លោក ជា ចាន់តូ ចូលរួមផ្សព្វផ្សាយលទ្ធផលមហាសន្និបាតវិសាមញ្ញារបស់គណបក្សប្រជាជនកម្ពុជា ដល់សមាជិក សមាជិកាបក្ស ក្នុងខេត្តកំពង់ធំ
(កំពង់ធំ)៖ លោកបណ្ឌិត ជា ចាន់តូ សមាជិកអចិន្ត្រៃយ៍គណៈកម្មធិការ កណ្តាលគណបក្សប្រជាជនកម្ពុជា អញ្ជើញជាអធិបតី ក្នុងកិច្ចប្រជុំផ្សព្វផ្សាយ មហាសន្និបាតវិសាមញ្ញ តំណាងទូទាំងប្រទេស របស់គណបក្សប្រជាជនកម្ពុជាស្ដីពី លទ្ធផលនៃការអនុវត្តគោលនយោបាយឆ្នាំ២០១៨ ដល់២០២២ និងទិសដៅភារកិច្ចឆ្នាំ២០២៣ នៅខត្តកំពង់ធំ នៅថ្ងៃទី១១ ខែកុម្ភៈ ឆ្នាំ២០២៣។
លោកបណ្ឌិតលើកឡើងថា មហាសន្និបាតបានវាយតម្លៃប្រកបដោយមោទនភាពបំផុត ចំពោះសមិទ្ធផលធំៗ ជាប្រវត្តិសាស្ត្រ ដែលគណបក្សសម្រេចបានបម្រើប្រទេសជាតិ និងប្រជាជនរយៈពេល៤៤ឆ្នាំកន្លងទៅ បន្ទាប់ពីបានផ្ដួលរំលំ របបប្រល័យពូជសាសន៍ ប៉ុល ពត នៅថ្ងៃទី០៧ ខែមករា ឆ្នាំ១៩៧៩។
លើមូលដ្ឋាននេះបានបង្ហាញច្បាស់ អំពីការផ្លាស់ប្តូរជាប្រវត្តិសាស្ត្រ ដ៏ធំធេងនៃកម្ពុជា ក្នុងដំណើរឈានទៅមុខ ឥតឈប់ឈរលើមាគ៌ាសន្តិភាព ប្រជាធិបតេយ្យ និងអភិវឌ្ឍន៍
ដែលកើតចេញពីការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ពីការចូលរួមរបស់ប្រជាជនគ្រប់មជ្ឈដ្ឋាន គ្រប់ជនជាតិ គ្រប់ជំនឿសាសនា ដោយទឹកចិត្ដស្នេហាជាតិដ៏ជ្រាលជ្រៅ ពីការខិតខំរបស់គ្រប់ក្រសួង ស្ថាប័នរដ្ឋ និងអាជ្ញាធរគ្រប់លំដាប់ថ្នាក់ពីការចូលរួមនៃវិស័យឯកជន សង្គមស៊ីវិល និងមជ្ឈដ្ឋានផ្សេងៗទៀត ក្នុងការគាំទ្រ ជួយឧបត្ថមដ៏ស្មោះសរ ពីសំណាក់បណ្តាប្រទេសជាមិត្តជិតឆ្ងាយ និងសហគមន៍អន្តរជាតិ។
លោកបណ្ឌិតបន្តថា គណៈបក្សប្រជាជនកម្ពុជា បានធ្វើឲ្យកម្ពុជា ស្គាល់នូវសុខសន្តិភាពពេញលេញ និងរក្សាបានទីផ្សារម៉ាក្រូសេដ្ឋកិច្ច ក្នុងការលើកស្ទួយជីវភាពប្រជាពលរដ្ឋតាមរយៈការបង្កើនទំនាក់ទំនងជាតិ និងអន្តរជាតិ ដើម្បីសម្រេចបានសមិទ្ធផលធំៗលើគ្រប់វិស័យ ឈានទៅសម្រេចចក្ខុវិស័យនៅឆ្នាំ២០៣០ ជាប្រទេសមានចំណូលមធ្យមកម្រិតខ្ពស់។
ជាមួយគ្នានេះគណបក្សប្រជាជនកម្ពុជា ក៏បានដាក់គោលនយោបាយ៨ចំណុចបន្ថែមទៀត ឆ្ពោះទៅកាន់ការបោះឆ្នោតជ្រើសរើសតាំង តំណាងរាស្រ្ត នីតិកាលទី៧ ដែលនឹងត្រូវបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ខាងមុខ ក្នុងការការពារ និងលើកស្ទួយជីវភាពប្រជាពលរដ្ឋ តាមរយៈ ការការពារសន្តិភាព សន្តិសុខ សណ្ដាប់ធ្នាប់ និងសុវត្ថិភាពសង្គម ការផ្តល់សេវាសាធារណៈ ជូនប្រជាពលរដ្ឋប្រកបដោយ តម្លាភាព ងាយស្រួល និងជឿទុកចិត្ត, បន្តមិនយកពន្ធលើដីកសិកម្មជាលក្ខណៈគ្រួសារ ជួយកសិករក្នុងការពង្រីកផលិតកម្ម និងការរកទីផ្សារលក់កសិផល ដោយតម្លៃសមរម្យ, បន្តអនុវត្តន៍គោលនយោបាយមិនថ្លៃផាស៊ី លើការលក់ដូរកញ្ច្រែង ល្អី តាមទីផ្សារនានាទូទាំងប្រទេស បន្តតម្លើងប្រាក់បៀវត្សគ្រប់ស្ថាប័ន ប្រាក់ឈ្នួលអប្បរមារបស់កម្មករ នយោជិក,លើកកម្ពស់ការផ្តល់សេវាថែទាំសុខភាព ប្រកដោយតម្លាភាព ប្រសិទ្ធភាព និងសមធម៌ជូនប្រជាជន និងពង្រឹងការគ្រប់គ្រងជនបរទេសអន្តោប្រវេសន៍តាមច្បាប់ជាធរមាន៕
