ខេត្តប៉ៃលិន ៖ ឃាតករដែលបាញ់សម្លាប់ស្ត្រីជាសង្សារនៅក្នុងផ្ទះ សំណាក់យីហោសារីធំ ត្រូវសមត្ថកិច្ចចាប់ខ្លួនបានហើយ កាលពីវេលាម៉ោង១១៖២០នាទី ថ្ងៃទី៩ ខែសីហា ឆ្នាំ២០១៧ នៅចំណុចភូមិដីស ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ក្រោយពីសម្លាប់នារីជាសង្សារហើយរត់ទៅគេចខ្លួននៅទីនោះ បច្ចុប្បន្ន ជនសង្ស័យត្រូវបាននាំខ្លួនពីខេត្ត ប៉ៃលិន មករាជធានីភ្នំពេញនៅរសៀលថ្ងៃ ទី៩ ខែសីហា ឆ្នាំ២០១៧ ។
សមត្ថកិច្ចបានឲ្យដឹងថា៖ ដោយអនុវត្តតាមដីកាបញ្ជា ឲ្យចូលខ្លួនលេខ២០៧អ.យ.ឋ ចុះថ្ងៃទី៨ ខែសីហា ឆ្នាំ២០១៧ របស់ព្រះរាជអាជ្ញារង សៀង សុខ កំលាំងជំនាញក្រោមកិច្ចសហការ រវាងកម្លាំងកងរាជអាវុធ ហត្ថលើផ្ទៃប្រទេស ,កងរាជអាវុធហត្ថរាជ ធានីភ្នំពេញ និងកងរាជអាវុធហត្ថខេត្តប៉ៃលិន សមត្ថកិច្ចបានឃាត់ខ្លួនជន សង្ស័យឈ្មោះ អ៊ុំ សុផា ភេទប្រុស អាយុ ៣០ឆ្នាំ ដែលកំពុងលាក់ខ្លួននៅចំណុចភូមិដីស ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
សូមរំលឹកថា៖ កាលពីវេលាម៉ោង ០០៖៥៥នាទី រំលងអាធ្រាត ឈានចូលថ្ងៃទី១០ ខែធ្នូ ឆ្នាំ២០១៦ជនសង្ស័យ ជាមន្ត្រីកងរាជអាវុធហត្ថបានបាញ់សម្លាប់សង្សាររបស់ខ្លួននៅក្នុង ផ្ទះសំណាក់សារីធំ បន្ទប់លេខ៤០៤ ជាន់ ឡៅតឿ ស្ថិតនៅក្នុង ភូមិទួលសង្កែ សង្កាត់ ទួលសង្កែ ខណ្ឌឬស្សីកែវ រាជធានីភ្នំពេញហើយគេច ខ្លួនបាត់ស្រមោល ចំណែកនារីរងគ្រោះមានឈ្មោះ សុន ស្រីលក្ខណ៌ អាយុ២៥ឆ្នាំ ជនជាតិខ្មែរ មានស្រុកកំណើត នៅភូមិត្រពាំងរាំង ស្រុកដងទង់ ខេត្តកំពត ហើយនៅក្រោយពេលឃាតកម្មកើតឡើង នាយឧត្តមសេនីយ៍ សៅ សុខា មេបញ្ជាការរងកង យោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសបានប្រកាសផ្តល់រង្វាន់ដល់អ្នកដែលផ្តល់ព័ត៌មានឈានដល់ការឃាត់ខ្លួនជនសង្ស័យឃាតករខាង លើនេះផងដែរ ៕
ដោយ លោក ហុក វិបុល
