(កំពត)៖ ការប្រកួតកីឡាមហាជន ពានរង្វាន់របស់ លោក ចាន់ ចេស្ដា អភិបាលនៃគណៈអភិបាលខេត្តកំពត “បាល់ទាត់ បាល់បោះ និងប៉េតង់”(ប៊ូល) ដើម្បីជ្រើសរើស ជើងឯកទូទាំងខេត្ត ប្រចាំឆ្នាំ ២០១៧នេះ។
បន្ទាប់ពីបានដំណើរការប្រកួត អស់រយៈ ពេលជាងមួយសប្តាហ៍កន្លងមក នៅទី លានការប្រកួតនាពហុកីឡដ្ឋានខេត្ត ត្រូវ បានធ្វើពិធីបិទការប្រកួត នារសៀលថ្ងៃទី៨ ខែធ្នូឆ្នាំ ២០១៧ ក្រោមវត្តមាន លោក ចាន់ ចេស្ដាអភិបាលនៃគណៈអភិបាល ខេត្ត។
យោងតាមរបាយការណ៍លទ្ធផល នៃការ ប្រកួត លោកកៅ រិទ្ធ អនុប្រធានមន្ទីរ អប់រំយុវជននិង កីឡាខេត្តបានឲ្យដឹងថា៖ ការប្រកួតនេះបានចាប់់ដំណើរការប្រកួត ពីថ្ងៃទី ៣០ ខែវិច្ឆិកានិងត្រូវបានបញ្ចប់នៅរសៀល ថ្ងៃទី០៨ ខែធ្នូឆ្នាំ ២០១៧។ ក្នុងនោះមានការប្រកួតកីឡា បីប្រភេទគឺ បាល់់ទាត់់ បាល់បោះ និង ប៉េតង់(ប៊ូល)។
ជាលទ្ធផលក្នុងនោះមានក្រុមកីឡាករបានចូលរួមការប្រកួត ទី១- កីឡាបាល់ទាត់ មានចំនួន១០ក្រុម បាល់បោះចំនួន៦ក្រុម និង កីឡាប៉េតង់ចំនួន១៦ក្រុមមានកីឡាករសរុប៣១៦នាក់។
ចំណែកឯចំណាត់ថ្នាក់លេខ១បាល់ទាត់បានទៅលើក្រុមកីឡាករមន្ទីរការងាខេត្តដោយបានទទួលពានមួយអមប្រាក់២លានរៀលលេខ ២បានទៅលើក្រុមកីឡាករ កំពង់កណ្ដាលទទួលបានប្រាក់១លាន៥សែនរៀល និងលេខ៣បានទៅក្រុម កីឡាករស្នងការនគរបាលខេត្តកំពតទទួលបានប្រាក់១លានរៀល។
បាល់បោះលេខ១បានទៅលើក្រុមកីឡាករក្រុមហ៊ុនស៉ីម៉ង់ត៍ហ៊ស៉ីនចក្រីទីងទទួលបានពានមួយអមដោយប្រាក់១លានរៀល លេខ២បានទៅលើក្រុមកីឡាករព្រះរាជសម្ភារទទួលបានប្រាក់៨០ម៉ឺនរៀលនិងលេខ៣បាន ទៅលើក្រុមកីឡាករកំពង់់កណ្ដាលទទួលបានប្រាក់៦០ម៉ឺនរៀល។
រីឯកីឡាប៉េតង់ (ប៊ូល)លេខ១បានទៅលើក្រុមកីឡាករមន្ទីរអប់រំ(២)ទទួលបានពានមួយអមដោយប្រាក់១លានរៀលលេខ២បានទៅលើក្រុមកីឡាករស៊ុបម្លប់ក្ងោកទទួលបានប្រាក់៨០ម៉ឺនរៀល និងលេខ៣បាន ទៅលើក្រុមកីឡាករមន្ទីរអប់រំ(៣)ទទួលបានប្រាក់់៦០ម៉ឺនរៀល។
មានប្រសាសន៍សំណេះសំណាល លោក ចាន់ ចេស្ដា បានកោតសរសើរចំពោះគណៈកម្មការរៀបចំការប្រកួត ក៏ដូចកីឡាករទាំងអស់ដែលបានខិតខំយកអស់កម្លាំងកាយចិត្ត ប្រាជ្ញាស្មារតី ក្នុងដំណើរការនៃការប្រកួត ឈរលើស្មារតីបទពិសោធន៍បច្ចេកទេសធ្វើឲ្យដំណើរការនៃការប្រកួតទទួលបានលទ្ធផលជោគជ័យ។
លោក ចាន់ ចេស្ដា ក៏បានគូសបញ្ជាក់ឲ្យដឹងដែរថា៖ការប្រកួតពានរង្វាន់កីឡាទាំងបីប្រភេទនេះគឺដើម្បីអបអរសាទរនៃទិវាថ្ងៃកំណើត ២ធ្នូដែលជាថ្ងៃថ្ងៃកំណើតរណសិរ្សសាមគ្គីសង្គ្រោះជាតិកម្ពុជា ក៏ដូចជារួមចំណែកក្នុងការលើកកម្ពស់វិស័យ កីឡាកម្ពុជាផងដែរ។ ដូចនេះសូមឲ្យកីឡាករទាំងអស់ទោះបីមិនបានពាន ក៏ដោយត្រូវបន្តខិតខំពង្រឹងសមត្ថភាពបន្ថែមទៀតដើម្បីទទួលយកស្នាដៃនៅវគ្គក្រោយ៕ ណារិទ្ធ
