(កំពត)៖ ពិធីអបអរសាទរបញ្ចូលសមាជិកថ្មី នៃគណបក្សប្រជាជន ចំនួន១២០រូបនៅមន្ទីរគណបក្សប្រជាជនកម្ពុជាខេត្តកំពត ត្រូវបានរៀបចំឡើងនៅព្រឹកថ្ងៃទី ១០ ខែធ្នូ ឆ្នាំ ២០១៧ ក្រោមវត្តមានលោក ចាន់ ចេស្ដា អភិបាលនៃគណៈអភិបាលខេត្ត និងជាប្រធានគណបក្ស ប្រជាជនខេត្តកំពត។
មានប្រសាសន៍ ពន្យល់ទៅកាន់សមាជិកថ្មីខាងលើ លោកបានលើកឡើងថា៖ «កាលគ្រាបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់ឆ្នាំ ២០១៧កន្លងមក ប្រជាពលរដ្ឋភាគច្រើន មិនមែនស្រឡាញ់អតីតគណបក្សសង្គ្រោះជាតិទេ។ ប៉ុន្តែពួកគាត់ភាគច្រើនស្រឡាញ់ អ្នកឈរឈ្មោះជាមេឃុំក្នុងមូលដ្ឋានខ្លួនប៉ុណ្ណោះ។ ហើយនៅពេលដែលអតីតគណបក្សសង្គ្រោះជាតិ ត្រូវបានរំលាយដោយសាលដិកាតុលាការកំពូល សមាជិកបក្សទាំងអស់ត្រូវបាត់បង់មុខតំណែងតួនាទី និងសុពលភាពការងារអស់ហើយ។
ដូច្នេះមានតែការចូលមករួមរស់ជីវភាពនយោបាយជាមួយគណបក្សប្រជាជនទេ ទើបអាចធ្វើឲ្យបងប្អូនដែលជា អតីតមេឃុំ ជំទប់ និងសមាជិករបស់អតីតគណបក្សសង្គ្រោះជាតិទាំងអស់់នោះមានឱកាសអាចបន្តបម្រើ និងបំពេញសេចក្តីត្រូវការ របស់ប្រជាពលរដ្ឋក្នុងមូលដ្ឋានខ្លួនតាមសេចក្តីទុកចិត្ត ដែលប្រជាពលរដ្ឋទាំងនោះ បានបោះឆ្នោតឲ្យ»។
លោក ចាន់ ចេស្តា បានមានប្រសាសន៍បន្តថា ការសម្រេចចិត្តរបស់អតីតសមាជិកគណបក្សសង្គ្រោះជាតិនាពេលនេះ គឺ ជាការសម្រេចចិត្តដ៏ត្រឹមត្រូវបំផុត មិនមែនជាការក្បត់នឹងឆន្ទៈ របស់ប្រជាពលរដ្ឋដែលខំបោះឆ្នោតគាំទ្រខ្លួនឡើយ។
លោកប្រធានគណបក្សខេត្ត ក៏បានកោតសរសើរដល់សមាជិកថ្មីទាំងអស់ ដែលបានមើលឃើញពីទង្វើក្បត់ជាតិរបស់អតីតប្រធានគណបក្សសង្គ្រោះជាតិ រួមនិងបក្សពួករបស់ខ្លួន។ ហើយបានចាត់ទុកការស្ម័គ្រចិត្ត មកចូលរួមរស់ជីវភាពនយោបាយជាមួយគណបក្សប្រជាជន គឺជាកាគិតគូរខ្ពស់ដ៏ត្រឹមត្រូវរបស់បងប្អូនសមាជិកថ្មីដើម្បីរួមជាកម្លាំងសាមគ្គីជួយគ្នាបន្តកសាងនិងអភិវឌ្ឍប្រទេសជាតិយើង ក៏ដូចជានៅក្នុងមូលដ្ឋានរបស់់ខ្លួនឲ្យបានកាន់តែរីកចម្រើនថែមទៀតតទៅថ្ងៃអនាគត ។
លោក ចាន់ ចេស្តា ក៏បានផ្ដាំផ្ញើដល់សមាជិកថ្មីចាប់ពីថ្ងៃប្រកាសនេះទៅ យើងទាំងអស់គ្នាជាសមាជិកបក្សតែមួយហើយ បើនរណាម្នាក់មានតំណែងអ្វី ហើយក្រោយការប្រកាសជាផ្លូវការរបស់ក្រសួងមហាផ្ទៃដែលនិងចេញប៉ុន្មានថ្ងៃខាងមុខនេះ មិនឃើញឈ្មោះរបស់ខ្លួនទទួលតំណែងតួនាទីនោះទេ សូមដាក់ពាក្យតវ៉ាមកគណៈកម្មាធិការអចិន្ត្រៃបក្ស ឬមករូបលោកផ្ទាល់ ព្រោះសមាជិកគណបក្សប្រជាជនទាំងអស់ តែងតែគោរពនិងអនុវត្តតាមអនុសាសន៍សម្ដេចតេជោ ហ៊ុនសែន ប្រមុខរាជរដ្ឋាភិបាល និងជាប្រធានគណបក្សប្រជាជនកម្ពុជាជានិច្ច។
សូមបញ្ជាក់់ថា ៖ ចាប់តាំងពីមានការអំពាវនាវរបស់់សម្ដេចតេជោ ហ៊ុនសែន ប្រមុខរាជរដ្ឋាភិបាលកម្ពុជា នៅមុនថ្ងៃរំលាយបក្សសង្គ្រោះជាតិ អតីតសមាជិករបស់គណបក្សមួយនេះ បានប្រញាប់ប្រញាល់ដោយស្ម័គ្រចិត្ត មកចូលរួមរស់ជីវភាពនយោបាយជាមួយគណបក្សប្រជាជនកម្ពុជាស្ទើរតែទាំងអស់ នៅទូទាំងប្រទេស។ ដោយឡែកសម្រាប់ខេត្តកំពតមានអតីតសមាជិកគណបក្ស សង្គ្រោះជាតិ ចំនួន២៥២នាក់ មានតំណែង មុខងារ តួនាទី ១៤២នាក់ និងបម្រុង១១០នាក់ បានស្ម័គ្រចិត្តមកចូលរួមរស់ជីវភាពនយោបាយជាមួយគណបក្សប្រជាជនកម្ពុជា៕
ណារិទ្ធ
