នៅក្នុងឱកាសនោះ លោក អភិបាលរងខេត្ត បានមានប្រសាសន៍ឲ្យដឹងថាៈ ជាទូទៅ ការផ្លាស់ប្ដូរក្តី ការតែងតាំងមុខតំណែង របស់មន្ត្រីរាជការក្តី វាជាកិច្ចការធម្មតា ទៅតាម តម្រូវការចាំបាច់ របស់ស្ថាប័ននីមួយៗ ក៏ដូចជា ទៅតាមស្ថានភាពរបស់គ្រួសារ ។
លោកអភិបាលរងខេត្ត ក៏សូមថ្លែងនូវការកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃមន្ទីរសុខាភិបាល នៃរដ្ឋបាលខេត្ត ដែលកន្លងមក បានខិតខំប្រឹងប្រែង បំពេញតួនាទី ភារកិច្ចរបស់ខ្លួន ប្រកបដោយមនសិការ ឆន្ទៈ ក្រមសីលធម៌ និងស្មារតីទទួលខុសត្រូវខ្ពស់ ស្របតាមគោលការណ៍ ផែនការយុទ្ធសាស្រ្ដ
របស់ក្រសួង ទិសដៅការងារ របស់រដ្ឋបាលខេត្ត និងផែនការការងាររបស់មន្ទីរ ដោយទទួលបានលទ្ធផលល្អប្រសើរ ជាបន្តបន្ទាប់ ។
លោកបានបន្តថាៈ ក្នុងនាមរដ្ឋបាលខេត្ត លោកសូមសម្ដែង នូវការកោតសរសើរ និងថ្លែងនូវការអរគុណ ចំពោះមន្ត្រីទាំងអស់ ដែលបម្រើការងារ ជាមន្រ្តីសុខាភិបាល ក្នុងមូលដ្ឋានខេត្ត ដែលបានសហការ និងមានទំនាក់ទំនង យ៉ាងល្អប្រសើរជាមួយ រដ្ឋបាលខេត្ត អាជ្ញាធរដែនដី គ្រប់លំដាប់ថ្នាក់ សមត្ថកិច្ច និងកងកម្លាំងប្រដាប់អាវុធ គ្រប់ប្រភេទ ក្នុងការអនុវត្ត និងដឹកនាំការងារជំនាញ ទាំងលើការងារ ជាពិសេសលើការងារ ព្យាបាលទប់ស្កាត់ការពារជំងឺកូវីដ ១៩ នាពេលកន្លងមក ក៏ដូចជា នាពេលបច្ចុប្បន្ន គឺពិត ជាបានចូលរួមចំណែក យ៉ាងសំខាន់ជាមួយ រាជរដ្ឋាភិបាល ក្រសួង និងរដ្ឋបាលខេត្ត។
លោក ម៉ែន អេង បានក្រើនរំលឹក ចំពោះអស់លោក លោកស្រី ដែលត្រូវបានផ្លាស់ប្តូរ មកបម្រើការងារកន្លែងថ្មី ត្រូវបន្តការសហការ និងមានទំនាក់ទំនងយ៉ាងល្អប្រសើរ ជាមួយថ្នាក់ដឹកនាំ មន្ទីរសុខាភិបាល នៃរដ្ឋបាលខេត្ត ដែលទាំងអស់នេះ គឺពិតជាបាន ចូលរួមចំណែក យ៉ាងសំខាន់ជាមួយ រាជរដ្ឋាភិបាល ក្រសួង និងរដ្ឋបាលខេត្ត ក្នុងការលើកកម្ពស់សុវត្ថិភាព ដែលជាបច្ច័យជួយជំរុញ នូវកំណើនកំណើនសេដ្ឋកិច្ច សង្គម ប្រកបដោយនិរន្តរ៍ភាព និងសុខដុមនីយកម្ម និងសូមយកឱកាសនេះ ជូនពរឲ្យលោក ទទួលបាននូវជោគជ័យ និងសម្រេចបាននូវស្នាដៃ លទ្ធផល និងសមិទ្ធផលល្អៗ បន្ថែមទៀត ក្នុងមុខនាទីនេះ នៅកន្លែងថ្មី នាពេលខាងមុខ ដើម្បីបម្រើឲ្យឧត្ដមប្រយោជន៍ ជាតិ និងប្រជាជន ។
សូមបញ្ជាក់ផងដែរថា : នៅក្នុងកិច្ចប្រជុំនេះ ក៏មានការពិនិត្យលើសំណើការសុំផ្លាស់ប្ដូរ កន្លែងធ្វើការរបស់មន្ត្រីរាជការ របស់មន្ទីរសុខាភិបាល នៃរដ្ឋបាលខេត្តស្វាយរៀង ចំនួន ៩ នាក់ ក្នុងនោះ ក្នុងខេត្ត ៨ នាក់ និងក្រៅខេត្ត ១នាក់ ផងដែរ៕
