ខេត្តប៉ៃលិន ៖ រហូតមកដល់ពេលនេះ នៅព្រំដែនកម្ពុជា ថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ មានកាស៊ីណូជាច្រើន រីកដុះដូចផ្សិត និងកំពុងសាងសង់ថ្មីៗ បន្ថែមទៀតផងដែរ ។ កាស៊ីណូភាគច្រើន ត្រូវម្ចាស់បើកដៃឱ្យមន្ត្រីរាជការ និងប្រជាពលរដ្ឋខ្មែរ ចូលលេងយ៉ាងគគ្រឹកគគ្រេង បណ្តាលឱ្យចាញ់អស់ម៉ូតូ រថយន្ត និងលក់ដីស្រែ ចំការ អស់គ្មានសល់ឡើយ ។ តែគេមិនឃើញមានអាជ្ញាធរ មូលដ្ឋាន ឬសមត្ថកិច្ចនគរបាលណាម្នាក់ ចុះទៅត្រួតពិនិត្យ ដើម្បីធ្វើការហាមឃាត់ពួកគេនោះឡើយ ដោយបំពាននឹងច្បាប់ដែលក្រសួងបានចេញសារាចរណ៍ណែនាំ ឱ្យតែបរទេសចូលលេងប៉ុណ្ណោះ ។
បើតាមប្រភពពីអ្នកចូលទៅមើលគេលេងល្បែងបញ្ជល់មាន់បានអះអាងកាលពីព្រឹកថ្ងៃទី១៦ ខែសីហា ឆ្នាំ២០១៧ នេះថា កាស៊ីណូមួយឈ្មោះ ណាសាវើល ក្នុងចំណោមកាស៊ីណូទាំងអស់ ដែលទើបនឹងសាងសង់បានរយ:ពេលជិត១ឆ្នាំមកហើយ ជារបស់អ្នកស្រី ស៊ុំ ហ៊ាង បានបើកលេងល្បែងបញ្ជល់មាន់ ដោយអនុញ្ញាតិឱ្យខ្មែរចូលលេងយ៉ាងពពាក់ពពូន អស់រយ:ពេលជាច្រើនខែមកហើយ ។
ប្រភពបន្តទៀតថា ការបើកឱ្យលេងល្បែងនេះ អត់ឃើញមានបរទេសចូលលេងឡើយ គឺមានសុទ្ធតែមន្ត្រីរាជការ និងប្រជាពលរដ្ឋខ្មែរ ចូលលេងប៉ុណ្ណោះ ដោយមកពី ខេត្តប៉ៃលិន បាត់ដំបង បន្ទាយមានជ័យ សៀមរាប ពោធិ៍សាត់ តាកែវ និងខេត្តនានា ជាច្រើនទៀត ថែមទាំងរាជធានីភ្នំពេញផងដែរ ហើយមានអ្នកចាញ់រហូតដល់រាប់ពាន់ រាប់ម៉ឺនដុល្លារឯណោះ ។ ក្នុងការចូលទៅមើលគេលេងល្បែងនេះ ត្រូវទិញសំបុត្រម្នាក់ៗ ត្រូវបង់ប្រាក់អស់៥០០០រៀល ថ្លៃផ្ញើម៉ូតូ២០០០រៀល និងថ្លៃផ្ញើរថយន្ត៥០០០រៀលផងដែរ ។
ចំណែកអ្នកញៀននឹងល្បែងមាន់ជល់ខាងលើ បានឱ្យដឹងថា បើពួកគេនាំគ្នាលេងនៅតាមភូមិក្រៅពីនេះ ទោះបីដាក់លុយតិចតួច ដើម្បីកំសាន្តសប្បាយក៏ដោយ ពេលសមត្ថកិច្ចនគរបាលឃើញ នឹងចាប់ឃាត់ខ្លួន បញ្ជូនទទៅស្នងការ ដើម្បីផាកពិន័យយ៉ាងចាស់ដៃ មិនឱ្យបន្តលេងនោះឡើយ ហើយបើចង់លេងទៀត ទាល់តែនាំគ្នាចូលទៅលេងក្នុងកាស៊ីណូណាសាវើល ទើបបានរួចខ្លួន និងមានសុវត្ថិភាព ព្រោះគេចង់ឱ្យនាំគ្នាទៅលេងតែមួយកន្លែងប៉ុណ្ណោះ ។ ប្រភពបន្តទៀតថា ការលេងល្បែងបញ្ជល់មាន់នេះ មានពីរប្រភេទ ដោយអ្នកលេងខ្នាយដែក បើកជល់ចាប់ពីថ្ងៃចន្ទដល់ថ្ងៃព្រហស្បតិ៍ ហើយអ្នកលេង ខ្នាយស្មងចាប់ពីថ្ងៃពុធ ដល់ថ្ងៃសុក្រ ដោយដាក់ដើមផាន់(ដើមទុន) រាប់ម៉ឺនដុល្លារផងដែរ ។
ពាក់ព័ន្ធទៅនឹងបញ្ហានេះលោកស្រី សុំ ហ៊ាង ជាម្ចាស់កាស៊ីណូណាសាវើលខាងលើ បានឱ្យដឹងថា កាស៊ីណូរបស់លោកស្រី មានច្បាប់ត្រឹមត្រូវ ហើយក៏បើកឱ្យខ្មែរ និងថៃចូលលេងដូចគ្នា ។
ការលេងល្បែងបញ្ជល់មាន់នេះ អត់មានការលក់សំបុត្រនោះឡើយ ដោយយកតែថ្លៃផ្ញើម៉ូតូប៉ុណ្ណោះ និងរថយន្តប៉ុ ណ្ណោះ ។ លោកស្រីបន្តទៀតថា ប្រហែលជាត្រូវបិទការលេងល្បែងមាន់ជល់ឆាប់ៗនេះហើយ ព្រោះថ្លង់ដល់ភ្ញៀវ ដែលស្នាក់នៅក្នុងសណ្ឋាគាររបស់លោកស្រី ដែលទើបនឹងសាងសង់រួចថ្មីៗ ។
ម្យ៉ាងវិញទៀត តាមច្បាប់មិនឱ្យខ្មែរចូលលេងនោះទេ តែបើពួកគេមកលេងហើយ មិនអាចធ្វើការហាមឃាត់នោះដែរ ។
ចំណែកលោក ជា ចាន់ឌិន ស្នងការនគរបាលខេត្តប៉ៃលិន បានឱ្យដឹងយ៉ាងខ្លីថា កាស៊ីណូខាងលើ លោកអត់ដឹងថាមានគេបើកលេងល្បែងមាន់ជល់ ឬយ៉ាងណាទេ ព្រោះខាងលោកមិនដែលធ្លាប់ទៅមើលគេលេងផង ហើយក៏បិទទូរស័ព្ទភ្លាមៗ តែម្តង ៕
នីយ៉ា
