កែប ៖ រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានជម្រុញឲ្យយកចិត្តទុកដាក់និងអនុវត្តយន្តការធំៗជាច្រើនចំណុច សម្រាប់ការរៀបចំបុណ្យសមុទ្របានល្អប្រសើរ។ការលើកឡើងបែបនេះអំឡុងពេលដែលលោកបណ្ឌិត ថោង ខុន បានចូលរួមប្រជុំ បូកសរុបលទ្ធផល ការបែងចែកភារកិច្ច របស់គណៈកម្មការថ្នាក់ជាតិ និងអនុគណៈកម្មការនានាជាចំណុះសម្រាប់សហការរៀបចំបុណ្យសមុទ្រ លើកទី៦ ជុំទី២នៅខេត្តកែប កាលពីរសៀលថ្ងៃទី១៥ ខែធ្នូ ឆ្នាំ២០១៧នៅក្នុងសាលប្រជុំសាលាខេត្តកែប។
ជាមួយនេះលោកក៏បានជម្រុញដល់ផ្នែកបរិស្ថាន ក្នុងតំបន់គួរចាប់អារម្មណ៍មើលផ្នែកអនាម័យឲ្យបានផុសផុល ដោយតម្រូវឲ្យខាងជំនាញធ្វើបដា ស្ប៉តសម្រាប់អប់រំផ្សព្វផ្សាយកុំឲ្យមានការបោះចោលកាកសំណល់ផ្តេសផ្តាស ពិសេសកុំឲ្យមានការបង្ហូរទឹកកខ្វក់ចូលក្នុងសមុទ្រ។លោកថា៖ លោកចង់ប្រែក្លាយខេត្តកែបឲ្យទៅជាខេត្តគំរូ ក្នុងចំណោមខេត្តទេសចរណ៍ទូទាំងប្រទេស បន្ទាប់ពីនោះ ខេត្តកំពត ក៏ជាទិសដៅមួយដែរក្នុងចំណោមខេត្តទេសចរណ៍នានាផងដែរ។ដូច្នេះដើម្បីជាគ្រឹះដ៏រឹងមាំសម្រាប់ធ្វើឲ្យខេត្តកែបមានសក្តានុពលកាន់តែខ្លាំងលើវិស័យទេសចរណ៍ ផ្នែកជំនាញនិមួយៗក្នុងតំបន់គួរយកចិត្តទុកដាក់ឲ្យបានហ្មត់ចត់បំផុត។លោកបានលើកហេតុផលថា៖ក្នុងពេលបច្ចុប្បន្នអ្នកទេសចរណ៍បាននិងកំពុងចាប់អារម្មណ៍យ៉ាងខ្លាំងក្នុងការលម្ហែ កម្សាន្ត នៅខេត្តកែប កាន់តែច្រើនឡើងៗ។ដូច្នេះបើវិស័យទេសចរណ៍មានការរីកចម្រើនភ្ញៀវក៏កាន់តែមានសន្ទុះច្រើនឡើងតាមណឹងដែរ ចឹងខេត្តកែបដាច់ខាតត្រូវសាងសង់សណ្ឋាគារ ផ្ទះសំណាក់បន្ថែមទៀតសម្រាប់បម្រើសេវាទេសចរណ៍នាពេលខាងមុខ។
សូមបញ្ជាក់ថា ៖ ពិធីបុណ្យសមុទ្រឆ្នាំ២០១៧នៅខេត្តកែប ដែលប្រព្រឹត្តទៅនៅថ្ងៃទី២២,២៣,២៤ខែធ្នូ ឆ្នាំ២០១៧ គឺមានស្តង់សម្រាប់តាំងបង្ហាញផលិតផល សរុប៥២០ស្តង់ ហើយក្នុងនោះស្តង់ដែលត្រៀមនឹងដាក់តាំងបង្ហាញគឺភាគច្រើនជាផលិតផលបរទេស ដែលនាំមកពីប្រទេសជិតខាង ដូចជាផលិតផលប្រទេសថៃជាដើម។ចំពោះកីឡាគឺមានកីឡាលើគោក(វាលខ្សាច់) កីឡាលើទឹក(ទូកក្តោង) និងកីឡាលើអាកាស ហើយពិធីនោះក៏មានការប្រគុំតន្ត្រីគ្រប់ប្រភេទ មានបុរាណ សម័យ ចូលរួមសំដែងដោយតារាល្បីៗក្នុងព្រះរាជាណាចក្រកម្ពុជាផងដែរ។ជាមួយនេះដែរ ក្នុងពិធីបុណ្យសមុទ្រគ្រប់ស្តង់ និងគ្រប់កន្លែងសាធារណៈនានា គឺមិនអនុញ្ញាតឲ្យប្រើក្រដាសអនាម័យឡើយ ដោយត្រូវបានអនុញ្ញាតឲ្យការប្រើប្រាស់កន្សែងជូតមាត់ជំនួសវិញ ព្រោះតែអំឡុងពេលខាងមុខ នឹងត្រូវគាំទ្រនូវយន្តការភោជនីយដ្ឋានស្អាត ជាភោជនីយដ្ឋានគ្មានសំរាមក្រដាស ដោយត្រូវបានប្រកាសឲ្យអនុវត្តក្រមប្រតិបតិ្តភោជនីយដ្ឋាន និងអាហារដ្ឋានទេសចរណ៍ស្អាត អមជាមួយនឹងការបង្កើតកូនសៀវភៅ Green Passport សម្រាប់ភោជនីយដ្ឋាន និងអាហារដ្ឋានស្អាតផងដែរ។
នេះជាជម្រើសមួយយ៉ាងប្រសើរសម្រាប់រួមគ្នាជួយសម្អាតបរិស្ថាន ស្របតាមប្រធានបទ “ឆ្នេរសមុទ្របៃតង អនាគត គឺបច្ចុប្បន្ន”ក្រោមពាក្យស្លោក និរន្តរភាពទេសចរណ៍ គឺការអភិវឌ្ឍន៍៕
ណារិទ្ធ
