ក្រចេះ ៖ ព្រះរាជាណាចក្រកម្ពុជា បាននិងកំពុងមានសន្តិភាព មានការអភិវឌ្ឍន៍រីកចំរើនលើគ្រប់វិស័យ ទាំងពុទ្ធចក្រ និងអាណាចក្រ ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ។ អនុវត្តតាមមាគ៌ាប្រកបដោយគតិបណ្ឌិតរបស់សម្តេចតេជោ ឯកឧត្តម លោកឧកញ៉ា គង់ ក្រឹង និងលោកជំទាវក៏បានរូមចំណែកយ៉ាងសកម្មក្នុងការអភិវឌ្ឍន៍ រួមចំណែកកសាងនូវស្នាដៃ និងសមិទ្ធផលជាច្រើន ជូនដល់សង្គមជាតិ និងរាជរដ្ឋាភិបាល ។
ហេដ្ឋារចនាសម្ព័ន្ធ នៅតាមបណ្តាមូលដ្ឋានជាច្រើនដោយបានកសាងសមិទ្ធផលជាបន្តបន្ទាប់រួមទាំងផ្នែកពុទ្ធចក្រ និងអាណាចក្រ ដែលជាស្នាដៃដ៏ថ្លៃថ្លា របស់ ឯកឧត្តម លោកឧកញ៉ា គង់ ក្រឹង និងលោកជំទាវ បាននិងកំពុងបំពេញនូវតម្រូវការរបស់ប្រជាពលរដ្ឋ ដែលធ្វើឲ្យពួកគាត់គោរពស្រឡាញ់ និងកោតសរសើរជាខ្លាំងដល់ការងារដឹកនាំ របស់ឯកឧត្តម ឧកញ៉ា និងលោកជំទាវ ។
តាមរយៈការរៀបរាប់ត្រួសៗ ដូចជា ការកសាងបន្ទាយអង្គភាពវរៈសេនាតូចការពារព្រំដែនលេខ ២០៤ និងបានឈូសឆាយធ្វើផ្លូវក្រាលគ្រួសក្រហមភ្ជាប់ពីផ្លូវជាតិ រហូតទៅដល់ព្រំដែនកម្ពុជា-វៀតណាម ។ មិនតែប៉ុណ្ណោះ ឯកឧត្តម និងលោកជំទាវបានកសាងនូវក្លាងទ្វារវិហារអើសម៉ាតុល ហាសាណះ បានហើយរួចរាល់ជាស្ថាពរ កាលពីថ្ងៃទី ០១ ខែកុម្ភៈ ឆ្នាំ២០១៧ ដោយបានភ្ជាប់ជាមួយនឹងផ្លូវចាក់បេតុងចំនួន ១ខ្សែទៀត ប្រវែង ១០០០ម៉ែត្រ ស្ថិតនៅក្នុងភូមិច្រាស់ថ្មី ឃុំ២ធ្នូ ស្រុកស្នួល ខេត្តក្រចេះ ដែលបានចំណាយថវិកាផ្ទាល់ខ្លួន ចំនួន ២២លាន និង៥ម៉ឺនរៀល ។
ផ្តល់បទសម្ភាសន៍ដល់អ្នកសារព័ត៌មាន ឯកឧត្តម លោកឧកញ៉ា គង់ ក្រឹង និងលោកជំទាវ បានបញ្ជាក់ឲ្យដឹងថា សមិទ្ធផលទាំងអស់នេះ សុទ្ធសឹងតែជាថវិកា ផ្ទាល់ខ្លួនរបស់ ឯកឧត្តម លោកឧកញ៉ា ។ សមិទ្ធផលដ៏ធំមួយទៀត គឺ ឯកឧត្តម និងលោកជំទាវ គឺកសាងសួនច្បារ២ធ្នូ ស្ថិតក្នុងភូមិច្រាស់ថ្មី ឃុំ២ធ្នូ ស្រុកស្នួល ខេត្តក្រចេះ ដែលគិតជាទឹកប្រាក់មានតម្លៃ ស្មើនឹង ៦៨០០០ដុល្លារ ។ ក្នុងនោះដែរ ឯកឧត្តម និងលោកជំទាវបានធ្វើបង្គន់អនាម័យ និងដាក់អំពូលភ្លើងនៅបរិវេណវិមានអនុស្សាវរីយ៍២ធ្នូ ស្ថិតក្នុងឃុំ២ធ្នូ ស្រុកស្នួល ខេត្តក្រចេះ ។
ទោះបីជាសមិទ្ធផលខាងលើមានច្រើនបង្គួរក៏ពិតមែន មិនមែនត្រឹមប៉ុណ្ណេះទេ ឯកឧត្តម និងលោកជំទាវបានកសាងនូវសមិទ្ធផលជាច្រើនផ្សេងទៀត ឥតឈប់ឈរ ប្រយោជន៍ដើម្បីបំរើដល់សង្គមជាតិ និងបងប្អូនប្រជាពលរដ្ឋជាទូទៅ ដូចជា ការកសាងផ្លូវ ដែលសុទ្ធតែជាតម្រូវការចាំបាច់បំផុតដល់ការធ្វើដំណើររបស់ពុកម៉ែបងប្អូនទាំងអស់ ។ ជាក់ស្តែង ផ្លូវក្រាលគ្រួសក្រហមមួយខ្សែប្រវែង ១៥០០០ម៉ែត្រ ដែលមានតម្លៃស្មើនឹងថវិកាចំនួន ១១០០០ ដុល្លារអាមេរិក គឺជាសមិទ្ធផលដ៏ធំធេងមួយផ្សេងទៀត ដែលទាំងនេះ គឺសុទ្ធតែជា ថវិការបស់ ឯកឧត្តម លោកឧកញ៉ា គង់ ក្រឹង និងលោកជំទាវ ។
សមិទ្ធផលទាំងអស់នេះ មិនមែនជាការចៃដន្យទេ ប៉ុន្តែគឺជា ឆន្ទៈ និងជាទឹកចិត្តដ៏ថ្លៃថ្លា របស់ ឯកឧត្តម លោកឧកញ៉ា គង់ ក្រឹង និងលោកជំទាវ ដែលប្រកបដោយសប្បុរស និងភាពជាអ្នកដឹកនាំប្រកបដោយគតិបណ្ឌិត ដោយតែងគិតគូរយកចិត្តទុកដាក់ចំពោះកូន ចៅក្រោមឱវាទ និងប្រជាពលរដ្ឋដោយមិនប្រកាន់វណ្ណៈភាពរើសអើង ឬប្រកាន់ឋានៈទាបខ្ពស់នោះទេ ជាហេតុធ្វើឲ្យ មន្ត្រីក្រោមឱវាទ និងកូនចៅតែងតែគោរពស្រឡាញ់គ្រប់ៗគ្នា និងមានទំនុកចិត្ត និងភាពកក់ក្តៅ ស្រឡាញ់គាំទ្រដោយស្មោះស្ម័គ្រលើ ឯកឧត្តម លោកឧកញ៉ា និងលោកជំទាវ ក៏ដូចជាជំហរដឹកនាំរបស់គណបក្សប្រជាជនកម្ពុជា ៕
