នគរបាលខេត្តបន្ទាយមានជ័យ ពន្លឿនការធ្វើអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋទើបគ្រប់អាយុ និងអ្នកហួសសុពលភាព
ខេត្តបន្ទាយមានជ័យ៖ដោយមានការណែនាំ និងការដាក់បទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយ នគរបាលទាំងអស់ត្រូវពង្រឹងប្រសិទ្ធភាពការងារ ការយាមល្បាត ការផ្តល់សេវាសេវាធារណ:ជូនប្រជាពលរដ្ឋ ការផ្សព្វផ្សាយអំពីគោលនយោបាយ ភូមិឃុំមានសុវត្ថិភាព ដើម្បីរួមចំណែកក្នុងការទប់ស្កាត់បទល្មើសព្រហ្មទណ្ឌ និងបទល្មើសអសន្តិសុខផ្សេងៗតាមមូលដ្ឋាន។
នៅថ្ងៃទី១៩ ខែមករា ឆ្នាំ២០២៣នេះ កម្លាំងនគរបាលគ្រប់អធិការដ្ឋាននគរបាលស្រុក-ក្រុង បានយកចិត្តទុកដាក់ ក្នុងការផ្តល់សេវាសាធារណះ (ការធ្វើអត្តសញ្ញាណប័ណ្ណសញ្ជាតិខ្មែរ, សៀវភៅស្នាក់នៅ, សៀវភៅគ្រួសារ) ត្រូវបានពន្លឿនជូនប្រជាពលរដ្ឋឲ្យបានទាន់ពេលវេលា ដើម្បីយកឯកសារផ្លូវការណ៍ទាំងនោះទៅប្រើប្រាស់ជាប្រយោជន៍ ក្នុងការប្រកបរបរចិញ្ចឹមជីវិតប្រចាំថ្ងៃ។
ក្រៅពីនេះកម្លាំងនគរបាលទូទាំងខេត្ត ក៏បានបន្តចុះផ្សព្វផ្សាយគោលនយោបាយភូមិឃុំមានសវត្ថិភាព, ផ្សព្វផ្សាយផលប៉ះពាល់គ្រឿងញៀន និងគ្រាប់មីន។ ក្នុងនោះក៏បានត្រៀមកម្លាំងប្រចាំការ ២៤ម៉ោងលើ២៤ម៉ោង សម្រាប់ត្រៀមអន្តរាគមន៍ក្នុងករណីគ្រប់អគ្គីភ័យ និងគ្រោះធម្មជាតិផ្សេងៗផងដែរ។
នគរបាលខេត្តបន្ទាយមានជ័យ សូមអំពាវដល់ បងប្អូនប្រជាពលរដ្ឋ ដល់ពលរដ្ឋហួសសុពលភាព និងពលរដ្ឋទើបគ្រប់អាយុ ត្រូវមកធ្វើអត្តសញ្ញាណប័ណ្ណឲ្យបានគ្រប់ៗ ដើម្បីយកទៅប្រើប្រាស់ក្នុងការងារនិងការរកទទួលទានប្រចាំថ្ងៃ ពិសេសជៀសវាងបាត់បង់ឱកាសក្នុងការចូលរួមបោះឆ្នោតជ្រើសរើសតំណាងរាស្ត្រ អាណត្តិទី៧ ឆ្នាំ២០២៣ឆាប់ៗខាងមុខនេះ៕
