រដ្ឋបាលខេត្តបាត់ដំបង ប្រជុំបង្កើតក្រុមការងារ រៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣

(បាត់ដំបង)៖ រដ្ឋបាលខេត្តបាត់ដំបង បានបើកកិច្ចប្រជុំបង្កើតក្រុមការងារ ទៅតាមជំនាញដើម្បីរៀបចំសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣។

កិច្ចប្រជុំនេះ បានធ្វើឡើងនៅព្រឹកថ្ងៃទី៩ ខែកុម្ភៈ ឆ្នាំ២០២៣ នៅសាលប្រជុំសាលាខេត្ត ក្រោមវត្តមានលោក សឿម ប៊ុនរិទ្ធ អភិបាលស្តីទីអភិបាលខេត្តបាត់ដំបង ដោយមានការចូលរួមពី ថ្នាក់នាយករងរដ្ឋបាលខេត្ត ទីចាត់ការ ការិយាល័យជំនាញ កងកម្លាំង មន្រ្តីរាជការ គ្រប់ជំនាញ នៃសាលាខេត្តជាច្រើននាក់ចូលរួមផងដែរ។

នាឱកាសនោះ លោក សឿម ប៊ុនរិទ្ធ អភិបាលស្តីទី បានធ្វើការណែនាំដល់ក្រុមការងារ រៀបចំ សន្និបាត រដ្ឋបាលខេត្តបាត់ដំបង ប្រជុំបង្កើតក្រុមការងាររៀបចំ បែងចែកសន្និបាត បូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ រយៈពេល២ថ្ងៃ ត្រូវនឹងថ្ងៃទី២៨ ខែកុម្ភៈ ដល់ថ្ងៃទី១ ខែមីនា ឆ្នាំ២០២៣ ដែលបានចាត់តាំងរៀបចំរួចហើយ។

លោក សឿម ប៊ុនរិទ្ធ បានបញ្ជាក់ថា ចំពោះមន្រ្តីពាក់ព័ន្ធ ដែលមានឈ្មោះរួចហើយ ត្រូវយកចិត្តទុកដាក់ សហការគ្នា ធ្វើកិច្ចការងារនេះ ទៅតាមក្រុមដែលខ្លួនទទួលបន្ទុកនីមួយៗ ឲ្យបានគ្រប់ជ្រុងជ្រោយ ពីពេលនេះ រហូតដល់ថ្ងៃបើក និងបិទសន្និបាត សម្រាប់រដ្ឋបាលខេត្តបាត់ដំបង ប្រកបដោយជោគជ័យ។

លោកបានបន្តថា ចំពោះការងាររៀបចំឯកសារ សម្រាប់យកទៅធ្វើបទអន្តរាគមន៍ និងការធ្វើបទបង្ហាញដែលមានពាក់ព័ន្ធ ការងារបរិស្ថាន សន្តិសុខ សណ្តាប់ធ្នាប់សង្គម ពិសេសគោលនយោបាយភូមិ-ឃុំ មានសុវត្តិភាព ដែលមាន៧ចំណុច និងការងារផ្សេងៗទៀត។

លោកបានបន្ថែមថា ចំពោះប្រធានបទពាក់ព័ន្ធនឹងបទអន្តរាគមន៍ទាំងអស់ សម្រាប់យកមកធ្វើបទបង្ហាញ ជូនគណៈអធិបតី ដែលមានសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ប្រធានក្រុមការងារចុះជួយមូលដ្ឋានខេត្តបាត់ដំបង និង ប្រតិភូក្រសួងមហាផ្ទៃអមដំណើរ សមាជិកព្រឹទ្ធសភា រដ្ឋសភា ប្រធានក្រុមការងាររាជរដ្ឋាភិបាលចុះមូលដ្ឋាន ក្រុង ស្រុក ឃុំ សង្កាត់បានទស្សនា និងបានស្តាប់ នៅក្នុងអង្គសន្និបាតនេះផងដែរ។

ក្នុងឱកាសនោះដែរ ថ្នាក់ដឹកនាំ ពាក់ព័ន្ធមួយចំនួនបានឡើងមានមតិចូលរួម ពីចំណុចខ្វះខាត និងបានស្នើដល់ថ្នាក់ដឹកនាំ ជួយសម្របសម្រួលបំពេញបន្ថែម ដើម្បីឲ្យការងារនេះ ប្រព្រឹត្តទៅបានទទួលជោគជ័យ៕