លោក វ៉ី សំណាង៖ ខេត្តកំពង់ស្ពឺ មានរោងចក្រ សហគ្រាស គ្រឹះស្ថាន៣៨៣កន្លែង និងកម្លាំងពលកម្មជាង១៥ម៉ឺននាក់
(ភ្នំពេញ)៖ បច្ចុប្បន្ននេះ នៅទូទាំងខេត្តកំពង់ស្ពឺ មានរោងចក្រ សហគ្រាស គ្រឹះស្ថាន ចំនួន៣៨៣កន្លែង មានកម្មករ និយោជិតសរុបចំនួន១៥៥,៧៦១នាក់ (ស្រី១១៥,៥២២នាក់)។ នេះបើតាមការឲ្យដឹងពី លោក វ៉ី សំណាង អភិបាលខេត្តកំពង់ស្ពឺ ថ្លែងក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល ស្ដីពី «ភាពជោគជ័យរយៈពេល៥ឆ្នាំ របស់រដ្ឋបាលខេត្តកំពង់ស្ពឺ» នៅព្រឹកថ្ងៃទី០៩ ខែកុម្ភៈ ឆ្នាំ២០២៣។
លោកអភិបាលខេត្ត បានបញ្ជាក់ទៀតថា ក្នុងចំណោមរោងចក្រ សហគ្រាស គ្រឹះស្ថាន ចំនួន៣៨៣កន្លែងនេះ, វិស័យវាយនភ័ណ្ឌកាត់ដេរសម្លៀក បំពាក់ និងស្បែកជើងចំនួន១៨៩កន្លែង មានកម្មករនិយោជិតសរុប១៤៥,៣៩៩នាក់ ស្រី១១០,៨៤៣នាក់។
បើតាមលោក វ៉ី សំណាង ក្រៅពីនេះមានរោងចក្រធុនធំចំនួន២២៩មូលដ្ឋាន ប្រើប្រាស់កម្លាំងពលកម្មសរុបចំនួន១៣២,៥០៣នាក់ ស្រី១០២,៨៨៥នាក់ ដោយប្រើប្រាស់ទុនវិនិយោគសរុប ១,៧១៤,៨៣៦,០០០ដុល្លារ។
ដោយឡែក រោងចក្រធុនតូច និងមធ្យម និងសិប្បកម្មវិញ ត្រូវបានលោកអភិបាលខេត្តបញ្ជាក់ថា មានចំនួន១,១៣០មូលដ្ឋាន ទុនវិនិយោគចំនួន២៦,៤៤៩,៩១០ដុល្លារ ប្រើប្រាស់កម្លាំងពលកម្មសរុបចំនួន១៤,៦២០នាក់ ស្រីចំនួន៧,៧០០នាក់៕
