រដ្ឋបាលខេត្តកែប បើកកិច្ចប្រជុំឆ្លងសេចក្តីព្រាងរបាយការណ៍ប្រចាំខែមករា ឆ្នាំ២០២៣
(ខេត្តកែប)៖ នៅរសៀលថ្ងៃទី៨ ខែកុម្ភៈ ឆ្នាំ២០២៣ ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្ត បានអញ្ជើញដឹកនាំកិច្ចប្រជុំ ឆ្លងសេចក្តីព្រាងរបាយការណ៍លទ្ធផលការងារប្រចាំខែមករា និងលើកទិសដៅអនុវត្តខែកុម្ភៈ ឆ្នាំ២០២៣ របស់រដ្ឋបាលខេត្តកែប។
នៅក្នុងកិច្ចប្រជុំនេះដែរ ឯកឧត្តមបណ្ឌិតអភិបាលខេត្ត បានជម្រុញដល់ស្ថាប័នពាក់ព័ន្ធជុំវិញខេត្ត ទាំងអស់ត្រូវពិនិត្យលើរបាយការណ៍ប្រចាំខែមករា ដែលរដ្ឋបាលខេត្តបានព្រាងឡើង ទៅតាមវិស័យរបស់ខ្លួន ដើម្បីអោយរបាយការណ៍មានលក្ខណៈគ្រប់ជ្រុងជ្រោយ សម្រាប់ផ្តល់ជូនទៅក្រសួងមហាផ្ទៃអោយបានទាន់ពេលវេលា។
ក្នុងនោះដែរឯកឧត្តមក៏បាន កោតសរសើរដល់ស្ថាប័នពាក់ព័ន្ធទាំងអស់ ដែលបានខិតខំអនុវត្តតួនាទីភារកិច្ច របស់ខ្លួន ធ្វើអោយការងារនៅក្នុងខែមករាកន្លងមកនេះ សម្រេចបានលទ្ធផល ផ្លែផ្កា គួរជាទីមោទនៈ ទាំងនេះបង្ហាញអោយឃើញ ពីការសាមគ្គីភាព ឯកភាពគ្នា អនុវត្តតាម ផែនការដែលរដ្ឋបាលខេត្តបានដាក់ចេញប្រចាំខែនីមួយ បានល្អប្រសើរ។
ទន្ទឹមនិងនោះ ក៏នៅមានស្ថាប័នមួយចំនួនមានការយឺតយ៉ាវ ក្នុងការផ្តល់របាយការណ៍មករដ្ឋបាលខេត្ត ដូច្នេះសូមអោយប្រធានមន្ទីរអង្គភាពពាក់ព័ន្ធ ក្រើនរំលឹកដល់ មន្ត្រីទទួលបន្ទុកធ្វើរបាយការណ៍ ដោយពន្លឿនការងារនេះ នៅខែក្រោយៗទៀត។
ជាមួយគ្នានេះឯកឧត្តមក៏បានស្នើអោយកងកម្លាំងទាំងអស់ ក៏ដូចជាមន្ទីរអង្គភាពនានា ចូលរួមជាមួយរដ្ឋបាលខេត្ត ក្នុងការគាំទ្រនូវគម្រោងអភិវឌ្ឍនានារបស់ខេត្ត ជាពិសេសគម្រោងកែលំអរឆ្នេរស្រីសរ ដើម្បីត្រៀមទទួលជាម្ចាស់ផ្ទះព្រឹត្តិការណ៍ប្រកួតកីឡាស៊ីហ្គេមនាពេលខាងមុខ។
ក្រៅពីនេះ លោកសូមអោយគ្រប់មន្ទីរជុំវិញខេត្ត រៀបចំធ្វើសន្និបាតបូកសរុបការងារប្រចាំឆ្នាំ២០២២ និងលើកទិសដៅឆ្នាំ២០២៣ អោយបានគ្រប់អង្គភាព អមជាមួយពិធី បំពាក់មេដៃ ក៏ដូចជាផ្តល់នូវប័ណ្ណសរសើរផ្សេងៗដើម្បីលើកទឹកចិត្តដល់មន្ត្រីដែលខិតខំអនុវត្តការងារបានល្អប្រសើរ៕ សេង ណារិទ្ធ
