ព្រៃវែង៖ «អធិការក្រុងស្រុកទាំង១៣ ត្រូវចាប់ផ្តើមបើកយុទ្ធនាការបង្ក្រាបគ្រឿងញៀន ល្បែងស៊ីសង គ្រប់ប្រភេទ និងបញ្ហាក្មេងទំនើង ឲ្យអស់ពីមូលដ្ឋាន និងត្រូវកែប្រែឥរិយាបថឲ្យទន់ភ្លន់តែម៉ឺងម៉ាត់ ដើម្បីទាញយកការស្រលាញ់ពីប្រជាពលរដ្ឋឲ្យបាន»។ នេះជាការបទបញ្ជារបស់លោកឧត្តមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែងក្នុងឱកាសអញ្ជើញជាអធិបតីភាពក្នុងកិច្ចប្រជុំដើម្បីពង្រឹងប្រសិទ្ធភាពការងារមន្ត្រីនគរបាលមូលដ្ឋាននៅព្រឹកថ្ងៃទី ២៥ ខែ មីនា ឆ្នាំ ២០២៣។

ក្នុងកិច្ចប្រជុំនោះក៏មានការចូលរួមពីលោក-លោកស្រី ស្នងការរង ទទួលផែនទាំង ១៣ និងអធិការក្រុង-ស្រុក ទាំង ១៣ ចំណុះស្នងការដ្ឋាននគរបាលខេត្តព្រៃវែង។

នាឱកាសនោះ លោកឧត្តមសេនីយ៍ទោបានលើកឡើងពីបញ្ហាគ្រឿងញៀន ដែលជាបញ្ហាអាទិភាពទី១ ត្រូវដោះស្រាយ ដូច្នេះ ពេលត្រឡប់ទៅវិញអធិការទាំងអស់ ត្រូវផ្សព្វផ្សាយបន្តដល់ប៉ុស្តិ៍នគរបាលរដ្ឋបាលឲ្យបានដឹងច្បាស់ ហើយបើមន្ត្រីណាហ៊ានពាក់ព័ន្ធនឹងបទល្មើសគ្រឿងញៀន ករណីមានភស្តុតាងគ្រប់គ្រាន់ គឺគ្មានការលើកលែងនោះឡើយ ដាច់ខាតត្រូវតែអនុវត្តទោស ។

លោកស្នងការក៏បានណែនាំដល់អធិការក្រុងស្រុកទាំង១៣ត្រូវពង្រឹងឡើងវិញចំពោះរថយន្តពន្លត់អគ្គិភ័យ ត្រូវទុកដាក់រថយន្តឲ្យបានស្រួលបួល និងត្រូវមានអ្នកប្រចាំការយ៉ាងតិច០២នាក់ ដើម្បីត្រៀមនៅពេលមានហេតុការណ៍អគ្គិភ័យកើតឡើង ចេញរថយន្តទៅជួយអន្តរាគមន៍បានទាន់ពេលវេលា។

ជាមួយគ្នានេះ លោកឧត្តមសេនីយ៍ទោ ឈឿន ប៊ុនឆន ក៏បានណែនាំដល់គ្រប់ផែនទាំងអស់ត្រូវចាប់ផ្តើមយុទ្ធនាការបង្កើនសមត្ថភាពមន្ត្រីតាមរយៈការរាយការណ៍ សុំគោលការណ៍បំពាក់បំប៉នបន្ថែម និងចាប់ផ្តើមធ្វើ របាយការណ៍តាមប្រព័ន្ធកុំព្យូទ័រ ពិសេសការកសាងសំណុំរឿង៕ ដោយ៖ ការីនិពន្ធ