ឯកឧត្តម កែវ រតនៈ អរគុណកងកម្លាំងទាំងបី ដែលបានកសាង រក្សា និងការពារសុខសន្តិភាព
ពោធិ៍សាត់៖ នៅល្ងាចថ្ងៃទី២៤ ខែមីនា ឆ្នាំ២០២៣ នៅសាខាកាកបាទក្រហមខេត្ត ពោធិសាត់បានប្រារព្ធពិធីសំណេះសំណាលជាមួយកងកម្លាំងប្រដាប់អាវុធទាំងបី និងពិសារអាហារសាមគ្គី ក្រោមអធិបតីភាព ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា ព្រមទាំងមានការចូលរួមពីលោកអភិបាលរង នៃគណៈអភិបាលខេត្ត លោកមេបញ្ជាការកងកម្លាំងប្រដាប់ទាំងបី និងកងកម្លាំងចូលរួមប្រមាណ៧០០នាក់ ។
មានប្រសាសន៍សំណេះសំណាលនាឱកាសនោះ ឯកឧត្តម កែវ រតនៈ បានថ្លែងអំណរគុណ ចំពោះបងប្អូនកងកម្លាំងប្រដាប់អាវុធទាំងបីប្រភេទ ដែលបានខិតខំពុះពារ កសាងបាន និងបន្តរក្សាការពារ សុខ សន្តិភាព ជូនប្រជាពលរដ្ឋកម្ពុជា សំដៅបន្តការអភិវឌ្ឍន៍ប្រទេស ឲ្យមានការរីកចម្រើនជាបន្តបន្ទាប់លើគ្រប់វិស័យ ។
ឯកឧត្តម កែវ រតនៈ ក៏បានលើកទឹកចិត្តនិងជម្រុញស្មារតីដល់កងកម្លាំងត្រូវពង្រឹងឆន្ទៈ យកចិត្តទុកដាក់ អនុវត្តបទបញ្ជារបស់ថ្នាក់ដឹកនាំ បន្តសហការក្នុងបង្ការ ទប់ស្កាត់ បង្ក្រាប បទល្មើសនៅក្នុងមូលដ្ឋាន ធានាបាន សុខសុវត្ថិភាព សណ្តាប់ធ្នាប់ សង្គម ជូនបងប្អូនប្រជាពលរដ្ឋ ឲ្យបានទាន់ពេលវេលា និងល្អប្រសើរ ។
ក្នុងឱកាសនោះផងដែរ ឯកឧត្តម ក៏បាននាំយកនូវអំណោយជូនកងកម្លាំង ដោយម្នាក់ៗទទួលបាននូវ អង្ករចំនួន២០គីឡូក្រាម មីមួយកេស ត្រីខមួយយួរ ទឹកត្រីមួយយួរ និងថវិកាចំនួន១០ម៉ឺនរៀលផងដែរ ៕
