អគ្គនាយកដ្ឋានគយ និងរដ្ឋាករកម្ពុជា ប្រកាសដាក់ឱ្យប្រើប្រាស់ជាផ្លូវការ នូវលតាប័ត្ររថយន្តគំរូថ្មី ដែលបំពាក់ដោយបច្ចេកវិទ្យាការពារការក្លែងបន្លំ
(ភ្នំពេញ)៖ លតាប័ត្ររថយន្តគំរូថ្មី របស់អគ្គនាយកដ្ឋានគយ និងរដ្ឋាករកម្ពុជា ដែលបំពាក់ដោយបច្ចេកវិទ្យា RFID ត្រូវបានប្រកាសដាក់ឱ្យប្រើប្រាស់ជាផ្លូវការ ចាប់ពីថ្ងៃទី១ ខែមីនា ឆ្នាំ២០២៣ នេះតទៅ ដើម្បីផ្តល់នូវភាពងាយស្រួលដល់មន្រ្តីគយ មានសមត្ថកិច្ចក្នុងការឃ្លាំមើល និងចុះត្រួតពិនិត្យអនុលោមភាពលើរថយន្តគ្រប់ប្រភេទ ដែលចរាចរតាមដងផ្លូវ ដើម្បីកំណត់បានថា ជាលតាប័ត្រត្រឹមត្រូវ ឬក្លែងក្លាយ និងទទួលបានព័ត៌មានអំពីអត្តសញ្ញាណរថយន្ត។
ការប្រកាសដាក់ឱ្យប្រើប្រាស់ជាផ្លូវការនូវលតាប័ត្ររថយន្តគំរូថ្មីនេះ ក្នុងឱកាសដែលបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា អមដំណើរដោយលោកអគ្គនាយករង លោកប្រធានលេខាធិការដ្ឋាន ប្រធាននាយកដ្ឋាន និងមន្ត្រីគយនិងរដ្ឋាករពាក់ព័ន្ធ បានអញ្ជើញចុះទៅការិយាល័យគយនិងរដ្ឋាករផែស្ងួត ហុង ឡេង ហួរ នៃសាខាគយនិងរដ្ឋាករផែស្ងួត នៅថ្ងៃទី១ ខែមីនា ឆ្នាំ២០២៣នេះ ដើម្បីពិនិត្យសកម្មភាពការងារនៃការដាក់ឱ្យប្រើប្រាស់លតាប័ត្ររថយន្តគំរូថ្មី ដែលមានបំពាក់បច្ចេកវិទ្យា RFID ជាមួយនិងការប្រើប្រាស់ឧបករណ៍ RFID Reader។
ក្នុងឱកាសនោះបណ្ឌិត គុណ ញឹម បានប្រគល់លតាប័ត្ររថយន្តគំរូថ្មី ជូនការិយាល័យគយ និងរដ្ឋាករផែស្ងួត ហុង ឡេង ហួរ ជានិមិត្តរូបនៃការប្រកាសជាផ្លូវការ ដាក់ឱ្យប្រើប្រាស់លតាប័ត្ររថយន្តគំរូថ្មី របស់អគ្គនាយកដ្ឋានគយ និងរដ្ឋាករកម្ពុជា ចាប់ពីថ្ងៃទី១ ខែមីនា ឆ្នាំ២០២៣ នេះតទៅ។
សូមជម្រាបជូនថា លតាប័ត្ររថយន្តប្រភេទថ្មី ដែលបំពាក់ដោយបច្ចេកវិទ្យា RFID នេះ នឹងផ្តល់នូវភាពងាយស្រួល ដល់មន្រ្តីគយមានសមត្ថកិច្ចក្នុងការឃ្លាំមើល និងចុះត្រួតពិនិត្យអនុលោមភាព លើរថយន្តគ្រប់ប្រភេទដែលចរាចរតាមដងផ្លូវ ក៏ដូចជាស្ថិតក្នុងអាជីវកម្មដ្ឋានពីចម្ងាយ ដោយប្រើប្រាស់នូវឧបករណ៍ត្រួតពិនិត្យ (RFID Reader) ដើម្បីកំណត់បានថា ជាលតាប័ត្រត្រឹមត្រូវ ឬក្លែងក្លាយ និងទទួលបានព័ត៌មាន អំពីអត្តសញ្ញាណរថយន្តផងដែរ៕
