(ខេត្តស្វាយរៀង): លោក ហែម ស៊ីណា អភិបាលស្រុករំដួល និងក្រុមការងារ បានអញ្ជើញជួបសំណេះសំណាលជាមួយលោកគ្រូ អ្នកគ្រូ និងអាណាព្យាបាលសិស្សនិងចែកប័ណ្ណសរសើរដល់សិស្សានុសិស្ស ចំនួន១១៥នាក់នៅវិទ្យាល័យហ៊ុនសែន ពងទឹក ដែលជាប់ចំណាត់ថ្នាក់លេខ១ ដល់លេខ៥ ចាប់ពីថ្នាក់ទី៧ដល់ ទី១២ ។
ពិធីនេះធ្វើឡើងនាព្រឹកថ្ងៃទី២១ ខែវិច្ឆិកា ឆ្នាំ ២០២២នៅវិទ្យាល័យហ៊ុនសែន ពងទឹក ដែលស្ថិតនៅក្នុងភូមិទូលតាកែវ ឃុំពងទឹក ស្រុករំដួល ខេត្តស្វាយរៀង ។
ក្នុងពិធីនេះដែរក៏មានការអញ្ជើញចូលរួមពីមន្ត្រីសាលាស្រុក លោកប្រធានអនុប្រធានការិយាល័យអប់រំស្រុក លោកមេឃុំ លោកនាយកនាយករង លោកគ្រូ អ្នកគ្រូ អាណាព្យាបាលសិស្ស និងសិស្សានុសិស្សជាច្រើនរូបទៀត ។
ក្នុងឱកាសនោះលោកហែម សុីណា អភិបាលស្រុករំដួល ក៏បានជំរុញនិងលើកទឹកចិត្តដល់ក្មួយៗសិស្សានុសិស្សទាំងអស់ ដែលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ត្រូវខិតខំប្រឹងប្រែងយកចិត្តដាក់ក្នុងការរៀនសូត្រឱ្យអស់ពីសមត្ថភាព ។
លោកអភិបាលស្រុករំដួលបន្តថា ក្មួយត្រូវធ្វើឱ្យបានលើគ្រប់វិញ្ញាសារក្នុងការប្រឡងប្រឡងឱ្យបានជាប់និទ្ទេសល្អទាំងអស់គ្នា ជាពិសេសបើប្រឡងជាប់បាននិទ្ទេស A ក្មួយៗ មានកិត្តិយសនិងលើកមុខមាត់ដល់ឪពុកម្ដាយក្រុមគ្រួសារក្មួយ ថែមទាំងបានអំណោយនិងវត្ថុ អនុស្សាវរីយ៍ពីឯកឧត្តមអភិបាលខេត្តខេត្តស្វាយរៀងហើយនិងលើកមុខមាត់ស្រុករំដួលយើងផងដែរ ។
ជាមួយគ្នានេះដែរ លោក ហែម សុីណា អភិបាលស្រុករំដួល ក៏បានជូនពរដល់សិស្សានុសិស្សទាំងអស់ឱ្យទទួលបានលទ្ធផលជោគជ័យ និងទទួលបាននិទ្ទេសល្អគ្រប់ៗគ្នា ហើយក៏សូមអរគុណដល់លោកគ្រូអ្នកគ្រូទាំងអស់ដែលបានយកចិត្តទុកដាក់ខិតខំបង្រៀនដល់សិក្សានុសិស្ស នៅវិទ្យាល័យហ៊ុន សែន ពងទឹក ផងដែរ៕
