ខេត្តប៉ៃលិន៖ អនុរដ្ឋលេខាធិការក្រសួងបរិស្ថាន លោក មាស សុផល និងលោក ហុក សុផល អភិបាលរងខេត្តប៉ៃលិន បានដឹកនាំមន្ទីរជំនាញពាក់ព័ន្ធ អាជ្ញាធរមូលដ្ឋាន អាជ្ញាធរមីនកម្ពុជា ស៊ីម៉ាក់ ចុះពិនិត្យការបោសសម្អាតចម្ការមីនចំនួន ១៦ចម្ការ របស់អាជ្ញាធរកម្ពុជា គ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន និងចុះពិនិត្យករណីស្នើសុំជួសជុលផ្លូវលំក្រាលគ្រួសក្រហម ១ខ្សែ របស់រដ្ឋបាលខេត្តប៉ៃលិន ស្ថិតនៅក្នុងភូមិសាស្ត្រ ភូមិភ្នំដំបង ភូមិអូរស្លេវ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ព្រឹកថ្ងៃទី៥ ខែវិច្ឆិកា ឆ្នាំ២០២២។
លោក មាស សុផល អនុរដ្ឋលេខាធិការក្រសួងបរិស្ថាន បានជំរុញមន្ដ្រីជំនាញពាក់ព័ន្ធចុះពិនិត្យទីតាំងចម្ការមីនទាំង១៦ ចម្ការ និងទីតាំងជួសជុលផ្លូវ ១ខ្សែ ប្រវែង៦គីឡូម៉ែត្រ ទទឹង ៣០ម៉ែត្រ ដោយប្រេីប្រាស់កម្លាំងជំនាញអង្គភាព CMAC បោសសម្អាតមីន នៅសងខាងផ្លូវពីភ្នំដំបងទៅអូរស្លេវ បានបោសសម្អាតរួចរាល់ចំនួន ៩ចម្ការមីន ស្មើនឹងផ្ទៃដី ៤១ហិកតា នៅសល់ ៧ចម្ការមីន ដែលនឹងបញ្ចប់ការបោសសម្អាតមីននៅចុងឆ្នាំ២០២២។
ជាមួយគ្នានេះដែរ លោក ហុក សុផល អភិបាលរងខេត្តប៉ៃលិន បានឱ្យដឹងថា ការចុះពិនិត្យនេះក្នុងគោលបំណងដោះស្រាយបញ្ហានានាជូនប្រជាពលរដ្ឋ ក្នុងនោះជួសជុលផ្លូវគ្រួសក្រហមពីភ្នំដំបងទៅអូរស្លេវ ដែលផ្តល់ផលប្រយោជន៌ជាច្រេីនដូចជានលើកកម្ពស់សេដ្ឋកិច្ច ងាយស្រួលដឹកជញ្ជូនកសិផល កសិផលមានតម្លៃ បម្រើឲ្យវិស័យសុខាភិបាល ដូចជាស្ត្រីឆ្លងទន្លេ ឈឺថ្កាត់យប់ព្រលប់ សិស្សសាលាងាយស្រួលក្នុងការធ្វើដំណើរ ពិសេសតំបន់យុទ្ធសាស្ត្រកងទ័ព៕
