មន្ទីរសង្គមកិច្ចខេត្តមណ្ឌលគិរីផ្ដល់ប្រាក់របបគោលនយោបាយជូនជនពិការក្រីក្រតាមសមាគមន៍ប្រចាំឆ្នាំ២០២២ ក្នុងក្រុងសែនមនោរម្យ

ខេត្តមណ្ឌលគិរី៖ នាព្រឹកថ្ងៃទី១៥ ខែមីនា ឆ្នាំ២០២៣ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានរៀបចំពិធីផ្ដល់ប្រាក់របបគោលនយោបាយជូនជនពិការក្រីក្រ ក្នុងក្រុងសែនមនោរម្យ ប្រចាំឆ្នាំ២០២២ ក្រោមវត្តមានលោកស្រី វិន ស៊ីធួន អភិបាលរងខេត្តមណ្ឌលគិរី ដោយមានការចូលរួមពីសំណាក់លោកស្រី ប្រាក់ ប៊ុននឿម អនុប្រធានមន្ទីរសង្គមកិច្ចខេត្ត ព្រមទាំងមន្ទីរអង្គភាពពាក់ព័ន្ធ ចៅសង្កាត់ និងជនពិការភាពក្រីក្រសរុបចំនួន ៧៦នាក់ ពិធីនេះបានប្រព្រឹត្តទៅនៅសាលប្រជុំមន្ទីរអប់រំ យុវជន និងកីឡាខេត្តមណ្ឌលគិរី។

លោកស្រី  វិន ស៊ីធួន អភិបាលរងខេត្ត បានមានប្រសាសន៍ថា គោលដៅដ៏ចម្បងរបស់រាជរដ្ឋាភិបាលកម្ពុជា គឺការកាត់បន្ថយ ភាពក្រីក្រ ការលើកកម្ពស់កម្រិតជីវភាពរស់នៅ និងគុណភាពជីវិត របស់ប្រជាជន ដែលកំពុងមានកំណេីន យ៉ាងឆាប់រហ័ស។ លោកស្រីបញ្ជាក់ថា រាជរដ្ឋាភិបាលកម្ពុជាបានចាត់ទុកថា ភាពក្រីក្រ គឺជាការខាតបង់តម្លៃធនធានសេដ្ឋកិច្ច ដែលមិនត្រឹមតែ មិនអាចទទួលយកបានទាំងផ្នែកផ្លូវចិត្តប៉ុណ្ណោះទេ ប៉ុន្ដែវាអាចបណ្ដាលឱ្យមានការបែកបាក់សាមគ្គីភាព និង អស្ថេរភាព ក្នុងសង្គមថែមទៀត ចំពោះការផ្តល់ប្រាក់របបគោលនយោបាយចំពោះជនមានពិការភាពក្រីក្រនៅតាមសហគមន៍នេះ គ្រប់មន្ទីរសង្គមកិច្ច អតីតយុទ្ឋដជន និងយុវនីតិសម្បទាទាំង២៥រាជធានីខេត្ត បានផ្តល់ជូនជនមានពិការភាព។ សម្រាប់ខេត្តមណ្ឌលគិរី ក្នុងឆ្នាំ២០២២ គណៈកម្មការបាន រៀបចំជ្រើសរើសឈ្មោះប្រជាពលរដ្ឋ ដែលមានពិការភាពមានបណ្ណក្រីក្រ តាមរយៈកម្មវិធីកំណត់អត្តសញ្ញាណកម្ម ពិការភាពតាមគំរូសង្គម និង សិទ្ធិជាមូលដ្ឋាន សម្រាប់ធ្វើការផ្ដល់ប្រាក់របបគោលនយោបាយជូនជនមានពិការភាពក្រីក្រ។

លោកស្រី ប្រាក់ ប៊ុននឿម អនុប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្ត បានឱ្យដឹងថា ដំណើរការនៃការចុះសម្ភាសន៍ ជនមានពិការភាពទូទាំងខេត្តមណ្ឌលគិរីបានចំនួន ១,១១៤នាក់ ស្រី៨៨៥នាក់ ក្នុងនោះ ពិការកាយ សម្បទាចំនួន ៥៥១នាក់ ពីការញាណដឹងចំនួន ៤២៥នាក់ ពិការសតិបញ្ញាចំនួន ៦០នាក់ ពិការផ្លូវចិត្តចំនួន ១៥នាក់ និងពិការផ្សេងៗចំនួន ៣៣នាក់ និងសម្ភាសន៍មិនពេញលេញចំនួន ២៩នាក់។ តាមរយៈកម្មវិធីនេះ មន្ទីរបានរៀបចំ និងធ្វើការស្នើរបបគោលនយោបាយពិការក្រីក្រនៅតាមសហគមន៍សម្រាប់ឆ្នាំ២០២២ ជូនប្រជាពលរដ្ឋ ដែល រស់នៅក្នុងក្រុងសែនមនោរម្យមាន ចំនួន ៧៦នាក់ ស្រី ៣៣នាក់ ហើយសម្រាប់ឆ្នាំបន្តបន្ទាប់ មន្ទីរនឹងធើ្វការសហការ ជាមួយសង្កាត់ដើម្បីរៀបចំធ្វើបច្ចុប្បន្នភាពជនមានពិការក្រីក្រតាមសហគមន៍បន្តទៀត៕ ដោយ៖ ផល្លិត ហៅបូរ៉ា