោធិ៍សាត់ ជួបសំណេះសំណាលជាមួយនិវត្តន៍ជន និងអតីតយុទ្ធជន ក្នុងក្រុងពោធិ៍សាត់១២១១នាក់
(ពោធិ៍សាត់)៖ ក្នុងឱកាសអបអរសាទរ បុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខនេះ, លោក ខូយ រីដា អភិបាលខេត្ត និងមានការចូលរួមពីក្រុមប្រឹក្សាខេត្ត អភិបាលរងខេត្ត និងថ្នាក់ដឹកនាំមន្ទីរអង្គភាពក្នុងខេត្ត នាថ្ងៃទី០៤ ខែមេសាឆ្នាំ២០២៣ បានអញ្ជើញជួបសំណេះសំណាល ជាមួយគ្រួសារនិវត្តន៍ជន និងអតីតយុទ្ធជន ក្នុងក្រុងពោធិ៍សាត់ ចំនួន១២១១នាក់នៅសាលប្រជុំខេត្ត ក្នុងគោលបំណងជម្រាបជូនអំពីសមិទ្ធិផលរបស់ខេត្ត និងសម្តែងនូវក្តីនឹករលឹក ដឹងគុណចំពោះ បងៗអ៊ុំៗ ដែលជាតួអង្គយ៉ាងសំខាន់ ក្នុងការខិតខំត្រួសត្រាយផ្លូវ រហូតទទួលបានសុខសន្តិភាព ស្ថេរភាព និងមានការអភិវឌ្ឍន៍ លើគ្រប់វិស័យ។
លោក ចាប នាង អភិបាលក្រុងពោធិ៍សាត់ បានជម្រាបជូនថា គិតត្រឹមឆ្នាំ២០២៣ នៅទូទាំងក្រុងពោធិ៍សាត់ មុខសញ្ញានិវត្តជន និងអតីតយុទ្ធជន មានចំនួន១២១១នាក់ ក្នុងនោះស្រី១៧២នាក់។ ជាទូទៅរៀបច្បងជានិវត្តន៍ជន និងអតីយុទ្ធជន គឺជាព្រឹទ្ធាចារ្យ និងជាធនធានមនុស្សដ៏សំខាន់ ដែលបានផ្តល់នូវចំណេះដឹង ចំណេះធ្វើ និងរួមចំណែកកសាងការពារមាតុភូមិហើយបាននឹងកំពុងរស់នៅមួយកូនចៅ និងសាច់ញ្ញាតិ និងមួយចំនួនតូចរស់នៅដោយពឹងផ្អែកលើខ្លួនឯង ទៅតាមកម្លាំងមនុស្សចាស់គួបផ្សំ និងរបបគោលនយោបាយប្រចាំខែ ដោយបើកប្រាក់បៀរវត្តន៍ តាមរយៈបច្ចេកវិទ្យាATM ដើម្បីដោះស្រាយ ជីវភាពប្រចាំថ្ងៃ។
សំណេះសំណាលនាឱកាសនោះ លោក ខូយ រីដា បានថ្លែងថា ការជួបជុំគ្នានេះ ធ្វើឡើងដើម្បីបង្កឱកាសជូនរៀមច្បងជានិវត្តន៍ជន និងអតីតយុទ្ធជន ចំនួន១២១១នាក់ ទូទាំងក្រុងពោធិ៍សាត់ ដែលកម្មវិធីនេះតែងតែធ្វើជាបន្តបន្ទាប់ នៅតាមបណ្តាស្រុក ក្នុងគោលបំណងបានជួបប្រាស្រ័យទំនាក់ទំនង ពិភាក្សាសួរសុខទុក្ខ និងសំណេះសំណាលគ្នាទៅវិញទៅមក ក្នុងន័យរិតចំណងសាមគ្គីភាព និងមិត្តភាពជាគ្រួសារតែមួយ និងក្រោលដំបូលសុខសន្តិភាពតែមួយ។ លោកអ៊ុំប្រុស អ៊ុំស្រី បងប្រុស បងស្រី អតីតជាមន្ត្រីរាជការ និងអតីយុទ្ធជន ដែលអ្នកទាំងនោះ គឺជារៀបច្បង ជាតួអង្គយ៉ាងសំខាន់បំផុត ដែលបាននាំមកនូវសុខសន្តិភាព និងការអភិវឌ្ឍន៍លើគ្រប់វិស័យ។ ពេលនេះពួកគាត់ទាំងអស់បានចប់ភារកិច្ច ក្នុងការបម្រើជាតិ និងប្រជាជន តែទោះជាយ៉ាងនេះក៏ដោយ សូមកុំឲ្យអស់សង្ឃឹមក្នុងជីវិត ព្រោះសង្គមជាតិត្រូវការពួកគាត់ជួយបំពេញការតព្វកិច្ច និងជួយជ្រោមជ្រែងការងារដល់យុវជនជំនាន់ក្រោយៗ បើគ្មានរៀមច្បងទេនោះ ក៏គ្មានថ្ងៃនេះដែរ។
លោកបានថ្លែងទៀតថា ចាប់តាំងបានមកគ្រប់គ្រងរដ្ឋបាលខេត្តជាង៤ខែ ទាំងរូបលោក និងក្រុមការងារតែងតែមមាញឹកក្នុងការចុះជួបសំណេះសំណាល ជាមួយបងប្អូនគ្រួសារនិវត្តន៍ជន និងអតីតយុទ្ធជនគ្រប់ទីកន្លែង ក្នុងន័យបានប្រាស្រ័យទាក់ទង សំណេះសំណាល និងរំលឹកដឹងគុណអតីតមន្ត្រីរាជការ និងអតីតយុទ្ធជន ដែលពួកគាត់បានខិតខំតស៊ូ ពុះពារ អត់ ធ្មត់គ្រប់កាលៈទេសៈ និងគ្រប់ដំណាក់កាល នៃការរួបរួមសាមគ្គីគ្នា ក្នុងការការពារ និងអភិវឌ្ឍន៏ប្រទេសជាតិ ពិសេសបានកសាងកេរ្តិ៍ដំណែល និងស្នាដៃដ៏មានសារៈសំខាន់ ក្នុងការផ្តល់នូវចំណេះដឹង ចំណេះធ្វើ និងបទពិសោធន៍ល្អៗជាច្រើន សម្រាប់មន្ត្រីរាជការជំនាន់ក្រោយរៀនសូត្រ និងយកទៅអនុវត្តតាម។
លោកបានក្រើនរំលឹកដល់និវត្តន៍ជនទាំងអស់ ត្រូវគិតពីផលប្រយោជន៍ជាតិជាធំ ព្រោះប្រមុខរាជរដ្ឋាភិបាល បានខិតខំកសាងបានសមិទ្ធផលជាច្រើន ក្នុងនោះក៏មានខេត្តពោធិ៍សាត់យើងផងដែរ ដូច្នេះត្រូវតែខិតខំថែរក្សាការពារសមិទ្ធផលនោះ ឲ្យបានគង់វង់យូរអង្វែងដល់កូនចៅជំនាន់ក្រោយៗទៀត។ តាមរយៈនេះលោក សូមអញ្ជើញទៅបោះឆ្នោតជ្រើសតាំងតំណាងរាស្រ្ត សម្រាប់នីតិកាលទី៧ ដែលនឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៣ខាងមុខនេះ ព្រមទាំងបានចែកជូនវត្ថុកំដរដៃ ដល់អតីតមន្រ្តីរាជការស៊ីវិល និងអតីតយុទ្ធជន ទាំង១២១១នាក់ ក្នុងម្នាក់ៗទទួលបានសារុង១, ទឹកក្រូច២ដបធំ និងថវិកា៥ម៉ឺនរៀល៕
