មន្ត្រីជាន់ខ្ពស់ក្រសួងអប់រំ៖ បើឈប់រៀនព្រោះតែក្រ អ្នកនឹងក្លាយជាអ្នកក្រមួយជីវិត ដូច្នេះកុំបោះបង់ការសិក្សាដោយសារស្ថានភាពគ្រួសារក្រីក្រ គឺត្រូវខិតខំរៀនសូត្រយកចំណេះនិងជំនាញឲ្យបាន ទើបជីវិតប្រសើរឡើង
(ស្វាយរៀង)៖ ឯកឧត្តមសេរី ជំនះ រដ្ឋលេខាធិការក្រសួងអប់រំយុវជននិងកីឡាបានថ្លែងថា បច្ចុប្បន្ននេះសាលារៀនបានមកដល់ផ្ទះរបស់សិស្សានុសិស្ស ដូច្នេះត្រូវតែខិតខំរៀនសូត្រ បើឈប់រៀនព្រោះតែក្រ អ្នកនឹងក្លាយជាអ្នកក្រមួយជីវិតព្រោះតែឈប់រៀន កុំបោះបង់ការសិក្សាដោយសារស្ថានភាពគ្រួសារក្រ គឺត្រូវរៀនពេញមួយជីវិត។
ការថ្លែងបែបនេះរបស់ឯកឧត្តមរដ្ឋលេខាធិការក្រសួងអប់រំបានធ្វើឡើងនៅក្នុងពិធីប្រគល់វិញ្ញាបនបត្រ ដល់សិស្ស កម្មវិធីសមមូល អប់រំកម្រិតមូលដ្ឋានតាមអ៊ីនធឺណិត(ប៑ីប)និងសិស្សរៀន computer (word Excel &power point)នាព្រឹកថ្ងៃទី៤ខែមីនាឆ្នាំ២០២៣នៅសាលប្រជុំមន្ទីរអប់រំខេត្ត។
ឯកឧត្តមបានបន្តថា ក្រោមនយោបាយឈ្នះ ឈ្នះរបស់សម្ដេចតេជោហ៊ុន សែនជា នាយករដ្ឋមន្ត្រីនៃកម្ពុជា បាននាំមកនូវសុខសន្តិភាព ការបង្រួបបង្រួមជាតិនិងការអភិវឌ្ឍលើគ្រប់វិស័យ ជាពិសេសវិស័យអប់រំបានរីកដុះដាលចាប់ពីទីក្រុងរហូតដល់ជនបទដោយមានសាលារៀនរាប់ម៉ឺនខ្នង ធ្វើឲ្យសិស្សានុសិស្សមានលទ្ធភាពរៀនសូត្រក្រៀបយកចំណេះវិជ្ជា តាំងពីបឋមសិក្សារហូតដល់មហាវិទ្យាល័យ ទាំងអស់នេះផ្ដើមចេញពីកត្តាសន្តិភាព អរគុណដល់សន្តិភាពដែលបាននាំមកនូវអ្វីៗគ្រប់យ៉ាងដល់ប្រជាជនខ្មែរ។
ឯកឧត្តមបានបន្ថែមថា កម្មវិធី(ប៑ីប)មានកិច្ចសហការ៣ស្ថាប័ន ទី១.ក្រសួងអប់រំយុវជននិងកីឡា ទី២. ក្រសួងការងារនិងបណ្ដុះបណ្ដាលវិជ្ជាជីវៈ និងទី៣. មានការជួយគាំទ្រពីអង្គការយូណេស្កូប្រចាំប្រទេសកម្ពុជា។ដូច្នេះជាឱកាសមួយសម្រាប់ប្អូនៗសិស្សានុសិស្សដើម្បីឆក់យកឱកាសនៅពេលនេះក្នុងការរៀនយកជំនាញ ព្រោះនាពេលបច្ចុប្បន្ននិងទៅអនាគតនៅតាមបណ្ដារោងចក្រ ក្រុមហ៊ុនផ្សេងៗគេត្រូវការបុគ្គលិកដែលមានជំនាញនិងចំណេះដឹងនិងកាត់បន្ថយកម្លាំងពលកម្មដោយកម្លាំង ព្រោះកាលណាបច្ចេកវិទ្យាទំនើបគេត្រូវការអ្នកដែលមានជំនាញពិតប្រាកដក្នុងការធ្វើការងារ។
ជាមួយគ្នានេះលោកសុខ សុីដែត អនុប្រធានមន្ទីរអប់រំខេត្តក៏បានអំពាវនាវដល់សិក្សានុសិស្សដែលបោះបង់ការសិក្សាក្នុងកម្រិតថ្នាក់បឋមភូមិ សូមធ្វើការចុះឈ្មោះចូលរៀនបន្តជាមួយកម្មវិធី(ប៊ីប)ឲ្យបានគ្រប់ៗគ្នា ដើម្បីជាស្ពានចម្លងឲ្យបានចូលរៀនបន្តនៅវិទ្យាស្ថានពហុបច្ចេកទេសភូមិភាគតេជោសែនស្វាយរៀង ក្នុងការចាប់យកជំនាញនិងចំណេះពិតប្រាកដដើម្បីឲ្យមានអនាគតល្អប្រសើរផងដែរ៕ ដោយនិពន្ធនាយករង នុត សាប៑ុន
