ទិវាជ័យជម្នះ ៧ មករា, អភិបាលខេត្តកំពង់ស្ពឺ អំពាវនាវប្រជាជនរួមជាតិ រួមគ្នាថែរក្សាសន្តិភាព និងកម្ចាត់ក្រុមនយោបាយជ្រុលនិយម ដែលចង់បំផ្លាញដល់សុខសន្តិភាពកម្ពុជា
(កំពងស្ពឺ)៖ លោក យឹម សុខុម ប្រធានក្រុមប្រឹក្សាខេត្ត និងលោក វ៉ី សំណាង អភិបាលខេត្តកំពង់ស្ពឺ រួមនឹងមន្ត្រីរាជការ កងកម្លាំងប្រដាប់អាវុធទាំង៣ ប្រជាពលរដ្ឋ សិស្សានុសិស្សជិត ៦,០០០នាក់ នៅថ្ងៃទី០៧ ខែមករា ឆ្នាំ២០៣នេះ បានប្រារព្ធពិធីអបអរសាទរខួប៤៤ឆ្នាំ នៃថ្ងៃជ័យជម្នះ ៧ មករា (០៧ មករា ១៩៧៩-០៧ មករា ២០២៣) នាមុខសាលាខេត្តកំពង់ស្ពឺ ដ៏មហាឡារឹកក្រៃលែង។
បន្ទាប់ពីបានអានសាររបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា, លោក វ៉ី សំណាង បានលើកឡើងថា «ក្នុងនាមប្រជាជនកម្ពុជាទាំងអស់គ្នា នាំគ្នាថែរក្សាការពារនូវសុខ សន្តិភាពរបស់ប្រទេសកម្ពុជានៃយើង ដែលមានសព្វថ្ងៃនេះ ហើយទប់ស្កាត់ និងកម្ចាត់នយោបាយជ្រុលនិយម ដែលចង់បំផ្លាញដល់សុខសន្តិភាពរបស់ប្រទេសជាតិ»។
លោកអភិបាលខេត្តកំពង់ស្ពឺ បានបន្ថែមថា ៤៤ឆ្នាំកន្លងទៅនេះ គឺជា៤៤ឆ្នាំ នៃសាមគ្គីភាព៤៤ឆ្នាំ នៃការតស៊ូអនុវត្តគ្រប់កិច្ចការប្រកបដោយ វីរភាព និងជា៤៤ឆ្នាំ នៃជ័យជម្នះរបស់ប្រជាជនកម្ពុជា។ ការតស៊ូពុះពាររបស់យើង បានកែប្រែមាតុភូមិពី ទឹកដីមរណៈ មកជាទឹកដីលូតលាស់ដ៏ស្រស់បំព្រងប្រកបដោយមោទនភាពបំផុត ដែលបានបង្កើនជំនឿ និងពង្រឹងការតាំងចិត្តរបស់យើង ដើម្បីសម្រេចនូវសមិទ្ធផលថ្មីៗទៀតក្នុងការអភិវឌ្ឍសង្គម-សេដ្ឋកិច្ច និងការកសាងអនាគតដ៏រុងរឿងសម្រាប់កូនចៅយើងគ្រប់ជំនាន់តទៅមុខទៀត ដោយគ្មានការកើតមានជាថ្មីនូវសង្គ្រាមការបែកបាក់ជាតិ និងអំពើប្រល័យពូជសាសន៍ដូចពីអតីតកាលឡើយ។
សូមបញ្ជាក់ថា ដើម្បីអបអរសាទរខួប៤៤ឆ្នាំ នៃថ្ងៃជ័យជម្នះ ៧ មករា រដ្ឋបាលខេត្តកំពង់ស្ពឺ បានរៀបចំឱ្យមានការលេងរបាំអបអរ និងការប្រគុំតន្ត្រីជូនអ្នកចូលរួមទស្សនាមើលកម្សាន្តយ៉ាងសប្បាយរីករាយផងដែរ៕
