កំពត ៖ ក្មេងប្រុសជំទង់ម្នាក់បានរងរបួសត្រង់ក្បាលយ៉ាងតំណំ ត្រូវគេប្រទះឃើញដេកសន្លប់ស្តូកនៅតាមដងផ្លូវជាតិលេខ៣ ហើយករណីនេះសង្ស័យក្មេងរងគ្រោះជិះម៉ូតូបុកដុំថ្មដែលនៅចិញ្ចើមផ្លូវទើបរអិលដួលគ្រោះថ្នាក់ធ្ងន់ធ្ងរបែបនេះ។
ហេតុការណ៍ភ្ញាក់ផ្អើលបានកើតឡើង កាលពីវេលាម៉ោង៧យប់ ថ្ងៃទី៨ខែសីហា ឆ្នាំ២០១៧ ត្រង់ចំណុចភូមិព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត ចំងាយពីស្ពានស្រះប៉ោងប្រហែល៧០ម៉ែត្រ តាមបណ្តោយផ្លូវលេខ៣។
សាក្សីមួយចំនួនបានឲ្យដឹងថា មុនពេលជួបករណីដូចខាងលើ គ្មាននរណាម្នាក់បានឃើញហេតុការណ៍ផ្ទាល់ភ្នែកទេ ប៉ុន្តែគ្រាន់តែដឹងថា ក្មេងប្រុសរងគ្រោះជិះម៉ូតូម៉ាកស្កុបពីម្នាក់ឯងក្នុងទិសដៅពីជើងទៅត្បូង ក្នុងគោលបំណងយកពិលទៅឲ្យបងរបស់គេ ដែលមានទីលំនៅក្នុងទីរួមខេត្តកំពត។សាក្សីដដែលបានអះអាងថា ក្មេងប្រុសរងគ្រោះសង្ស័យពេលជិះម៉ូតូត្រូវរថយន្តបញ្ចាំងភ្លើងហ្វាដាក់មុខទើបងងឹតភ្នែកមើលពុំឃើញផ្លូវ ទើបជ្រុលទៅបុកដុំថ្មនៅចិញ្ចើមផ្លូវរអិលដួលរងរបួសធ្ងន់តែម្តង។
តាមការឲ្យដឹងពីសមត្ថកិច្ចមូលដ្ឋាន បញ្ជាក់ថា ក្មេងប្រុសរងគ្រោះ មានឈ្មោះ ឆយ ច្រន អាយុ១៦ឆ្នាំ មុខរបរជាសិស្ស មានទីលំនៅភូមិអន្លង់គគីរ ឃុំកណ្តោល ស្រុកទឹកឈូ ខេត្តកំពត ជនរងគ្រោះជិះម៉ូតូម្នាក់ឯង ម៉ាកស្កុបពី ពណ៌ស ពាក់ស្លាកលេខ ភ្នំពេញ 1CR-2223។ហើយគ្រោះថ្នាក់នេះគឺបង្កដោយខ្លួនឯងគ្មានប៉ះទង្គិចជាមួយអ្នកណាឡើយ។
បច្ចុប្បន្នជនរងគ្រោះត្រូវបានក្រុមគ្រួសារ ដឹកបញ្ជូនទៅសង្គ្រោះព្យាបាលនៅឯគ្លីនិក សម្ភពបូកគោ ក្នុងក្រុងកំពត។ដោយឡែកមធ្យោបាយ សមត្ថកិច្ចបានរក្សាទុកសម្រាប់ប្រគល់ជូនអាណាព្យាបាលយកទៅជួសជុលវិញ ៕
ណារិទ្ធ
