ឯកឧត្តម ឃួង ស្រេង នឹងប្រើវិធានការលើមន្ត្រីថ្នាក់ក្រោមជាតិ សម្រាប់បម្រើសេវាជូនប្រជាពលរដ្ឋនៅតាមមូលដ្ឋាន

(ភ្នំពេញ)៖ ដើម្បីបម្រើសេវាសាធារណៈជូនប្រជាពលរដ្ឋកាន់តែល្អប្រសើរ រហូតទទួលបានការជឿទុកចិត្តពីពួកគាត់កាន់តែខ្លាំងនោះ សាលារាជធានីភ្នំពេញ នឹងប្រើប្រាស់គ្រប់វិធានការ តម្រង់ទិសមន្ត្រីទាំងអស់នៅថ្នាក់ក្រោមជាតិ ដើម្បីអនុវត្តការងារលើការផ្តល់សេវាជូនប្រជាពលរដ្ឋ ឲ្យទាន់ពេលវេលា និងមានសម្លាភាព។

នាថ្ងៃសុក្រ ទី២៤ ខែកុម្ភៈ ឆ្នាំ២០២៣ ឯកឧត្តម ឃួង ស្រេង អភិបាល នៃគណ:អភិបាលរាជធានីភ្នំពេញ បានដឹកនាំប្រជុំពង្រឹងការផ្តល់សេវាសាធារណៈតាមយន្តការច្រកចេញ-ចូលតែមួយ ជូនប្រជាពលរដ្ឋនៅថ្នាក់ខណ្ឌ និងសង្កាត់ជាមួយអាជ្ញាធរខណ្ឌទាំង១៤ សង្កាត់ទាំង១០៥ និងស្មៀន នៅសាលារាជធានីភ្នំពេញ។

នៅក្នុងកិច្ចប្រជុំនេះ ឯកឧត្តម ឃួង ស្រេង បានគូសបញ្ជាក់ថា”ការបង្កើតច្រកចេញចូលតែមួយ យើងមានគោលបំណងតែមួយគត់នោះគឺបម្រើសេវាសាធារណៈជូនប្រជាពលរដ្ឋឲ្យបានទាន់ពេលវេលា និងមានសម្លាភាព”។ ដូច្នេះ មន្ត្រីដែលជាប្រតិបត្តិទាំងអស់ ត្រូវរួមគ្នាធ្វើ ដើម្បីបម្រើប្រជាពលរដ្ឋបានល្អ រាប់តាំងពីពាក្យសំដីឡើងទៅ។

ឯកឧត្តមអភិបាលរាជធានីភ្នំពេញ បានបន្តទៀតថា”ការកោះហៅអាជ្ញាធរខណ្ឌទាំង១៤ សង្កាត់ និងស្មៀន មកប្រជុំពេលនេះ គឺមានបំណងកោតសរសើរបងប្អូន ជាមន្ត្រីរបស់យើង ដែលបានបំពេញការងារបានយ៉ាងល្អជាមួយ រាជរដ្ឋាភិបាល ក្នុងកិច្ចការងារបម្រើប្រជាពលរដ្ឋ រហូតទទួលបានការជឿទុកចិត្តយ៉ាងខ្លាំងពីប្រជាពលរដ្ឋគ្រប់ៗគ្នា។

ឯកឧត្តមបញ្ជាក់ថា”នៅពេលខាងមុខនេះ ឯកឧត្តមនឹងដាក់កម្លាំងបង្កប់ជាប្រជាពលរដ្ឋ ទៅទទួលសេវាពីមន្ត្រីរបស់យើង ដើម្បីឲ្យដឹងថាមន្ត្រីរបស់យើងបម្រើប្រជាពលរដ្ឋបានល្អក្នុងកម្រិតណា? ក្នុងនាមជាមន្ត្រី ត្រូវកែប្រែឥរិយាបទពីពេលនេះទៅ។ ពេលមានបញ្ហា កុំថា អភិបាលរាជធានីភ្នំពេញ មិនបានណែនាំជាមុនឲ្យសោះ។

ឯកឧត្តម ឃួង ស្រេង មានប្រសាសន៍បន្ថែមទៀតថា ល្បែងស៊ីសងគ្រប់ប្រភេទ គឺមិនអនុញ្ញាតឲ្យមានជាដាច់ខាតនៅក្នុងផ្សារនានានៅក្នុងរាជធានីភ្នំពេញ កុំថាឡើយ ល្បែងឡូតូដែលស្របច្បាប់ ក៏មិនឲ្យមានដែរ។ បើរកឃើញថា នៅក្នុងផ្សារណាមួយមានល្បែងស៊ីសងនោះ ប្រធានផ្សារនឹងមានបញ្ហាមិនខានឡើយ៕