ខេត្តបន្ទាយមានជ័យ ៖ លោកឧត្តមសេនីយ៍ត្រី អាត់ ខែម បានដាក់ចេញនូវផែនការឲ្យនគរបាលវរព្រំដែនត្រូវ បង្កើនការចុះល្បាតជាប្រចាំ នៅក្នុងភូមិសាស្ត្ររបស់តាមខ្សែ បន្ទាត់ព្រំដែនរបស់អង្គភាពនីមួយៗ ក្នុងគោល បំណងបង្ការ និងទប់ស្កាត់បទល្មើសផ្សេងៗមួយចំនួន ដែលអាចកើតមានឡើងដូចជា ការលួច ឆ្លងដែនខុសច្បាប់ ការលួចនាំចូលនាំចេញ នូវទំនិញខុសច្បាប់ បញ្ហាគ្រឿងញៀន ពិសេសពលករចំណាក ស្រុក និង ចោរកម្មជាដើម ។
លោក អាត់ ខែម បានណែនាំដល់មេបញ្ជាការវរ: ការពារព្រំដែនទាំង៤ នៃស្នងការដ្ឋាននគរបាល ខេត្តបន្ទាយមានជ័យ ឲ្យដាក់វេណប្រចាំការ និងចុះយាមល្បាតរក្សាសន្តិសុខ សុវត្ថិភាពក្នុងភូមិសាស្ត្រ របស់ខ្លួនជូនប្រជាពលរដ្ឋ ។
លោក អាត់ ខែម បានបន្តថា កាលពីវេលាម៉ោង៨និង៣០នាទីព្រឹក ថ្ងៃទី៨ ខែមីនា ឆ្នាំ២០១៥នេះ លោកសេង សុខឡាង នាយរងប៉ុស្តិ៍ក្បាលស្ពាន នៃវរ:ការពារព្រំដែន៨៩១ បានដឹកនាំកម្លាំង៨នាក់ ប្រដាប់ដោយអាវុធ អាកា ៧ដើម ដើរល្បាតតាមខ្សែបន្ទាត់ព្រំដែន ក្នុងភូមិសាស្ត្ររបស់ខ្លួន ក្នុងសកម្មភាពចុះការពារ នៅតាម បន្ទាត់ព្រំដែនជាលទ្ឋផលការចុះល្បាត រយ:ពេល១ម៉ោងពេញ ដែលបានបញ្ចប់ទៅនៅវេលា៩និង៣០នាទី នាព្រឹកថ្ងៃដដែលនេះ ពុំមានសភាពការអ្វីកើតឡើង មានភាពមិនប្រក្រតី និងគួរឲ្យកត់សម្គាល់នោះឡើយ ។
ជាមួយគ្នានេះ លោក អាត់ខែម ក៏បានដាក់ផែនការទៅការិយាល័យជំនាញ និងអធិការតាមបណ្តាក្រុង ស្រុកពង្រឹងសន្តិសុខ និងសណ្តាប់ធ្នាប់សាធារណ: តាមមូលដ្ឋានរបស់ខ្លួន ជូនប្រជាពលរដ្ឋជាពិសេស នោះការទប់ស្កាត់ បទល្មើសនានា ដែលអាចកើតមានឡើងដូចជា គ្រឿងញៀន និងចោរកម្មជាដើម ។ តាមរយ:យុទ្ឋនាការ ចុះល្បាតជាប្រចាំពីសំណាក់កម្លាំង នគរបាលនៅតាមមូលដ្ឋាន នានានោះបានធ្វើឲ្យ ប្រជាពលរដ្ឋនៅក្នុងខេត្ត មានភាពកក់ក្តៅ និងជឿទុកចិត្តមកលើកម្លាំងនគរបាល សម្រាប់ការរស់នៅនិង ប្រកបមុខរបរប្រចាំថ្ងៃ ៕
